పశ్చిమాసియా ఊపిరి పీల్చుకునే వార్త.. కాల్పుల విరమణకు నెతన్యాహు గ్రీన్ సిగ్నల్

హెజ్బొల్లా‌తో కాల్పుల విరమణకు ఇజ్రాయేల్‌ ప్రధాని బెంజమిన్‌ నెతన్యాహు సూత్రప్రాయ అంగీకరించారు. కొలిక్కిరాని కొన్ని అంశాలపై చర్చలు ఇంకా కొనసాగుతున్నాయని, ఒప్పందాన్ని ఇజ్రాయేల్‌ క్యాబినెట్‌ మంగళవారం ఆమోదించే అవకాశం ఉందని అధికార వర్గాలు వెల్లడించాయి. అటు, అమెరికాలోని ఇజ్రాయేల్ రాయబారి మైక్ హెర్‌జోగ్ సైతం దీనిపై స్పందించారు. కొద్దిరోజుల్లోనే కాల్పుల విరమణ ఒప్పందం ఖరారు కాబోతుందని ‘ఇజ్రాయెల్‌ ఆర్మీ రేడియో’కు తెలిపారు. కాల్పుల విరమణ ఒప్పందం కోసం ఇజ్రాయేల్‌పై అమెరికా, ఐరోపా సమాఖ్య, ఐక్యరాజ్యసమితి గత కొద్ది రోజుల నుంచి వత్తిడి తీసుకొస్తున్న విషయం తెలిసిందే.

గాజాపై నెతన్యాహు వ్యవహరించిన తీరుకు నిరసనగా ఇజ్రాయేల్ యుద్ధ క్యాబినెట్‌ నుంచి జూన్‌లో వైదొలగిన బెన్నీ గాంట్జ్.. కాల్పుల విరమణ ఒప్పంద వివరాలను బహిర్గత పరచాలని ప్రధానిని కోరారు. ‘నెతన్యాహూ, ఒప్పంద వివరాలను బయటపెట్టాలి.. యోధులు, ఇజ్రాయేల్ పౌరులలకు దీని గురించి తెలుసుకోవడం హక్కు’ అని ఆయన ట్వీట్ చేశారు. విశ్వసనీయ వర్గాల ప్రకారం.. లెబనాన్ భూభాగం నుంచి ఇజ్రాయేల్ దళాలను వెనక్కి రప్పించి, రెండు నెలల పాటు కాల్పుల విరమణకు అంగీకరించినట్టు తెలుస్తోంది. అటు, హెజ్బొల్లా సైతం ఇజ్రాయేల్ సరిహద్దుల్లో లిటానీ నది దక్షిణ తీరం నుంచి తన సాయుధులను కూడా ఉపసంహరించనుంది.

గాజా యుద్ధంలో సంధి కోసం ప్రయత్నం చేస్తోన్న అమెరికా.. కాల్పుల విరమణ అవకాశాలపై ఆశాభావం వ్యక్తం చేసింది. ‘మనం కాల్పుల విరమణ స్థితికి చేరుకున్నామని మేము విశ్వసిస్తున్నాం’ అమెరికా జాతీయ భద్రతా మండలి ప్రతినిధి జాన్ కిర్బీ అన్నారు. మరోవైపు, ఇజ్రాయేల్-హమాస్ మధ్య కాల్పుల విరమణ చర్చల్లో కీలక భాగస్వామిగా ఉన్న ఖతార్ ఇటీవలే వైదొలగింది. అంతేకాదు, దోహాలోని హమాస్ రాజకీయ కార్యాలయం మనుగడ ఎక్కువ కాలం సాగదని హెచ్చరించింది.

మరోవైపు, నెతన్యాహుకు మరణశిక్ష విధించాలని ఇరాన్‌ సుప్రీం నేత అయతుల్లా అలీ ఖమేనీ డిమాండ్‌ చేశారు. గాజాస్ట్రిప్‌, లెబనాన్‌లో ప్రస్తుతం కొనసాగుతున్న యుద్ధాల్లో ఆయన పాత్రకు గానూ ఈ శిక్ష విధించాల్సిందేనని అన్నారు. ‘ఇరాన్‌ పారామిలిటరీ రివల్యూషనరీ గార్డ్‌’ స్వచ్ఛంద విభాగం బాసిజ్‌తో సోమవారం ఆయన మాట్లాడుతూ ఈ వ్యాఖ్యలు చేశారు. నెతన్యాహుకు అరెస్టు వారంటు జారీపై అంతర్జాతీయ నేర న్యాయస్థానం తీసుకున్న నిర్ణయాన్ని ఖమేనీ ప్రస్తావించారు. ఈ వారంటు ఒక్కటే సరిపోదని, నెతన్యాహు, ఇతర క్రిమినల్‌ నేతలకు మరణదండన విధించాల్సిందేనని కోరారు. ఇక, లెబనాన్‌లో గతేడాది అక్టోబరు నుంచి హెజ్బొల్లా లక్ష్యంగా ఇజ్రాయేల్ జరిపిన దాడుల్లో 3,700 మంది ప్రాణాలు కోల్పోయారు.