ఓవైపు కుండల తయారీ, మరోవైపు పెయింటింగ్.. రాహుల్ గాంధీ బిజీ బిజీ
national | Suryaa Desk | Published : Fri, Nov 01, 2024, 09:03 PM
కాంగ్రెస్‌ అగ్రనేత, లోక్‌సభలో ప్రతిపక్ష నేత రాహుల్ గాంధీ.. దీపావళి పండగను వివిధ వర్గాల వారితో కలిసి జరుపుకున్నారు. తన మేనల్లుడు, ప్రియాంక గాంధీ వాద్రా కుమారుడు రేహాన్ వాద్రాతో కలిసి కళాకారుల వద్దకు వెళ్లి పండగ వేళ వారితో కలిసి దీపావళి చేసుకున్నారు. ఈ సందర్భంగా కుమ్మరులతో కలిసి ప్రమిదలు, కుండలు తయారు చేశారు. అంతేకాకుండా పెయింటింగ్ వేసేవారితో కలిసి ఓ ఇంటికి రంగులు వేశారు. ఈ సందర్భంగా పెయింటింగ్ ఎలా వేయాలి అనే విషయాలను వారి నుంచి అడిగి తెలుసుకున్నారు. ఈ సందర్భంగా వాటికి సంబంధించిన ఫోటోలు, వీడియోను రాహుల్ గాంధీ సోషల్ ట్విట్టర్‌లో షేర్ చేశారు. భారతదేశాన్ని ప్రకాశవంతం చేసే వారితో దీపావళి జరుపుకున్నట్లు పేర్కొన్నారు. ఈ సందర్భంగా తన మేనల్లుడు రేహాన్ వాద్రాకు పలు విషయాలను చెప్పారు. ఈ కళాకారులు తయారు చేసే మట్టి ప్రమిదలు ఎప్పటికైనా ప్రపంచంలోని విలువైన సెరామిక్‌తో చేసిన వస్తువులతో పోటీ పడొచ్చని రాహుల్ గాంధీ.. రేహాన్ వాద్రాకు వెల్లడించారు. ఈ సందర్భంగా దేశంలోని వివిఝ రంగాల కార్మికులు ఎదుర్కొంటున్న సమస్యలు, సవాళ్లను వివరించారు. ప్రతి ఒక్కరి దీపావళిని కార్మికులు సంతోషకరమైనదిగా చేస్తారని.. ఈ పండగ వారందరి జీవితాల్లో శ్రేయస్సు, పురోగతి, అభివృద్ధిని తీసుకొస్తుందని ఆశిస్తున్నట్లు రాహుల్ గాంధీ పేర్కొన్నారు.
|
|