బిజినెస్‌మెన్ గొప్ప మనసు.. ఇల్లు కట్టిన కాంట్రాక్టర్‌కు రూ. కోటి రోలెక్స్ వాచ్ గిఫ్ట్

చాలామంది ధనవంతులు.. తమ వద్ద పనిచేసే వారికి డబ్బులు, ఇతర బహుమతులు ఇవ్వడం సర్వ సాధారణమే. అయితే ఓ బిజినెస్‌మెన్.. తన కోసం ఓ ఖరీదైన భవనాన్ని నిర్మించుకున్నాడు. అది కేవలం ఇల్లు మాత్రమే కాకుండా చూడటానికి ఓ రాజు కోసం నిర్మించిన కోట లాగా ఉంటుంది. ఇక ఆ భవనాన్ని నిర్మించినందుకు.. దాని ఓనర్.. ఆ కాంట్రాక్టర్‌కు జీవితంలో మరిచిపోలేని బహుమతిని అందించాడు. అందుకు కారణాన్ని కూడా ఆ యజమాని వెల్లడించాడు. తన ఇంటిని వేగంగా, నాణ్యతతో, శ్రద్ధతో కట్టారని.. అందుకే ఆ కాంట్రాక్టర్ పని విధానం నచ్చి.. తాను ఈ నిర్ణయం తీసుకున్నట్లు బిల్డింగ్ ఓనర్ తెలిపాడు. ఈ ఘటన కాస్తా సోషల్ మీడియాలోకి ఎక్కడంతో నెటిజన్లు రకరకాలుగా స్పందిస్తున్నారు.

పంజాబ్‌లోని జిరాక్‌పూర్ సమీపంలో.. బిజినెస్‌మెన్ గుర్దీప్ దేవ్‌బత్ ఒక విశాలమైన రాజభవనాన్ని నిర్మించాలని భావించాడు. ఇందుకోసం రాజిందర్ సింగ్ రూప్రా అనే కాంట్రాక్టర్‌ను సంప్రదించాడు. తనకు ఇష్టమైన ఇంటిని బాగా కట్టినందుకు రాజిందర్ సింగ్ రూప్రా.. గుర్దీప్ దేవ్‌బత్‌కు ఏదైనా బహుమతి ఇవ్వాలని నిర్ణయించుకున్నాడు. ఇందులో భాగంగానే అతడికి కోటి రూపాయల విలువైన రోలెక్స్ వాచ్‌ను బహుమతిగా అందించాడు.

ఆ వాచ్‌ను 18 క్యారెట్ల బంగారంతో రూపొందించిన రోలెక్స్ ఓస్టెర్ పెర్‌పెచ్యువల్ స్కై డ్వెల్లర్. చూడడానికి ఆ వాచ్ బంగారంతో దగదగా మెరిసిపోతుంది. అది చూసిన కాంట్రాక్టర్ రాజిందర్ సింగ్ రూప్రా సంతోషంలో మునిగిపోయాడు. ఆ వాచ్‌కు బలమైన బంగారు లింక్‌లతో తయారైన సిగ్నేచర్ ఓస్టెర్ బ్రాస్‌లెట్‌ కూడా ఉంది. అంతేకాకుండా ఇందులో షాంపైన్ రంగు డయల్ కూడా ఉండటం విశేషం.

ఇక ఈ భవనం విషయానికి వస్తే పంజాబ్‌లోని జిరాక్‌పూర్ సమీపంలో 9 ఎకరాల విస్తీర్ణంలో నిర్మించారు. అది ఆధునిక కోటను పోలి ఉంటుంది. పంజాబ్‌లోని షాకోట్‌కు చెందిన రాజిందర్ సింగ్ రూప్రా.. ముందుగా అనుకున్న ప్రకారం 2 సంవత్సరాల్లోనే ఆ కోటను పూర్తి చేశారు. అందుకు 200 మందికి పైగా కార్మికులు నిరంతరం భవన నిర్మాణ పనులు చేసి దాన్ని ఎట్టకేలకు పూర్తి చేశారు. ఇక ఆ భవనానికి వాస్తుశిల్పి రంజోద్ సింగ్ డిజైన్‌ను రూపొందించారు.

ఆ భవనానికి దృఢమైన సరిహద్దు గోడతో ఒక ప్రైవేటు కోటలా నిర్మించారు. ఈ రాజ భవనంలో విశాలమైన హాల్‌లు, అత్యంత సుందరంగా తీర్చిదిద్దిన గార్డెన్‌లు ఉన్నాయి. అంతేకాకుండా నిర్మాణపరంగా విశిష్టమైన ప్రత్యేకతలెన్నో ఈ భవనంలో ఉన్నాయి. ఈ విషయం కాస్తా సోషల్ మీడియాలో ఎక్కడంతో నెటిజన్లు కామెంట్లతో వైరల్ చేస్తున్నారు.