ఏపీ రాజకీయాల్లో ట్విస్ట్.. వైఎస్ షర్మిలకు భద్రతను పెంచండి.. డీజీపీని చేరిన వినతులు

ఏపీ రాజకీయాల్లో ఆసక్తికర పరిణామం చోటుచేసుకుంది. ఆంధ్రప్రదేశ్ కాంగ్రెస్ పార్టీ అధ్యక్షురాలిగా ఉన్న వైఎస్ షర్మిలకు భద్రతను పెంచాలంటూ ఆ పార్టీ నేతలు డిమాండ్ చేస్తున్నారు. ఈ మేరకు ఏపీ డీజీపీ ద్వారకా తిరుమలరావును కలిసి వైఎస్ షర్మిలకు భద్రతను పెంచాలంటూ వినతి పత్రం సమర్పించారు. ప్రస్తుతం వైఎస్ షర్మిలకు 2+2 గన్‌మెన్ సెక్యూరిటీ ఉంది. అయితే వైఎస్ షర్మిలకు 2+2గా ఉన్న సెక్యూరిటీని 4+4 పెంచాలంటూ డీజీపీకి ఇచ్చిన వినతి పత్రంలో కాంగ్రెస్ నేతలు కోరారు. ప్రస్తుతం ఏపీలో నెలకొన్న రాజకీయ పరిస్థితుల నడుమ ఏపీ కాంగ్రెస్ నేతల డిమాండ్, అభ్యర్థన ప్రాధాన్యం సంతరించుకుంది.

మరోవైపు ప్రస్తుతం ఏపీలో వైఎస్ కుటుంబం ఆస్తుల వివాదం హాట్ టాపిక్‌గా ఉన్న సంగతి తెలిసిందే. వైఎస్ఆర్ నలుగురు వారసులకు ఆస్తులు సమానంగా పంచాలని అప్పట్లో చెప్పారని.. అయితే జగన్ ఆయన ఉద్దేశానికి తూట్లు పొడుస్తున్నారని షర్మిల ఆరోపిస్తున్నారు. అలాగే గతంలో చేసుకున్న ఎంవోయూ ప్రకారం ఆస్తుల బదలాయింపు జరగాలంటున్నారు. అయితే వైసీపీ నేతలు షర్మిల విమర్శలను తిప్పికొడుతున్నారు. వైఎస్ జగన్ స్వార్జిత ఆస్తిలో చెల్లెలిపై ప్రేమతో వాటా ఇచ్చేందుకు ఎంవోయూ చేసుకున్నారని.. అయితే షేర్ల బదిలీ ద్వారా జగన్ బెయిల్ రద్దుకు ప్రయత్నించారంటూ షర్మిలపై విమర్శలు సంధిస్తున్నారు. ఈ క్రమంలోనే ఎంవోయూ ప్రకారం ఆస్తుల బదిలీకి జగన్ నిరాకరిస్తూ ఎన్‌సీఎల్‌టీలో పిటిషన్ వేసిన సంగతి తెలిసిందే.

ఇక వైఎస్ జగన్ ఎన్‌సీఎల్‌టీలో పిటిషన్ వేసిన దగ్గర నుంచి ఏపీ రాజకీయాల్లో వైసీపీ వర్సెస్ షర్మిలగా మారిపోయాయి. వైఎస్ జగన్ తీరును తప్పుబడుతూ షర్మిల లేఖ విడుదల చేయటం, షర్మిల ఆరోపణలకు వైసీపీ కౌంటర్లు ఇవ్వడం రోజూ సాధారణంగా మారింది. ఈ క్రమంలోనే మంగళవారం వైఎస్ విజయమ్మ.. ఈ వివాదంపై వైఎస్ఆర్ అభిమానులకు లేఖరాశారు. అన్నాచెల్లెళ్లు ఇద్దరూ ఈ వివాదాన్ని పరిష్కరించుకుంటారని.. దీనిపై సోషల్ మీడియాలో ఇష్టానుసారం రాయవద్దంటూ ఆమె కోరారు. ఈ క్రమంలోనే షర్మిలకు అన్యాయం జరుగుతోందని వైఎస్ విజయమ్మ లేఖలో పేర్కొన్నారు. దీంతో విజయమ్మ లేఖపైనా వైసీపీ విమర్శలు చేస్తోంది. వైఎస్ షర్మిల భావోద్వేగాలకు, ఒత్తిళ్లకు లొంగిపోయి విజయమ్మ.. జగన్‌కు ఇబ్బంది కలిగించేలా షర్మిలకు అనుకూలంగా ఉన్నారంటూ విమర్శిస్తోంది.