ఇప్పుడు ఏం లాభం చెప్పమ్మా.. శ్రీరెడ్డిపై ఏపీ మంత్రి వ్యాఖ్యలు

గత ఐదేళ్లు సోషల్ మీడియా వేదికగా ఇష్టం వచ్చినట్లు పోస్టింగ్‌లు పెట్టి ఇప్పుడు సానుభూతి కోసం డ్రామాలు ఎందుకని ప్రశ్నించారు మంత్రి కొల్లు రవీంద్ర. గత ప్రభుత్వంలో ఆడవాళ్లపై సోషల్ మీడియాలో అసభ్య పోస్టులు పెట్టి తిట్టించారని మండిపడ్డారు. ఈ పోస్టులపై ఫిర్యాదు చేయడానికి వెళితే.. రివర్స్‌లో బాధితులపై కేసులు పెట్టించి పోలీసు వ్యవస్థను నాశనం చేశారన్నారు. వీరంతా ఇప్పుడు ఏదో జరిగిపోతుందని మాట్లాడుతున్నారని.. సోషల్ మీడియాలో పోస్ట్‌లు నీచంగా పెట్టినప్పుడు ఇవన్నీ తెలియవా అంటూ ప్రశ్నించారు.

రాష్ట్రంలో పోలీసులు సోషల్ మీడియాలో అసభ్యకరమైన పోస్టింగ్స్‌పై చర్యలు తీసుకుంటున్నారని.. వరుసగా ఇప్పుడు అరెస్టులతో ఒక్కొక్కరూ ఫ్యాంట్‌లు తడుపుకుంటున్నారన్నారు మంత్రి రవీంద్ర. శ్రీరెడ్టి ఇప్పుడు ఏడిస్తే ఏం‌ ప్రయోజనం ఉండదని.. ఆనాడు కన్ను మిన్ను తెలియకుండా పిచ్చి‌కూతలు కూశారని ఘాటు వ్యాఖ్యలు చేశారు. కార్యకర్తల్ని వదిలేసి.. ఇరు పార్టీల నేతల మధ్య ఏదైనా ఉంటే చూసుకోమని చెప్పడానికి సిగ్గు లేదా అంటూ మండిపడ్డారు. ఈ సోషల్ మీడియా పోస్టుల విషయంలో తప్పు చేసిన అందర్ని అరెస్టు చేయాలన్నారు. బందరులో ఒక వెధవ, సన్నాసి ఉన్నారని.. నోటికొచ్చిన విధంగా వాగి, తమపై అక్రమంగా కేసులు పెట్టి అరెస్టులు చేయించారని ఆగ్రహం వ్యక్తం చేశారు. ఇప్పుడు ఇంకా సిగ్గు లేకుండా వాగుతున్నారన్నారు. మరోసారి ఇలా నీచమైన భాష వాడకుండా కఠినంగా శిక్షించాలని హెచ్చరించారు.

గత వైఎస్సార్‌సీపీ ప్రభుత్వ హయాంలో.. సోషల్ మీడియాలో వేదికగా చంద్రబాబు, పవన్ కళ్యాణ్, లోకేష్‌లతో పాటుగా షర్మిల, వైఎస్ విజయమ్మపైనా నీచమైన పోస్టులు పెట్టారని మండిపడ్డారు ఆర్టీసీ ఛైర్మన్ కొనకళ్ల నారాయణ. సజ్జల భార్గవ రెడ్డి ఇలా అందరితో అసభ్యకరమైన పోస్టులు పెట్టించారని.. పోలీసు వ్యవస్థను దుర్వినియోగం చేయించిందే గత ప్రభుత్వమేనన్నారు. పోలీసులను అడ్డం పెట్టుకుని బాధితులపైనే అక్రమంగా కేసులు పెట్టారని.. ఇప్పుడు జగన్ పోలీసులపై విమర్శలు చేయడం విడ్డూరంగా ఉందన్నారు.

సోషల్ మీడియాలో రాజకీయాలతో సంబంధం లేని మహిళలపై కూడా పోస్టులు పెట్టారన్నారు నారాయణ. సోషల్ మీడియాలో రెచ్చిపోయి అసభ్యకరమైన పోస్టులు పెట్టిన వారిపై కచ్చితంగా చర్యలు ఉంటాయన్నారు. పోస్టులు పెట్టిన వారితో పాటుగా వారికి అండగా ఉన్న పోలీసులపై కూడా చర్యలు తప్పవన్నారు. ముంబై నటి జీవితాన్ని నాశనం చేశారని.. ముగ్గురు ఐపీఎస్ అధికారులు ప్రవర్తించిన తీరు దారుణమన్నారు. ముగ్గురు ఐపీఎస్‌లు ఒక అమ్మాయిని వేధించిన కేసులో సస్పెండ్ అయ్యారంటే ఎంత అవమానమని.. పోలీసులైనా, రాజకీయ నాయకులైనా తప్పు చేస్తే కఠినంగా శిక్షించాల్సిందే అన్నారు. ఏపీలో సోషల్ మీడియాలో అసభ్యకరమైన పోస్టులపై పోలీసులు చర్యలు తీసుకుంటున్న సంగతి తెలిసిందే.