మాట నిలబెట్టుకున్న చంద్రబాబు, పవన్ కళ్యాణ్.. మరో రూ.988కోట్లు అకౌంట్లలో జమ

ఆంధ్రప్రదేశ్ ప్రభుత్వం పంచాయతీలకు మరోసారి తీపికబురు చెప్పింది. వరుసగా నిధులు విడుదల చేస్తోంది. రాష్ట్రవ్యాప్తంగా గ్రామీణ స్థానిక సంస్థలకు ప్రభుత్వం 4 నెలల వ్యవధిలో రూ.1,987.38 కోట్ల ఆర్థిక సంఘం నిధులు విడుదల చేసిన సంగతి తెలిసిందే. ఇప్పటికే ఆగస్టులో రూ.998.62 కోట్లు విడుదల చేయగా.. తాజాగా మరో రూ.988.76 కోట్లు పంచాయతీలు, జిల్లా, మండల పరిషత్తుల బ్యాంకు అకౌంట్‌లకు జమ చేసింది.

కేంద్రం స్థానిక సంస్థలకు ఇచ్చిన 15వ ఆర్థిక సంఘం నిధులను గత ప్రభుత్వం ఇతర అవసరాలకు మళ్లించిందనే విమర్శలు వచ్చాయి. ఈ అంశంపై సర్పంచులు నిరసనలు తెలిపారు. అయితే ఎన్నికల సమయంలో కూటమి.. తమ ప్రభుత్వం అధికారంలోకి వస్తే ఆ నిధులు స్థానిక సంస్థలకే ఇస్తామని హామీ ఇచ్చింది. ఈ మేరకు నిధులు వరుసగా విడుదల చేస్తున్నారు.. దీంతో గత ఐదేళ్లలో ఆర్థికంగా తీవ్ర ఇబ్బందుల్లోకి వెళ్లిన పంచాయతీలు ఊపిరి పీల్చుకున్నాయి. నాలుగు నెలల్లో విడుదల చేసిన రూ.1,987.38 కోట్లలో పంచాయతీలకు 70%, జిల్లా, మండల పరిషత్తులకు చెరో 15% చొప్పున కేటాయించారు. పంచాయతీలు, జిల్లా, మండల పరిషత్తులకు ఈ నిధులకు ఇబ్బందులు లేకుండా పోయాయి.

మరోవైపు బుడమేరు వరద బాధితుల కోసం ముఖ్యమంత్రి సహాయనిధికి రూ.3.20 కోట్లు విరాళంగా ఇవ్వాలని రేషన్‌ డీలర్ల సంఘం నిర్ణయం తీసుకుంది. ఈ మేరకు నవంబరు కమీషన్‌ నుంచి డీలర్లు 15% ఇచ్చేలా నాలుగు సంఘాలు ఏకగ్రీవంగా నిర్ణయించినట్లు చౌకధరల దుకాణాల సంక్షేమ సంఘం గౌరవాధ్యక్షుడు వెంకటేశ్వరరావు, రాష్ట్ర అధ్యక్షుడు వెంకటరావు, కార్యదర్శి చిట్టిరాజు, కోశాధికారి రమేష్‌ ఒక ప్రకటనలో తెలియజేశారు.

డిసెంబరు 14న విజయవాడలో ఎన్టీఆర్‌ లిటరేచర్, వెబ్‌సైట్‌ కమిటీ ఆధ్వర్యంలో ఎన్టీఆర్‌ సినీ వజ్రోత్సవం నిర్వహించనున్నట్టు కమిటీ ఛైర్మన్‌ టీడీ జనార్దన్‌ తెలిపారు. ఈ వేడుకలకు ముఖ్యఅతిథిగా ఆంధ్రప్రదేశ్ ముఖ్యమంత్రి నారా చంద్రబాబు నాయుడు, విశిష్ట అతిథిగా మాజీ ఉపరాష్ట్రపతి వెంకయ్యనాయుడు హాజరవుతారని చెప్పారు. ఈ కార్యక్రమాన్ని ముందుగా నవంబరు 24న నిర్వహించాలనుకున్నా అనివార్య కారణాలతో వాయిదా వేసినట్టు టీడీ జనార్ధన్ అన్నారు.