పాటలో లారెన్స్ బిష్ణోయ్ పేరు.. సల్మాన్‌ ఖాన్‌ సహా రైటర్‌కు బెదిరింపులు

బాలీవుడ్ స్టార్ హీరో సల్మాన్ ఖాన్‌కు మరోసారి బెదిరింపులు రావడంతో ఆయన భద్రతపై ఆందోళన వ్యక్తమవుతోంది. ముంబయి ట్రాఫిక్ పోలీస్ కంట్రోల్ రూమ్‌కు గురువారం రాత్రి ఫోన్ చేసిన ఆగంతకులు.. ఓ పాటలో లారెన్స్ బిష్ణోయ్ పేరు ఉందని, సల్మాన్‌ ఖాన్‌తో పాటు రచయిత నెల రోజుల్లో తీవ్ర పరిణామాలు ఎదుర్కొక తప్పదని హెచ్చరించారు. ఇటీవల నెలల్లో వరుసగా సల్మాన్‌కు బెదిరింపులు రావడం కలకలం రేగుతోంది. ‘పాట రచయిత ఇకపై పాటలు రాయలేని పరిస్థితి ఏర్పడుతుంది... సల్మాన్‌ఖాన్‌కు ధైర్యం ఉంటే వారిని కాపాడాలి’ అని మెసేజ్ పంపారు.

లారెన్స్ బిష్ణోయ్, అతడి ముఠా సభ్యుల నుంచి సల్మాన్‌ ఖాన్‌కు బెదిరింపుల కొనసాగుతుండగానే ఈ మెసేజ్ రావడం కలకలం రేగుతోంది. రాజస్థాన్‌లోని జోధ్‌పూర్‌లో సల్మాన్ ఖాన్.. 19908లో కృష్ణ జింకను వేటాడటంతో బిష్ణోయ్ వర్గం ఆయనపై కేసు పెట్టింది. ఈ కేసులో సల్మాన్ జైలుకెళ్లి.. బెయిల్ మీద బయటకు వచ్చారు. ఈ క్రమంలోనే అదే వర్గానికి చెందిన లారెన్స్ బిష్ణోయ్ గ్యాంగ్ ఆయనను చంపుతామని బెదిరింపులకు పాల్పడుతోంది. ఈ ఏడాది ఏప్రిల్‌లో బాంద్రాలోని సల్మాన్ నివాసం వద్ద ఇద్దరు యువకులు కాల్పులు జరిపారు. గత నెలలో ఆయన స్నేహితుడు, మహారాష్ట్ర మాజీ మంత్రి బాబా సిద్దిఖీని బిష్ణోయ్ గ్యాంగ్ హత్యచేసింది.

ఈ హత్య తర్వాత సల్మాన్‌ను చంపుతామని ముంబయి పోలీసులకు పలు మెసేజ్‌లు వచ్చాయి. ఈ వ్యవహారంపై పోలీసులు కేసు నమోదుచేసి దర్యాప్తు చేపట్టి.. రెండు రోజుల కిందట కర్ణాటకలోని హవేరీకి చెందిన విక్రమ్ అనే యువకుడ్ని అరెస్ట్ చేశారు. కాగా, బాలీవుడ్ బాద్షా షారుక్ ఖాన్‌ను కూడా చంపుతామని ఆగంతకులు గురువారం ఉదయం పోలీసులకు ఫోన్ చేసి బెదిరింపులకు పాల్పడిన విషయం తెలిసిందే. బాంద్రా పోలీసులకు ఫోన్ చేసి రూ.50 లక్షలు డిమాండ్ చేశారు. ఆ ఫోన్ నెంబరు గురించి పోలీసులు ఆరా తీయడంతో రాయ్‌పూర్‌కు చెందిన ఫైజాన్ ఖాన్ అనే లాయర్ పేరుతో సిమ్ కొనుగోలు చేసినట్టు గుర్తించారు. అయితే, తన మొబైల్ చోరీకి గురైనట్టు నవంబరు 2న పోలీసులకు ఫైజాన్ ఫిర్యాదు చేశారు. దీని వెనుక కుట్ర ఉందని అతడు ఆరోపించాడు.