అమితాబ్ బచ్చన్ వద్ద అప్పు తీసుకున్న రతన్ టాటా.. అసలు విషయం చెప్పిన బిగ్ బీ

పేరు, డబ్బు ఎంత సంపాదించినా.. సామాన్య వ్యక్తి లాగే జీవించిన గొప్ప మనసు కొందరికే ఉంటుంది. అలాంటి వారిలో ఇటీవల కన్నుమూసిన టాటా గ్రూప్ సంస్థల అధిపతి రతన్ టాటా ముందు వరుసలో ఉంటారు అని చెప్పడంలో ఎలాంటి అతిశయోక్తి లేదు. అయితే అలాంటి రతన్ టాటా గురించి ఎన్నో విషయాలు వెలుగులోకి వస్తున్నాయి. అతి సామాన్యమైన జీవితాన్ని గడిపి.. రతన్ టాటా ఎంతో మందికి స్ఫూర్తిగా నిలిచారు. ఇక ఆయన మరణించిన తర్వాత.. రతన్ టాటాతో ఉన్న అనుబంధాన్ని ఎంతో మంది ప్రముఖులు గుర్తు చేసుకున్నారు. ఈ క్రమంలోనే తాజాగా ఓ టీవీ షోలో బాలీవుడ్ బిగ్ బీ.. అమితాబ్ బచ్చన్.. రతన్ టాటా గురించి ఎవరికీ తెలియని కొన్ని విషయాలను వెల్లడించారు. ఈ సందర్భంగా రతన్ టాటాతో తనకున్న అనుబంధాన్ని అమితాబ్ బచ్చన్ వివరించారు.

అమితాబ్ బచ్చన్ హోస్ట్‌గా సాగుతున్న కౌన్ బనేగా కరోడ్‌పతి సీజన్ 16లో భాగంగా తాజాగా జరిగిన ఓ ఎపిసోడ్‌లో బాలీవుడ్ డైరెక్టర్ ఫరాఖాన్, హీరో బొమన్ ఇరానీ పాల్గొన్నారు. ఈ క్రమంలోనే రతన్ టాటా గురించి వచ్చిన ప్రస్తావనతో ఆయనతో తన అనుబంధాన్ని గుర్తు చేసుకున్నారు. గతంలో ఒకసారి తాను, రతన్ టాటా ఒకే విమానంలో లండన్‌‌కు కలిసి వెళ్లినట్లు తెలిపారు. "లండన్‌ హీత్రో ఎయిర్‌పోర్టులో ల్యాండ్ అయిన తర్వాత రతన్ టాటాకు స్వాగతం పలికేందుకు వచ్చిన వారు కనిపించలేదు. దీంతో వారికి ఫోన్ చేసేందుకు రతన్ టాటా సమీపంలో ఉన్న ఫోన్ బూత్‌కు వెళ్లారు. ఆ పక్కనే తాను నిలబడి ఉన్నాను. ఆ తర్వాత నా వద్దకు రతన్ టాటా వచ్చారు. అమితాబ్.. నేను మీ దగ్గరి నుంచి కొంత డబ్బు తీసుకోవచ్చా. ఫోన్ చేయడానికి నా వద్ద నగదు లేదు అన్నారు" అని అమితాబ్ బచ్చన్ గుర్తు చేసుకున్నారు.

ఇక రతన్ టాటాలో ఉన్న నిరాడంబరతకు అద్దం పట్టేలా ఉన్న మరో ఘటనను కూడా అమితాబ్ బచ్చన్ వివరించారు. తాను, తన స్నేహితుడు ఇద్దరూ కలిసి ఒక కార్యక్రమానికి హాజరయ్యామని.. అయితే ఆ ఈవెంట్‌కు రతన్ టాటా కూడా హాజరయ్యారని తెలిపారు. ఈ ఈవెంట్ ముగిసిన తర్వాత.. తన స్నేహితుడి వద్దకు వచ్చిన రతన్ టాటా.. తాను అతడి ఇంటి వెనుకాలే ఉంటానని.. ఆయనను తన ఇంటి వద్ద దింపగలరా అంటూ తన స్నేహితుడిని రతన్ టాటా కోరినట్లు అమితాబ్ బచ్చన్ వివరించారు. ఈ సందర్భంగా తనకు కారు లేదని రతన్ టాటా చెప్పినట్లు గుర్తు చేసుకున్నారు. దీంతో ఆ మాట విని తాను షాక్ అయినట్లు చెప్పారు. ఇది మనం ఊహించగలమా అంటూ బొమన్ ఇరానీ, ఫరాఖాన్‌తో అమితాబ్ బచ్చన్ పేర్కొన్నారు.

మరోవైపు.. తాను ముఖ్య పాత్రలో నటించిన ఏత్బార్ సినిమాను టాటా సంస్థ నిర్మించిందని అమితాబ్ బచ్చన్ తెలిపారు. అయితే ఆ సినిమా బాక్సాఫీస్ వద్ద అంతగా విజయం సాధించలేదని చెప్పారు. ఈ చిత్రం ద్వారా టాటా సంస్థకు రూ.3.5 కోట్ల నష్టం వచ్చినట్లు అమితాబ్ బచ్చన్ వివరించారు.