అయోధ్యలోని వానరాలకు దీపావళి గిఫ్ట్.. హీరో అక్షయ్ కుమార్ మంచి మనసు

అయోధ్యలో ఉండే కోతులకు ఆహారాన్ని అందించి.. హీరో అక్షయ్ కుమార్ తన దాతృత్వాన్ని మరోసారి బయటపెట్టారు. దేశం నలుమూలల నుంచి అయోధ్య రామమందిరానికి వచ్చే భక్తులపై అక్కడ ఉండే కోతులు ఆహారం కోసం దాడి చేస్తుండటం తీవ్ర కలవరపాటుకు గురి చేస్తున్న వేళ.. బాలరాముడి ఆలయం వద్ద ఉన్న వానరాల కోసం అక్షయ్ కుమార్.. ఫీడింగ్ వ్యాన్‌ను పంపించారు. దీపావళి పండగ సందర్భంగా అక్షయ్ కుమార్ ఈ నిర్ణయం తీసుకున్నారు. తన తల్లిదండ్రులకు నివాళులు అర్పిస్తూ.. ఈ నిర్ణయం తీసుకున్నట్లు అక్షయ్ కుమార్ వెల్లడించారు.

దీపావళి పండగ సందర్భంగా అయోధ్యకు వచ్చే భక్తులకు.. అక్కడ ఉన్న కోతులు ఎలాంటి అసౌకర్యం కలిగించకుండా వాటికి అవసరమైన ఆహారం కోసం తన వంతు సాయం చేశారు. అయితే అయోధ్య రామమందిరం చుట్టుపక్కల ఉన్న కోతులకు ఆహారం ఏర్పాటు చేయడం ఇదేం తొలిసారి కాదు. అయోధ్య రామమందిరం ప్రారంభం అయినప్పటి నుంచి అక్కడ ఉన్న వానరాలకు ఆహారాన్ని అందించే కార్యక్రమాన్ని ప్రారంభించారు. అయోధ్య నగర శివార్లలోని సురక్షిత ప్రాంతంలో సుమారు 1200 కోతులకు నిత్యం ఆహారాన్ని అందిస్తున్నారు.

ఇక పవిత్రమైన అయోధ్య నగరంలో ఆహారం కోసం కోతులు పడుతున్న సమస్యల గురించి తెలిసినపుడు బాధగా అనిపించిందని అక్షయ్ కుమార్ ఒక ఇంటర్వ్యూలో వెల్లడించారు. ఆ వానరాల కోసం తన వంతు కృషి చేయాలనుకున్నట్లు తెలిపారు. అందుకే వాటికి ఆహారాన్ని అందించే కార్యక్రమాన్ని మొదలుపెట్టినట్లు చెప్పారు. దీపావళి పండగ సందర్భంగా తన తల్లిదండ్రులకు నివాళులర్పిస్తున్నట్లు పేర్కొన్నారు. తన తల్లిదండ్రుల పేరు మీద కోతులకు ఆహారాన్ని అందించే ఏర్పాట్లు చేసినట్లు వివరించారు. దీన్ని చూసి తన తల్లిదండ్రులు ఎక్కడ ఉన్నా సంతోషిస్తారని ఆశిస్తున్నట్లు అక్షయ్‌ కుమార్‌ వెల్లడించారు. ఈ వానరాలకు ఆహారం అందించడానికి ఆయన రూ.1 కోటి విరాళం ఇచ్చారు.

ఇక వానరాలకు ఆహారాన్ని అందించే కార్యక్రమంపై స్పందించిన అయోధ్య పీఠాధిపతి స్వామి రాఘవాచార్య.. అక్షయ్‌ కుమార్‌పై ప్రశంసల జల్లు కురిపించారు. అయోధ్యలో ఉన్న కోతులకు ఆహారాన్ని అందించడం నిజంగా గొప్ప విషయమని పేర్కొన్నారు. భక్తులు, మూగ జీవాలకు ఆయన చేస్తున్న సేవ స్ఫూర్తిదాయకమని కొనియాడారు. ఆయనపై ఎప్పుడూ శ్రీరాముడి ఆశీస్సులు ఉండాలని ఆశిస్తున్నట్లు ధన్యవాదాలు తెలిపారు. గతంలో ముంబైలోని హాజీ అలీ దర్గా పునరుద్ధరణ కోసం అక్షయ్‌ కుమార్.. రూ. 1.21 కోట్లు విరాళంగా ఇచ్చారు. కరోనా మహమ్మారి సమయంలో ప్రధానమంత్రి సహాయ నిధికి రూ. 25 కోట్లు అందించారు.