రష్యా నుంచి కొనడం వల్లే పెట్రోల్, డీజిల్ ధరలు అదుపులో ఉన్నాయి: కేంద్రమంత్రి

ఉక్రెయిన్‌పై రష్యా సైనిక యుద్ధం వేళ.. పశ్చిమ దేశాలన్నీ రష్యాపై తీవ్ర ఆంక్షలు విధించాయి. ఈ నేపథ్యంలోనే భారత్ మాత్రం రష్యాతో సన్నిహితంగానే మెలిగింది. చాలా దేశాలు రష్యా నుంచి ఎగుమతులు, దిగుమతులు నిలిపివేశాయి. అలాంటి సమయంలో భారత్.. రష్యా నుంచి దిగుమతులు మాత్రం ఆపలేదు. మరీ ముఖ్యంగా చమురు దిగుమతి చేసుకుంది. ఇతర దేశాల ఆంక్షల వేళ.. రష్యా నుంచి భారీగా చమురు భారత్‌లోకి దిగుమతి అయింది. ఫలితంగా భారత్‌కు తక్కువ ధరకే చమురు లభించింది. ఈ క్రమంలోనే భారత్‌పై పలు దేశాలు తీవ్ర విమర్శలు గుప్పించారు. దీనిపై తాజాగా కేంద్ర పెట్రోలియం శాఖ మంత్రి హర్దీప్ సింగ్ పూరి స్పందించారు.

రష్యా నుంచి భారత్‌ చమురు కొనుగోలు చేసి ప్రపంచానికి మేలు చేసిందని హర్దీప్‌ సింగ్‌ పూరి స్పష్టం చేశారు. రష్యాపై పశ్చిమ దేశాల ఆంక్షలు విధించిన వేళ.. భారత్‌ చమురు కొనుగోలు చేయడంపై వచ్చిన విమర్శల వేళ కేంద్రమంత్రి కీలక వ్యాఖ్యలు చేశారు. రష్యా నుంచి భారత్ చమురు కొనుగోలు చేయకపోయి ఉంటే అంతర్జాతీయంగా చమురు ధరలు మరింత పెరిగేవని ట్విటర్‌ వేదికగా వెల్లడించారు.

రష్యా చమురును భారత్‌ కొని.. ప్రపంచ దేశాలకు మేలు చేసిందని.. ఒకవేళ భారత్ ఆ పని చేయకపోయి ఉంటే అంతర్జాతీయంగా ఇంధన ధరలు మరింత భారీగా పెరిగేవని చెప్పారు. బ్యారెల్‌ ముడి చమురు ధర 200 డాలర్లు అంటే భారత కరెన్సీలో రూ.16 వేలకు పైనే ఉండేదని తెలిపారు. రష్యా నుంచి చమురు దిగుమతులపై భారత్‌ ఎలాంటి ఆంక్షలు విధించలేదని పేర్కొన్నారు. కేవలం ధరల పరిమితి మాత్రమే ఉందని స్పష్టం చేశారు. దాన్ని భారతీయ సంస్థలు కూడా పాటిస్తున్నాయని వివరించారు. రష్యా నుంచి చమురు కొనుగోళ్ల కారణంగా భారత్‌పై ఆంక్షలు పడే అవకాశముందని కొందరు తప్పుడు సమాచారాన్ని వ్యాప్తి చేసినట్లు తెలిపారు. ఐరోపా, ఆసియాకు చెందిన చాలా దేశాలు రష్యా నుంచి భారీగా ముడి చమురు, డీజిల్‌, ఎల్‌ఎన్‌జీ, అరుదైన ఖనిజాలను కొనుగోలు చేసిన విషయాన్ని మర్చిపోకూడదని కేంద్రమంత్రి వెల్లడించారు.

ఇక ధరల పరంగా చూస్తే.. భారత చమురు సంస్థలకు ఎక్కడ లాభం వస్తుందో అక్కడి నుంచే ఇంధన కొనుగోళ్లు చేస్తామని ఈ సందర్భంగా మరోసారి హర్దీప్‌ సింగ్ పురి తేల్చి చెప్పారు. భారతీయులకు అందుబాటు ధరల్లో స్థిరంగా ఇంధన వనరులను అందించడమే ప్రభుత్వ ముఖ్య ఉద్దేశమని స్పష్టం చేశారు. అంతర్జాతీయంగా చమురు ధరలు పెరుగుతున్నప్పటికీ గత 3 ఏళ్లుగా దేశంలో ఇంధన ధరలు తగ్గుతున్న ఒకే ఒక్క దేశం భారత్ అని చెప్పారు.