రఘురామపై కస్టోడియల్ టార్చర్ కేసు.. రిటైర్డ్ అడిషనల్ ఎస్పీ విజయ్ పాల్ అరెస్ట్
Andhra Pradesh Telugu | Suryaa Desk | Published : Wed, Nov 27, 2024, 07:46 PM
మాజీ ఎంపీ, ప్రస్తుత ఏపీ శాసనసభ డిప్యూటీ స్పీకర్ రఘురామ కృష్ణరాజును వైసీపీ ప్రభుత్వ హయాంలో అరెస్ట్ చేసి చిత్రహింసలకు గురిచేసిన కేసులో సీఐడీ రిటైర్డ్ అడిషనల్ ఎస్పీ విజయ్‌పాల్‌ను పోలీసులు మంగళవారం రాత్రి అరెస్టు చేశారు. ఈ కేసులో ఆయన బెయిల్‌ పిటిషన్‌ను సుప్రీంకోర్టు సోమవారం కొట్టేసింది. దీంతో విచారణకు మంగళవారం హాజరుకావాలని విజయ్‌పాల్‌కు దర్యాప్తు అధికారి, ప్రకాశం జిల్లా ఎస్పీ ఏఆర్‌ దామోదర్‌ నోటీసులు జారీచేశారు. ఈ నేపథ్యంలోనే ఉదయం 10 గంటల 45 నిమిషాలకు ఆయన జిల్లా పోలీసు కార్యాలయానికి వచ్చారు. ఈ కేసును గతంలో గుంటూరులో విచారించిన దర్యాప్తు బృందం అప్పటికే ఒంగోలుకు వచ్చింది. వీరంతా జిల్లా ఎస్పీతో సమావేశమై చర్చించిన అనంతరం సాయంత్రం 4 గంటల నుంచి విజయ్‌పాల్‌ను విచారించారు. విజయ్‌పాల్‌ నుంచి సరైన సమాధానాలు రాకపోవడంతో విచారణకు సహకరించడం లేదని దర్యాప్తు అధికారి నిర్ధారణకు వచ్చారు. దీంతో ఆయన్ని రాత్రి 9 గంటల సమయంలో అరెస్ట్ చేసి ఒంగోలు రూరల్ పోలీస్‌స్టేషన్‌కు తరలించారు.
|
|