మోసం, దగా.. ఇప్పుడు ఆ బాండ్లను ఏం చేసుకోవాలి?

ఆంధ్రప్రదేశ్ ప్రభుత్వం సోమవారం బడ్జెట్ ప్రవేశపెట్టిన సంగతి తెలిసిందే. ఆర్థిక మంత్రి పయ్యావుల కేశవ్ 2024-2025 ఆర్థిక సంవత్సరానికి రూ. 2,94,427.25 కోట్లతో బడ్జెట్ ప్రవేశపెట్టారు. అయితే ఏపీ ప్రభుత్వం ప్రవేశపెట్టిన బడ్జెట్ మీద వైసీపీ విమర్శలు గుప్పిస్తోంది. బడ్జెట్ ద్వారా సీఎం నారా చంద్రబాబు నాయుడు మరోసారి ఏపీ ప్రజలను మోసం చేశారని వైసీపీ ఆరోపిస్తోంది. ఏపీ అసెంబ్లీ ఎన్నికల్లో చెప్పిన సూపర్ సిక్స్..సూపర్ చీట్స్‌గా మారిపోయిందంటూ మాజీ మంత్రి, వైసీపీ అధికార ప్రతినిధి రోజా విమర్శించారు. తొలి బడ్జెట్‌లోనే చంద్రబాబు మోసం బయటపడిందంటూ ఆర్కే రోజా ట్వీట్ చేశారు.

"19 ఏళ్ల నుంచి 59 ఏళ్ల మహిళలకు నెలకు 1500 చొప్పున ఏడాదికి 18,000 ఇస్తామని బడ్జెట్లో నిధులు ఇవ్వకపోవడం మోసం కాదా? ఎన్నికల్లో గెలవగానే ప్రతి నిరుద్యోగ యువతీ, యువకులకు నెలకి 3 వేలు నిరుద్యోగ భృతి ఇస్తామని ఒక్క రూపాయి కేటాయించకపోవడం దగా కాదా? ఎన్నికల్లో గెలవగానే మహిళలకి ఉచిత బస్ పథకం అమలు చేస్తామన్నారు.. ఇప్పుడు ఆ పథకానికి నిధులే ఇవ్వలేదు! మోసం కాదా? తల్లికి వందనం పథకానికి నిధులు సగానికిపైగా కోత పెట్టడం దగా కాదా?" అంటూ రోజా ప్రశ్నించారు.

"ఏడాదికి 3 గ్యాస్ సిలిండర్లు ఉచితంగా ఇస్తామని..ఈ ఏడాది 2 సిలిండర్లను ఎగనామం పెట్టడం మోసం కాదా? 50 ఏళ్లకే మహిళలకు పెన్షన్ ఇస్తాం అన్నారు.. ఏది ఈ బడ్జెట్లో ఆ ప్రస్తావన? రైతులకు 20 వేలు ఏడాది పెట్టుబడి సహాయం ఇస్తాం అన్నారు. 10 వేల కోట్లు ఇవ్వాల్సింది 4,500 కోట్లే ఇవ్వడం రైతులను మోసం చేయడం కాదా.? ఎన్నికల్లో ఓట్లెయించుకున్న సీఎం చంద్రబాబు, డిప్యూటీ సీఎం పవన్ కళ్యాణ్ ఇంటింటికి మీరిచ్చిన బాబు ష్యూరిటీ.. భవిష్యత్‌కి గ్యారంటీ..బాండ్లను ఇప్పుడు ఏం చేసుకోవాలి.. ఆ చెల్లని బాండ్లపై ఇప్పుడు ప్రజలు చీటింగ్ కేసులు పెట్టాలా.. సమాధానం చెప్పాలి" అంటూ రోజా డిమాండ్ చేశారు.

 మరోవైపు రాష్ట్రం ఆర్థికంగా కష్టాలలో ఉన్నప్పటికీ సూపర్ సిక్స్ హామీలను అమలు చేస్తామని ప్రభుత్వం చెప్తోంది. రాష్ట్ర ఆర్థిక వ్యవస్థను గాడిలో పెట్టేందుకు ప్రభుత్వం పనిచేస్తోందన్న మంత్రి కొలుసు పార్థసారథి.. ఎన్నికల్లో ఇచ్చిన మాట ప్రకారం అన్ని పథకాలను అమలు చేసేందుకు చర్యలు తీసుకుంటున్నామన్నారు. సూపర్ సిక్స్ హామీల్లో ఇప్పటికే ఉచిత గ్యాస్ సిలిండర్లు, పింఛన్ల పెంపు వంటి రెండు పథకాలను అమలు చేస్తున్నామన్న మంత్రి.. మరో రెండు పథకాల అమలు కోసం బడ్జెట్‌లో నిధులు కేటాయించినట్లు చెప్పారు.