పవన్ కళ్యాణ్ మూడంచెల వ్యూహం.. ప్లాన్ వర్కవుట్ అవుతోందా

ఏపీ డిప్యూటీ సీఎం పవన్ కళ్యాణ్.. పాలనలో తనదైన ముద్ర వేస్తున్నారు. ఒక ప్లాన్ ప్రకారం, తనకు అప్పగించిన కీలక శాఖల విషయంలో పవన్ కళ్యాణ్ ముందుకు వెళ్తున్నారు. పంచాయతీరాజ్, గ్రామీణ నీటిసరఫరా, అటవీ, పర్యావరణశాఖ మంత్రిగా ఉన్న పవన్ కళ్యాణ్.. ప్రతి శాఖలోనూ కీలక నిర్ణయాలు తీసుకుంటూ ముందుకు వెళ్తున్నారు. ఇక పంచాయతీరాజ్, గ్రామీణాభివృద్ధి శాఖల విషయంలో పవన్ కళ్యాణ్ మూడంచెల వ్యూహం అనుసరిస్తున్నారు. ఏపీలోని పల్లెల రూపురేఖలు మార్చాలనే ఉద్దేశంతో ఈ వ్యూహంతో ముందుకెళ్తున్నారు పవన్ కళ్యాణ్. ఇక ఈ మూడంచెల వ్యూహంలో భాగమే పల్లె పండుగ.

మొదటగా పంచాయతీరాజ్‌ శాఖ మంత్రిగా బాధ్యతలు స్వీకరించిన తర్వాత ఆగస్టులో పవన్ కళ్యాణ్.. గ్రామసభలను ఏర్పాటుచేశారు. రాష్ట్రవ్యాప్తంగా ఆగస్ట్ 23న వేలాది గ్రామ పంచాయతీలలో గ్రామసభలు నిర్వహించారు. వారి గ్రామాలకు ఏం అవసరముందనే విషయమై గ్రామసభల్లో పాల్గొన్న ప్రజలతో అభిప్రాయాలు సేకరించారు. వీటిపై గ్రామసభలలో తీర్మానం చేశారు. గ్రామసభల తీర్మానం తర్వాత పల్లె పండుగ వారోత్సవాలకు ఆదేశించారు పవన్ కళ్యాణ్. గ్రామసభల్లో తమ గ్రామాల్లో ఏమేం పనులు చేయాలో గ్రామస్థులే నిర్ణయం తీసుకోగా.. ఆ పనులను చేపట్టేందుకు పల్లె పండుగ వారోత్సవాలు నిర్వహించారు. గ్రామసభల్లో చేసిన తీర్మానాలకు అనుగుణంగా అభివృద్ధి కార్యక్రమాలు మొదలు పెట్టేందుకు అక్టోబర్ 14 నుంచి అక్టోబర్ 20 వరకు పల్లె పండుగ వారోత్సవాల పేరిట అభివృద్ధి కార్యక్రమాలకు శ్రీకారం చుట్టారు.

పల్లెపండుగ వారోత్సవాల పేరుతో రూ.4,500 కోట్ల వ్యయంతో, 30 వేల పనులను గ్రామాల్లో చేపట్టేందుకు శంకుస్థాపనలు ప్రారంభోత్సవాలు చేశారు. ఈ పనులను 3 నెలల కాలంలో పూర్తి చేసి సంక్రాంతికి గ్రామాల్లో కొత్త శోభను తీసుకురావాలనే ప్రయత్నంతో ముందుకెళ్లారు. ఈ పనులను ఉపాధి హామీ పథకానికి అనసంధానం చేయడంతో 8 లక్షల మందికి ఉపాధి కూడా దొరకనుంది. పల్లె పండుగ వారోత్సవాల్లో భాగంగా రాష్ట్రవ్యాప్తంగా పంచాయతీలలో అభివృద్ధి పనులు ప్రారంభం కాగా.. ఇప్పుడు వాటిపై సోషల్ ఆడిట్ నిర్వహిస్తున్నారు.

గ్రామ సభలకు కొనసాగింపుగా జరిగిన పల్లె పండుగ ద్వారా మొదలైన అభివృద్ది పనులను మరింత పారదర్శకంగా జరిపేందుకు సోషల్ ఆడిట్ నిర్వహిస్తున్నారు. ఇందులో భాగంగా రాష్ట్రంలో పలుచోట్ల సామాజిక తనిఖీలు కొనసాగుతున్నాయి. ఏమేం పనులు చేపట్టారు.. ఎంత వరకూ వచ్చాయనే దానిపై ఆడిట్ కొనసాగుతోంది. ఉపాధి హామీ పథకంలో ఖర్చుపెట్టే ప్రతి రూపాయి ప్రజలకు ఉపయోగపడే విధంగా చూడాలని అధికారులకు పవన్ కళ్యాణ్ ఇప్పటికే స్పష్టం చేశారు.

ఏ అధికారైనా తప్పు చేస్తే నిష్పక్షపాతంగా వ్యవహరించాలని, సామాజిక తనిఖీ సభలో సరైన సాక్షాధారాలతో తప్పు చేసిన వారి మీద ప్రజల మధ్య విచారణ చేసి బాధ్యుల మీద చర్యలు తీసుకోవాలని పవన్ కళ్యాణ్ స్పష్టం చేశారు. పవన్ కళ్యాణ్ ఆదేశాలకు అనుగుణంగా సోషల్ ఆడిట్ జరుగుతోంది. మొత్తంగా మూడు నెలలలోపు శంకుస్థాపన చేసిన పనులు పూర్తి చేసి పల్లెలకు సంక్రాంతి శోభ తీసుకురావాలని పవన్ ముందుకెళ్తున్నారు.