యువకుడి పోస్ట్‌మార్టమ్ కోసం ఏర్పాట్లు.. బతికే ఉన్నా సార్ అంటూ.. డాక్టర్లు షాక్

ఉత్తరప్రదేశ్‌‌‌లో విచిత్రమైన ఘటన జరిగింది. ఓ యువకుడు రోడ్డుప్రమాదంలో చనిపోయాడని పోస్ట్‌మార్టమ్‌ కోసం తీసుకెళుతుండగా ఊహించని పరిణామం ఎదురైంది. దెబ్బకు డాక్టర్లతో పాటూ పోలీసులు అవాక్కయ్యారు. మీరఠ్ జిల్లా గోట్కాకు చెందిన షగుణ్‌శర్మ అనే యువకుడు తన సోదరుడితో కలిసి బుధవారం రాత్రి బైకుపై ఖతౌలీ వైపు వెళుతున్నాడు.. ఇంతలో వేగంగా వచ్చిన మరో వాహనం వీరి బైక్‌ను ఢీకొట్టింది. ఈ ఘటనలో అన్నదమ్ములిద్దరూ తీవ్రంగా గాయపడ్డారు. షగుణ్‌శర్మ పరిస్థితి విషమంగా ఉండటంతో మీరట్ మెడికల్ కాలేజీకి తరలించారు.

డాక్టర్లు ఆస్పత్రిలో షగుణ్‌కు చికిత్స అందించిన తర్వాత.. అతడు చనిపోయినట్లు ప్రకటించారు. దీంతో షగుణ్‌ డెడ్‌బాడీని మార్చురీకి తరలించే ఏర్పాట్లు చేశారు. స్ట్రెచరుపై మార్చురీ దగ్గరకు తరలించేందుకు.. పంచనామా చేస్తుంటే షగుణ్‌లో కదలిక కనిపించింది. అతడు 'సార్‌.. నేను బతికే ఉన్నా'అంటూ డాక్టర్‌కు చెప్పాడు. దీంతో అవాక్కైన వైద్యులు షగుణ్‌ను మళ్లీ ఎమర్జెన్సీ వార్డుకు తరలించారు. ఈ వ్యవహారంపై మీరఠ్‌ మెడికల్ కాలేజీ ప్రిన్సిపల్ ఆర్సీ గుప్తా విచారణకు ఆదేశించారు. ఈ యువకుడు ఐసీయూలో కోలుకుంటున్నట్లు తెలుస్తోంది. ఈ ఘటన స్థానికంగా చర్చనీయాంశమైంది. అలాగే ఈ ప్రమాదంలో తీవ్రంగా గాయపడిన షగుణ్ సోదరుడు కూడా మెల్లిగా మీరట్ మెడికల్ కాలేజీ ఆస్పత్రిలో కోలుకుంటున్నట్లు సమాచారం.

ఉత్తరప్రదేశ్‌లో దీపావళి పండుగ రోజు విషాద ఘటన జరిగింది. ఘోర రోడ్డు ప్రమాదంలో ఆరుగురు చనిపోగా.. మరో ఐదుగురు తీవ్రంగా గాయపడ్డారు. ఉత్తర బదౌన్‌లోని ముజారియా పోలీస్‌స్టేషన్‌ పరిధిలో మీరట్ హైవేపై ముజారియా సమీపంలో టెంపోను ట్రాక్టర్‌ ఢీకొట్టింది. ఆ తర్వాత వెనుక నుంచి వస్తున్న కారు డివైడర్‌ను ఢీకొట్టింది. ఈ ఘటనలో టెంపోలో ప్రయాణిస్తున్న ఆరుగురు చనిపోగా.. మరో ఐదుగురు తీవ్రంగా గాయపడ్డారు. ఈ ప్రమాదంలో కారులో ప్రయాణిస్తున్నవారు చనిపోయారు. స్థానికులు పోలీసులకు సమాచారం అందించడంతో సంఘటనా స్థలానికి చేరుకొని క్షతగాత్రులను ఆసుపత్రికి తరలించారు. ఈ ఘటన పండుగ రోజు తీవ్ర విషాదాన్ని నింపింది. పోలీసులు కేసు నమోదు చేసి దర్యాప్తు చేస్తున్నారు.