సీఎం చంద్రబాబుకు ముద్దు పెట్టబోయిన మహిళ.. అనకాపల్లి టూర్‌లో ఊహించని సన్నివేశం

సినిమా హీరోలు, హీరోయిన్లతో పాటు రాజకీయ నాయకులకు కూడా ఫ్యాన్స్ ఉంటారు. వీళ్లు ఓకే కానీ.. కొంత మంది డైహార్డ్ ఫ్యాన్స్ కూడా ఉంటారు. తమ అభిమాన నటులను కళ్లారా చూస్తే చాలని కొందరనుకుంటే.. వాళ్లను ఒక్కసారైనా తాకాలి.. హత్తుకోవాలి.. వారితో కలిసి ఓ ఫొటో తీసుకోవాలి.. రెండు మాటలైనా మాట్లాడాలి.. అని డైహార్డ్ ఫ్యాన్స్ తహతహలాడిపోతుంటారు. తీరా వాళ్లు ముందుకొచ్చి నిలబడితే.. ఆ తట్టుకోలేని ఆనందంలో ఏం చేస్తున్నారో కూడా తెలియకుండా వింత వింతగా ప్రవర్తిస్తుంటారు. అచ్చంగా అలాంటిదే జరిగింది ఏపీలోని అనకాపల్లిలో. ఏపీ సీఎం చంద్రబాబు పర్యటనలో ఓ మహిళా అభిమాని ఆయనను కలిసింది. ఆయనతో ఫొటో తీసుకుంది. అంతటితో ఆగకుండా.. ఏకంగా సీఎం చంద్రబాబుకు ముద్దు పెట్టేసింది.

ఏపీ సీఎం చంద్రబాబుకు కూడా చాలా మంది ఫ్యాన్స్ ఉంటారు. సుదీర్ఘ కాలం సీఎంగా చేసిన చంద్రబాబుకు అభిమానులు ఉండటం సహజమే. అయితే.. చంద్రబాబును కలవాలని.. ఆయనతో ఒక్క ఫొటో అయినా తీసుకోవాలని చాలా మంది ఆరాటపడుతుంటారు. కానీ.. సీఎం చంద్రబాబుకు ఉన్న భద్రతా కారణాల వల్ల ఆయన చుట్టూ ఎప్పుడూ జడ్ ప్లస్ సెక్యూరిటీ ఉంటుంది. దీంతో.. చాలా తక్కువ మందికే ఆయనను కలిసేందుకు.. ఫొటో తీసుకునేందుకు ఛాన్స్ వస్తుంటుంది. అలా.. ఈరోజు (నవంబర్ 02న) అనకాపల్లి జిల్లాలో పర్యటించిన సీఎం చంద్రబాబును కలిసే అవకాశం దక్కించుకుంది ఓ మహిళ అభిమాని.

పర్యటనలో భాగంగా.. చంద్రబాబును చూసేందుకు చాలా మంది టీడీపీ కార్యకర్తలు, ఆయన అభిమానులు వచ్చారు. ఆయనకు పెద్ద ఎత్తున స్వాగతం పలికారు. ఈ క్రమంలోనే.. ఓ మహిళా అభిమాని బాబును కలిసేందుకు తెగ ప్రయత్నించింది. చంద్రబాబును కలిసేందుకు చుట్టూ ఉన్న భద్రతా వలయాన్ని తప్పించుకుని ఆయన దగ్గరికి దూసుకొచ్చింది. ఆమె అభిమానాన్ని చూసి చంద్రబాబు కూడా ఎలాంటి అభ్యంతరం చెప్పలేదు. భద్రతా సిబ్బంది మహిళను వారించే ప్రయత్నం చేసినా.. చంద్రబాబు మాత్రం ఆ మహిళను దగ్గరకు తీసుకుని.. అప్యాయంగా పలకరించారు. దీంతో.. తన వెంట తీసుకొచ్చిన పుష్ఫగుచ్చాన్ని అందించింది. అది తీసుకున్న బాబు.. ఆమెతో ఫొటో తీసుకున్నారు.

తన అభిమాన నాయకుడిని కలిసే అవకాశం రావటం.. అందులోని ఆయన తన భుజం మీద చెయ్యేసి ఫొటో తీసుకోవటం చూసి.. ఆ అభిమానికి ఆనందం ఉప్పొంగింది. ఒక్కసారైనా తన అభిమాన నాయకుని చేతిని తాకాలని.. ఆయన దృష్టిలో పడాలని తపించిన ఆమెను.. స్వయంగా ఆయనే ఆప్యాయంగా పలకరించటం, దగ్గరికి తీసుకోవటంతో.. సంతోషంతో ఉబ్బితబ్బిబ్బైపోయింది. ఆ పట్టరాని ఆనందంతో.. తన అభిమాన నాయకుడిపై తనకున్న అభిమానం, ప్రేమను చూపించాలనుకున్నా ఆ మహిళా అభిమాని.. ఆయనకు ఏకంగా ముద్దు పెట్టేందుకు ప్రయత్నించింది.

అప్పటికే.. ఆమెను ఎప్పుడు పక్కకు తోసెయ్యాలా అని చూస్తున్న భద్రతా సిబ్బంది.. ఆమె ముద్దు పెట్టేందుకు చేసిన ప్రయత్నాన్ని గమనించి.. వెంటనే అడ్డుకున్నారు. చంద్రబాబు కూడా ఆమె చేసిన ప్రయత్నాన్ని చూసి ఒకింత ఆశ్చర్యానికి గురయ్యారు. చిన్న నవ్వు నవ్వి.. అలాంటి చేయొద్దన్నట్టుగా సైగ చేశారు. దానికి ఆమె.. ఆయన తన అన్న అని.. ఆయనంటే తానకు ఎంతో ఇష్టమని వివరిస్తూ.. మరోసారి హత్తుకుంది. అప్పటికే భద్రతా సిబ్బంది ఆమెను అక్కడి నుంచి పక్కను తీసుకెళ్లారు. అయితే.. ఈ సన్నివేశమంతా.. అక్కడే ఉన్న మీడియా కెమెరాల్లో రికార్డవటమే కాదు.. అది కాస్త సోషల్ మీడియాలో వైరల్ కూడా అయ్యింది.

అయితే.. ఆమె ముద్దు పెట్టేందుకు ప్రయత్నించటంలో ఎలాంటి దురాభిప్రాయం లేదని.. తన అభిమాన నేతపై తనకున్న ప్రేమను, అభిమానాన్ని చూపించే ప్రయత్నమేనని నెటిజన్లు కామెంట్లు చేస్తున్నారు. తమకు ఎంతో ఇష్టమైన పిల్లల్ని చూసినప్పుడు కూడా అప్రయత్నంగానే ముద్దు పెట్టుకుంటామని.. ఇది కూడా అలాంటి చర్యేనని తెలుగు తమ్ముళ్లు చెప్తున్నారు.

 ఈ విషయంపై మాట్లాడిన సదరు మహిళా అభిమాని.. తాను జీవితంలో ఈరోజును ఎప్పటికీ మర్చిపోలేనని, టీవీల్లో తమ నాయకుడిని చూసేవాళ్లమని, జీవితంలో తమ అభిమాన నేతను నేరుగా చూస్తే చాలు అనుకున్నామని, కానీ ఇవాళ ఆయనను కలిసే అవకాశం రావడం తన అదృష్టంగా భావిస్తున్నట్లు సంతోషంతో తెలిపింది.