ఎలాన్ మస్క్‌‌పై బూతులతో విరుచుకుపడిన బ్రెజిల్ ఫస్ట్ లేడీ.. వీడియో వైరల్

బిలియనీర్, టెస్లా చీఫ్ ఎలాన్‌ మస్క్‌పై బ్రెజిల్‌ అధ్యక్షుడి సతీమణి, ఆ దేశ ప్రథమ మహిళ జంజా లులా డి సిల్వా తీవ్ర పదజాలంతో విరుచుకుపడ్డారు. రాయడానికి వీల్లేని పదాలతో ఆయనపై విమర్శలు చేశారు. బ్రెజిల్‌లోని రియో డి జనీర్‌ వేదికగా సోమవారం (నవంబరు 18) నుంచి జరుగునున్న జీ20 శిఖరాగ్ర సదస్సు ప్రారంభానికి ముందు జరిగిన ఓ కార్యక్రమంలో పాల్గొన్న ఆమె.. ఎక్స్ (ట్విట్టర్) విషయంలో మస్క్‌ను విమర్శిస్తూ తన నోటికి పనిచెప్పారు. ప్రస్తుతం ఆమె మాట్లాడిన వీడియో సోషల్ మీడియాలో తెగ వెరల్ అవుతోంది. అధ్యక్షుడి భార్య, అందులోనూ ఓ మహిళ ఇంత దారుణంగా మాట్లాడటంపై విస్మయం వ్యక్తమవుతోంది.

జంజా లూలా డి సిల్వా మాట్లాడుతూ.. తప్పుడు సమాచార వ్యాప్తి నియంత్రణలో ఎక్స్ (ట్విట్టర్) పూర్తిగా విపలమైందని ఆరోపించారు. ఈ క్రమంలోనే తనను ఎవరూ ఆపలేరంటూ మస్క్‌ను అభ్యంతరకర పదజాలంతో దూషించారు. ఆమె మాట్లాడుతున్నప్పుడు ఓడ హారన్ మోగడంతో... ‘ఇది ఎలాన్ మస్క్ అని నేను అనుకుంటున్నాను’ అని చమత్కరంగా అన్నారు., ‘నేను మీకు భయపడను, ఎఫ్**కె యు.. ఎలాన్ మస్క్.’ అంటూ ఆమె బూతులు మాట్లాడిన ఆ వీడియో వైరల్‌గా మారింది.

కాగా, ఈ వీడియో స్పందించి మస్క్‌.. నవ్వుతున్న ఎమోజీని పెట్టారు. అయితే, వచ్చే ఎన్నికల్లో బ్రెజిల్‌ అధ్యక్షుడు లూయిజ్‌ ఇనాసియో లులా డి సిల్వా ఓడిపోతారని ఆయన జోస్యం చెప్పారు. కాగా, తమ దేశంలో తప్పుడు సమాచారాన్ని వ్యాప్తి చేస్తున్న పలు అకౌంట్‌లను తొలగించాలని గతంలో బ్రెజిల్ సుప్రీంకోర్టు న్యాయమూర్తి అలెగ్జాండర్‌ డె మోరాసే ఆదేశించారు. వీటిని ఎలాన్‌ మస్క్‌ పట్టించుకోకపోవడంతో ఆ దేశంలో దాదాపు నెల రోజుల పాటు ఎక్స్‌ సేవలను నిలిపివేశారు. ఈ నేపథ్యంలోనే కోర్టు ఆయనకు 5.2 మిలియన్‌ డాలర్ల (రూ.43కోట్లు) జరిమానాను సైతం విధించింది.

కాగా, ఇటీవల ముగిసిన అమెరికా ఎన్నికల్లో ట్రంప్ కోసం పనిచేసిన మస్క్.. కెనడా ఎన్నికలు, జర్మనీలో సంకీర్ణ ప్రభుత్వంపై జోస్యం చెప్పిన విషయం తెలిసిందే. వచ్చే ఎన్నికల్లో కెనడా ప్రధాని జస్టిస్ ట్రూడో ఓడిపోతారని, జర్మనీలో ష్కాల్జ్ ఓల్ఫా ప్రభుత్వం కూలిపోతుందని చెప్పారు.