ఉచిత గ్యాస్ సిలిండర్ల కోసం బుకింగ్ స్టార్ట్.. ఇవి ఉంటే గ్యాస్ మీ ఇంటికే

ఆంధ్రప్రదేశ్ ప్రజలకు అలర్ట్.. ఉచిత గ్యాస్ సిలిండర్ల కోసం బుకింగ్ ప్రారంభమైంది. దీపావళి కానుకగా ఏపీ ప్రభుత్వం అక్టోబర్ 31 నుంచి ఉచిత గ్యాస్‌ సిలిండర్ పథకం ప్రారంభించనున్న సంగతి తెలిసిందే. అయితే ఈ ఉచిత సిలిండర్ల కోసం బుకింగ్‌లు ఇవాళ నుంచే (అక్టోబర్ 29) ప్రారంభించారు. దీంతో ఉదయం పది గంటల నుంచే గ్యా్స్ ఏజెన్సీల వద్ద వినియోగదారులు బారులు తీరారు. ఇక దీపం పథకంలో భాగంగా ఏడాదికి ఉచితంగా మూడు గ్యాస్ సిలిండర్లు అందించనున్నారు. నాలుగు నెలలకు ఓ సిలిండర్ చొప్పున.. మూడు సిలిండర్లను ఏపీ ప్రభుత్వం ఉచితంగా అందించనుంది. అయితే పథకం ప్రారంభిస్తున్న నేపథ్యంలో ఈసారి మాత్రం అక్టోబర్ 31 నుంచి 2025 మార్చి 31 వరకూ తొలి సిలిండర్ బుక్ చేసుకునే సదుపాయం కల్పించారు.ఈ నేపథ్యంలో నవంబర్, డిసెంబర్, జనవరి, ఫిబ్రవరి, మార్చి నెలలకు సంబంధించిన ఉచిత గ్యాస్ సిలిండర్‌ బుకింగ్స్ ప్రారంభమయ్యాయి.

ఉచిత గ్యాస్ సిలిండర్లకు అర్హత, బుకింగ్స్ వివరాలివే

మరోవైపు ఏపీలో 1.55 కోట్ల గ్యాస్ కనెక్షన్లు ఉన్నాయి. అయితే ఉచిత గ్యాస్ సిలిండర్ పొందేందుకు ఎల్పీజీ కనెక్షన్, ఆధార్ కార్డు, తెల్ల రేషన్ కార్డు వివరాలు సమర్పించాలని ప్రభుత్వం తెలిపింది. ఈ వివరాలతో బుకింగ్ చేసుకుంటే సిలిండర్ బుక్ అయ్యినట్లు ఫోన్లకు సమాచారం వస్తుంది. ఇక గ్యాస్ సిలిండర్ బుక్ అయిన తర్వాత పట్టణాల్లో అయితే 24 గంటల్లో, గ్రామాల్లో అయితే 48 గంటల్లో సిలిండర్ డెలివరీ చేస్తారు. సిలిండర్ డెలివరీ అయిన రెండురోజుల్లోగా లబ్ధిదారుల బ్యాంకు ఖాతాల్లో సబ్సిడీ మొత్తం జమచేస్తారు. గ్యాస్ సబ్సిడీ కింద రూ.851లు జమచేస్తారు. ఇక ఈ సబ్సిడీ కోసం రూ.895 కోట్లు నిధులు విడుదలకు ఏపీ ప్రభుత్వం ఇప్పటికే ఉత్తర్వులు జారీ చేసింది.గ్యాస్ సిలిండర్ అందకపోతే 1967 టోల్ ఫ్రీ నంబర్‌కి ఫోన్‌చేసి ఫిర్యాదు చేయవచ్చు.

వెమరోవైపు ఈ నెల 31 నుంచి 2025 మార్చి 31 లోపు మొదటి సిలిండర్ కోసం బుక్ చేసుకోవచ్చు. ఇక ఏప్రిల్ 1 నుంచి జులై 30 వరకూ రెండో ఉచిత సిలిండర్ పొందే వీలుంది, ఆగస్టు 1 నుంచి నవంబర్ 31 వరకూ మూడో సిలిండర్ పొందవచ్చు. ఇక ఉచిత గ్యాస్ సిలిండర్ల పథకం అమలుకు ఏటా 2,684 కోట్లు వ్యయం అవుతుందని ప్రభుత్వం అంచనా. మరోవైపు బుధవారం రోజు శ్రీకాకుళం జిల్లాలో జరిగే కార్యక్రమంలో సీఎం చంద్రబాబు నాయుడు ఈ పథకాన్ని ప్రారంభించి.. మొదటి సిలిండర్ అందజేయనున్నారు.