విశాఖ టీసీఎస్ క్యాంపస్‌ ఏర్పాటుపై కీలక అడుగు.. స్థలం కేటాయింపు

ఆంధ్రప్రదేశ్‌లోని యువతకు శుభవార్త. విశాఖపట్నంలో టీసీఎస్ క్యాంపస్ ఏర్పాటుకు వేగంగా అడుగులు పడుతున్నాయి. వందరోజుల్లోనే విశాఖపట్నంలో టీసీఎస్‌ కార్యకలాపాలు ప్రారంభం అయ్యేలా చూస్తామంటూ మంత్రి నారా లోకేష్ అప్పట్లో ప్రకటించారు. ఈ మాట ప్రకారమే ప్రభుత్వం అడుగులు వస్తోంది. విశాఖపట్నంలో టీసీఎస్ కార్యకలాపాలు ప్రారంభించేందుకు ఆంధ్రప్రదేశ్ ప్రభుత్వం అనుమతి ఇచ్చింది. గతంలో డల్లాస్ టెక్నాలజీ సెంటర్‌గా ఉన్న ఎల్‌ఎల్‌పీ ప్రాంగణాన్ని టీసీఎస్‌ క్యాంపస్‌కు కేటాయిస్తూ ఆంధ్రప్రదేశ్ ప్రభుత్వం నిర్ణయం తీసుకుంది. ఈ మేరకు.. లీజ్‌కు ఇచ్చేందుకు అనుమతిస్తూ ఉత్తర్వులు జారీ చేసింది. ఎలాంటి అదనపు ఫీజు లేకుండా సబ్ లీజుకు ఇచ్చినట్లు తెలిసింది.

మరోవైపు విశాఖపట్నం ఐటీ హిల్స్‌లో 7 వేల చదరపు మీటర్ల స్థలాన్ని గతంలో డల్లాస్ కంపెనీకి కేటాయించారు. అయితే ఇప్పుడు దీనిని టీసీఎస్‌కు కేటాయించారు. ఇక్కడ ఉన్న మూడంతస్తుల భవనంలో 1400 మంది వరకూ పనిచేసేందుకు అవకాశం ఉంది. ఇక తొలి దశలో 2 వేలమందితో కార్యకలాపాలు ప్రారంభిస్తామని టీసీఎస్ చెప్పిన సంగతి తెలిసిందే. ఈ నేపథ్యంలోనే ఐటీ హిల్స్‌లోని డల్లాస్ టెక్నాలజీ సెంటర్‌ను ప్రభుత్వం కేటాయించింది. అలాగే అదనపు నిర్మాణాలు చేపట్టేందుకు వీలుగా మరో 1600 చదరపు మీటర్ల స్థలం కేటాయించారు.

మరోవైపు అక్టోబర్ నెలలో ఏపీ ఐటీశాఖ మంత్రి నారా లోకేష్.. టాటా గ్రూప్ సంస్థల ఛైర్మన్ నటరాజన్ చంద్రశేఖరన్‌తో భేటీ అయ్యారు. అనంతరం విశాఖపట్నంలో టాటా గ్రూప్ పెట్టుబడి పెట్టనున్నట్లు నారా లోకేష్ ప్రకటించారు. విశాఖపట్నంలో టీసీఎస్ క్యాంపస్ ఏర్పాటు చేయనున్నట్లు నారా లోకేష్‌తో పాటుగా నటరాజన్ చంద్రశేఖరన్ సైతం ప్రకటించారు. టీసీఎస్ ఏర్పాటు ద్వారా పదివేల మందికి ఉపాధి కల్పిస్తామని చెప్పారు. ఆ తర్వాత టీసీఎస్ ఏర్పాటుపై ప్రభుత్వం.. టాటా గ్రూప్ మధ్య పలు సార్లు చర్చలు జరిగాయి. ఇదే సమయంలో వంద రోజుల్లోనే టీసీఎస్ కార్యకలాపాలు మొదలయ్యేలా చూస్తామంటూ నారా లోకేష్ ప్రకటించారు. లోకేష్ చెప్పిన విధంగానే టీసీఎస్ కార్యకలాపాలు ప్రారంభించేందుకు అనుమతి ఇవ్వటంతో పాటుగా.. స్థలం కేటాయిస్తూ ఏపీ ప్రభుత్వం నిర్ణయం తీసుకుంది.