దళపతి విజయ్ టీవీకే మహనాడుపై రజినీకాంత్ రియాక్షన్.. కీలక వ్యాఖ్యలు

తమిళ రాజకీయాల్లోకి మరో స్టార్ హీరో దళపతి విజయ్ ఎంట్రీ ఇచ్చిన విషయం తెలిసిందే. ఈ నేపథ్యంలోనే తమిళ వెట్రి కళగం - టీవీకే పార్టీని స్థాపించి.. ఇటీవలె టీవీకే తొలి మహానాడును విల్లుపురంలో నిర్వహించారు. ఈ టీవీకే మహానాడుకు లక్షల సంఖ్యలో ప్రజలు, విజయ్ అభిమానులు వచ్చారు. ఈ సందర్భంగా తన పార్టీ సిద్ధాంతాలు, విధానాలను దళపతి విజయ్ వెల్లడించారు. అయితే తమిళనాడులోని ప్రాంతీయ పార్టీలైన డీఎంకే, అన్నాడీఎంకే.. విజయ్‌పై, టీవీకే పార్టీ సిద్ధాంతాలపై తీవ్ర స్థాయిలో విమర్శలు గుప్పించాయి. అయితే తాజాగా తలైవా, సూపర్‌స్టార్‌ రజినీకాంత్ కూడా దళపతి విజయ్ టీవీకే పార్టీ మహానాడుపై కీలక వ్యాఖ్యలు చేశారు. తమిళగ వెట్రి కళగం మహానాడు భారీ విజయం సాధించిందని రజనీకాంత్‌ తెలిపారు.

ఇటీవల టీవీకే పార్టీ నిర్వహించిన మొట్టమొదటి మహానాడు భారీ విజయం సాధించిందని రజనీకాంత్‌ అన్నారు. దీపావళి పండగ సందర్భంగా తమ అభిమాన నటుడు రజనీకాంత్‌కు శుభాకాంక్షలు చెప్పేందుకు తమిళనాడు చెన్నైలోని పోయెస్‌ గార్డెన్‌ ఎదుట గురువారం తెల్లవారుజాము నుంచే ఫ్యాన్స్ చేరుకున్నారు. అయితే అభిమానుల కోసం ఉదయం 9.30 గంటలకు ఇంటి నుంచి బయటకు వచ్చిన తలైవా.. ఫ్యాన్స్‌కు అభివాదం చేశారు. అనంతరం వారికి దీపావళి శుభాకాంక్షలు చెప్పారు. ఇక రజినీకాంత్‌ను చూసి తలైవా, తలైవా అంటూ ఫ్యాన్స్ ఉర్రూతలూగిపోయారు. ఈ సందర్భంగా మీడియాతో మాట్లాడిన రజనీకాంత్‌.. ఈ దీపావళి సందర్భంగా అందరూ సంతోషంగా, ఆరోగ్యంగా జీవించాలని ఆకాంక్షించారు.

ఈ నేపథ్యంలోనే ఇటీవల నిర్వహించిన విజయ్‌ మహానాడు గురించి మీడియా రజినీకాంత్‌ను ప్రశ్నలు అడిగింది. టీవీకే మహానాడు కచ్చితంగా భారీ విజయం సాధించిందని తలైవా సమాధానం ఇచ్చారు. ఈ సందర్భంగా దళపతి విజయ్‌కి తన శుభాకాంక్షలు అని రజినీకాంత్ తెలిపారు. విజయ్‌కి మద్దతుగా రజినీకాంత్ చేసిన ప్రకటనతో దళపతి ఫ్యాన్స్, టీవీకే పార్టీ వర్గాలు హర్షం వ్యక్తం చేస్తున్నాయి.

ఇక నవంబర్ 1వ తేదీన తమిళనాడు డే సందర్భంగా దళపతి విజయ్ ట్వీట్ చేశారు. చారిత్రక స్మృతులతో తమిళనాడు డేను ఘనంగా జరుపుకుందాం అంటూ విజయ్‌ పిలుపునిచ్చారు. 1956లో భాషాప్రయుక్త రాష్ట్రాల ఏర్పాటులో భాగంగా నవంబరు 1వ తేదీన తమిళనాడు ప్రత్యేక రాష్ట్రంగా ఆవిర్భవించిందని పేర్కొన్నారు. మద్రాసు రాష్ట్రానికి తమిళనాడు పేరు పెట్టాలని త్యాగి శంకరలింగనార్‌ నిరాహారదీక్ష చేసి ప్రాణాలు విడిచారని ఆయన త్యాగాన్ని గుర్తు చేసుకున్నారు. ఆ తర్వాత అధికారంలోకి వచ్చిన అన్నాదురై.. వెంటనే అసెంబ్లీలో తీర్మానం పెట్టి తమిళనాడు పేరు పెట్టారని విజయ్ గుర్తు చేశారు. తమిళనాడు కోసం పోరాడిన సమరయోధుల త్యాగాలను స్మరించుకుందామని.. తమిళనాడు అవతరణ దినోత్సవాన్ని చారిత్రక స్మృతులతో కీర్తిద్దామంటూ విజయ్ తమిళులకు పిలుపునిచ్చారు.