జెట్ స్పీడ్‌తో భోగాపురం ఎయిర్‌పోర్టు పనులు.. అప్పటి నుంచే సేవలు

ఉత్తరాంధ్రవాసులకు సూపర్ న్యూస్.. భోగాపురం విమానాశ్రయం పనులు శరవేగంగా సాగుతున్నాయి. ఇదే వేగంతో కొనసాగితే ముందుగా అనుకున్న గడువు కంటే ఆరు నెలల ముందే పనులు పూర్తవుతాయని కేంద్ర పౌరవిమానయాన శాఖ మంత్రి కింజరాపు రామ్మోహన్ నాయుడు తెలిపారు. ఆదివారం సాయంత్రం విజయనగరం జిల్లాలోని భోగాపురం విమానాశ్రయం పనులను కేంద్ర మంత్రి పరిశీలించారు. విమానాశ్రయ సేవలను త్వరగా అందుబాటులోకి తేవాలనే ఉద్దేశంతో ప్రతి నెలా నిర్మాణ పనులను పరిశీలిస్తున్నట్లు రామ్మోహన్ నాయుడు చెప్పారు. అంతర్జాతీయ స్థాయి ప్రమాణాలతో నిర్మిస్తున్నామన్న కేంద్ర మంత్రి.. భోగాపురంలో అల్లూరి సీతారామరాజు ఎయిర్‌పోర్టు నిర్మాణం పూర్తైతే స్థానిక యువతకు ఉద్యోగ అవకాశాలు మెరుగవుతాయని అన్నారు. అలాగే చిరు వ్యాపారులకు మేలు జరుగుతుందని.. విజయనగరం, శ్రీకాకుళం, విశాఖపట్నం జిల్లాలు అభివృద్ధి చెందుతాయని చెప్పారు.

మరోవైపు కేంద్ర మంత్రి పర్యటన సందర్భంగా భోగాపురం విమానాశ్రయం పనుల పురోగతిని అధికారులు వివరించారు.టెర్మినల్, ఏటీసీ భవనాలు, ఇతర పనుల పురోగతిని వివరించారు. ఈ సందర్భంగా భోగాపురం ఎయిర్‌పోర్టు పనులు జెట్ స్పీడుతో జరుగుతున్నాయంటూ అధికారులను కేంద్ర మంత్రి అభినందించారు. పనుల వేగం చూస్తుంటే ఆరు నెలల ముందే భోగాపురం విమానాశ్రయం పూర్తి అవుతుందనే నమ్మకం కలుగుతోందని రామ్మోహన్ నాయుడు ఆనందం వ్యక్తం చేశారు. ఇప్పటి వరకూ ఎయిర్‌పోర్టు పనులు 49.07 శాతం పూర్తయ్యాయన్న మంత్రి.. 16 నెలల్లో భోగాపురం ఎయిర్ పోర్టు సేవలు అందుబాటులోకి వస్తాయని చెప్పారు. మట్టి పనులు 99.35 శాతం పూర్తి అయితే.. రన్‌వే నిర్మాణం 65.53 శాతం పూర్తైందన్నారు.

మరోవైపు అల్లూరి సీతారామరాజు విమానాశ్రయం అందుబాటులోకి వస్తే ఉత్తరాంధ్ర జిల్లాల ప్రగతి పథంలో దూసుకెళ్తామని కేంద్ర మంత్రి రామ్మోహన్ నాయుడు విశ్వాసం వ్యక్తం చేశారు. భోగాపురం విమానాశ్రయం నిర్మాణ పనులకు 2023 నవంబర్ 1న భూమి పూజ చేశారు. 2026 నాటికల్లా విమానాశ్రయం నిర్మాణం పూర్తి చేయాలని లక్ష్యంగా పెట్టుకున్నారు. ఇక తొలి దశలో భాగంగా 2203 ఎకరాల విస్తీర్ణంలో రూ.4,592 కోట్లతో పనులు మొదలెట్టారు. అయితే పనులకు భూమి పూజ చేసిన ఏడాదిలోపే సగం పనులు పూర్తి చేయడంతో.. గడువు కంటే ఆరు నెలల ముందే ఇక్కడి నుంచి విమాన సర్వీసులు మొదలయ్యే అవకాశాలు ఉన్నాయి.