గోడను ఢీకొట్టిన సైక్లిస్ట్,,,స్పాట్‌లోనే ప్రాణాలు కోల్పోయిన యువకుడు

మృత్యువు ఏ రూపంలో వస్తుందో అస్సలు ఊహించలేం. ఈ భూమ్మీద నూకలు ఉండాలే కానీ.. ఎంత ప్రమాదం జరిగినా బతికి బయటపడొచ్చు. అదే ఆయువు తీరితే మాత్రం. చిన్న చిన్న ప్రమాదాలకు సైతం ప్రాణాలు కోల్పోతుంటారు. ఇలా చాలా మంది ప్రాణాలు కోల్పోయారు. తాజాగా.. ముంబైలో ఓ భయంకరమైన యాక్సిడెంట్ జరిగింది. సైకిల్‌పై వెళ్తున్న ఓ యువకుడు యాక్సిడెంట్‌కు గురై ప్రాణాలు కోల్పోయాడు. అందుకు సంబంధించిన దృశ్యాలు సోషల్ మీడియాలో వైరల్‌గా మారాయి.

ముంబై మీరా -భయందర్ ప్రాంతంలో ఈ ఘటన చోటు చేసుకుంది. సైకిల్ ప్రమాదంలో నీరజ్ యాదవ్ అనే 16 ఏళ్ల యువకుడు స్పాట్‌లోనే ప్రాణాలు కోల్పోయాడు. స్వతహాగా సైక్లిస్ట్ అయిన నీరజ్.. సైకిల్ స్టంట్ చేస్తూ ప్రమాదవశాత్తు ప్రాణాలు కోల్పోయాడు. అందుకు సంబంధించిన దృశ్యాలు సమీపంలోని ఓ దుకాణం ముందున్న సీసీటీవీ కెమెరాలో రికార్డయ్యాయి. ఒళ్లు గగుర్పాటుకు గురి చేసేలా, వెన్నులో వణుకు పుట్టేలా ఈ ప్రమాదం జరిగింది.

స్థానికులు తెలిపిన వివరాల ప్రకారం.. నీరజ్ యాదవ్ అనే యువకుడు మీరా రోడ్‌లో నివాసం ఉండేవాడు. ఈ క్రమంలో నాలుగు రోజుల క్రితం (అక్టోబర్ 28) తన సైకిల్‌పై ఘోడ్ బందర్ కోటకు బయల్దేరాడు. స్లైకిస్ట్ అయిన నీరజ్ సైకిల్‌పై స్టంట్స్ చేస్తూ బయల్దేరాడు. ఈక్రమంలో ఓ కాలనీలో అదుపు తప్పి పక్కనే ఉన్న ఓ ఇంటి గేటు గోడను బలంగా ఢీకొట్టాడు. ఈ ప్రమాదం జరిగిన వెంటనే తీవ్ర రక్తస్రావంతో నీరజ్ అచేతనంగా పడిపోయాడు. అటుగా వెళ్తున్న కొందరు వ్యక్తులు అతడిని వెంటనే సమీపంలోని బాబా సాహెబ్ అంబేడ్కర్ ప్రభుత్వాసుపత్రికి తరలించారు.

పరీక్షించిన డాక్టర్లు నీరజ్ అప్పటికే మృతి చెందినట్లు ప్రకటించారు. ఘటనపై కేసు నమోదు చేసుకున్న పోలీసులు విచారణ చేపట్టారు. ఈ వీడియో ప్రస్తుతం సోషల్ మీడియాలో వైరల్‌గా మారింది. భయంకరమైన సైకిల్ ప్రమాదంపై నెటిజన్లు భిన్నంగా స్పందిస్తున్నారు. 'భయంకరమైన ప్రమాదం. గుండె ఆగిపోయేలా ఉంది. అతని తల గోడకు కొట్టుకోవడం చూడలేకపోతున్నాను. అని ఓ నెటిజన్ కామెంట్ చేశాడు.

'దురదృష్టవశాత్తూ అతని తల కాంక్రీట్/మెటల్ గేట్ పదునైన అంచుకు తగిలింది. సైక్లిస్ట్ హెల్మెట్ ధరించి ఉంటే ప్రమాదం తప్పేది. దురదృష్టకర సంఘటన.' అని మరో నెటిజన్ కామెంట్ చేయగా.. 'పిల్లలు తమ ప్రాణాలను పణంగా పెట్టి ఇలాంటి విన్యాసాలు ఎందుకు చేస్తారో? అర్థం కాదు.' అని మరో నెటిజన్ తమ అభిప్రాయాన్ని వ్యక్తం చేశాడు.