మహిళలకు సర్కార్ గుడ్‌న్యూస్.. ఒక్కొక్కరి ఖాతాల్లోకి రూ.5వేలు జమ, చెక్ చేసుకోండి

కొన్ని నెలల క్రితం జరిగిన ఒడిశా అసెంబ్లీ ఎన్నికల్లో రెండున్నర దశాబ్దాలుగా అధికారంలో ఉన్న నవీన్ పట్నాయక్ నేతృత్వంలోని బిజు జనతా దళ్ పార్టీని మట్టికరిపించి.. బీజేపీ అధికారంలోకి వచ్చింది. ఈ నేపథ్యంలోనే ముఖ్యమంత్రిగా మోహన్ మాఝీ అధికారాన్ని చేపట్టారు. ఈ క్రమంలోనే అసెంబ్లీ ఎన్నికల వేళ ఇచ్చిన హామీ ప్రకారం.. మహిళలు స్వయం సమృద్ధి సాధించేందుకు ఒక పథకాన్ని ప్రవేశపెట్టింది. సుభద్ర యోజన పేరుతో తీసుకువచ్చిన ఈ పథకాన్ని ప్రధానమంత్రి నరేంద్ర మోదీ పుట్టిన రోజు సందర్భంగా ఈ ఏడాది సెప్టెంబర్ 17వ తేదీన ఒడిశా ప్రభుత్వం ప్రారంభించింది. ఈ నేపథ్యంలోనే తాజాగా ఈ పథకానికి సంబంధించి మూడో ఫేజ్‌ తొలి ఇన్‌స్టాల్‌మెంట్ కింద 20 లక్షలకు పైగా మహిళల ఖాతాల్లోకి ముఖ్యమంత్రి నిధులు జమ చేశారు.

ఆదివారం ఒడిశాలోని సుందర్‌గర్ జిల్లాలో వివిధ అభివృద్ధి ప్రాజెక్టుల ప్రారంభోత్సవానికి వెళ్లిన సీఎం మోహన్ మాఝీ.. సుభద్ర యోజన నిధులను విడుదల చేశారు. ఈ సందర్భంగా ఈ పథకం ప్రారంభించినప్పటి నుంచి ఇప్పటివరకు 80 లక్షల మందికి పైగా మహిళలకు సుభద్ర యోజన నిధులు విడుదల చేసినట్లు తెలిపారు. ఈ సుభద్ర యోజనకు ఇప్పటికే రూ.1000 కోట్లకుపైగా నిధులు కేటాయించినట్లు వెల్లడించారు. మహిళా సాధికారత కోసమే ఈ సుభద్ర యోజన పథకాన్ని తీసుకువచ్చినట్లు స్పష్టం చేశారు. ఈ డిసెంబర్‌లోగా కోటి మందికిపైగా లబ్ధిదారులకు సుభద్ర యోజన నిధులు అందిస్తామని హామీ ఇచ్చారు.

ఇక ఈ సుభద్ర యోజన ఒడిశా రాష్ట్రంలోనే అతిపెద్ద ప్రజా సంక్షేమ పథకం అని సీఎం మోహన్ మాఝీ స్పష్టం చేశారు. ఒడిశాలో గతంలో ఉన్న నవీన్ పట్నాయక్ సర్కార్.. మిషన్ శక్తి పేరుతో తీసుకువచ్చిన పథకంలో వడ్డీ లేని రుణాలు ఇచ్చేదని.. అయితే ఈ సుభద్ర యోజన పథకం మాత్రం నేరుగా రాష్ట్రంలోని మహిళలకు ఆర్థిక సహాయాన్ని అందిస్తుందని సీఎం తెలిపారు. సుందర్‌గర్ జిల్లాలో 4.59 లక్షలకు పైగా మహిళలు ఈ సుభద్ర యోజనలో రిజిస్టర్ చేసుకున్నారని.. అయితే వారిలో 3.37 లక్షలకుపైగా మహిళలు.. ఈ విడతలో ఆర్థిక సహాయం అందుకున్నారని తెలిపారు.

సుభద్ర యోజన లబ్ధిదారులు subhadra.odisha.gov.in వెబ్‌సైట్‌లోకి వెళ్లి.. Beneficiary List ఆప్షన్‌ను సెలెక్ట్ చేసుకోవాలి. అందులో జిల్లా, మండలం, గ్రామం, వార్డును ఎంచుకోవాలి. అక్కడ సుభద్ర యోజన పథకానికి అర్హులైన వారిని అధికారులు గుర్తించి.. లబ్ధిదారులతో కూడిన లిస్ట్‌ను ఉంచుతారు. అందులో పేరు ఉన్న మహిళలకు నేరుగా బ్యాంక్ అకౌంట్లలోకే డబ్బులు జమ అవుతాయి. ఇక ఈ సుభద్ర యోజన పథకానికి దరఖాస్తు చేసుకునేవారు.. subhadra.odisha.gov.in వెబ్‌సైట్‌లోకి వెళ్లి సంబంధిత పత్రాలు సమర్పించాలని అధికారులు తెలిపారు.