టీటీడీకి భారీ విరాళం.. కళ్లు చెదిరే మొత్తం అందించిన ముంబై సంస్థ

తిరుమల తిరుపతి దేవస్థానం బోర్డుకు (టీటీడీ) మరో భారీ విరాళం అందింది. ముంబైకి చెందిన జీన్ అండ్ బొమాని ఎ దుబాష్ ఛారిటీ ట్రస్ట్ భారీ విరాళం అందించింది. టీటీడీలోని శ్రీ బాలాజీ ఆరోగ్య వరప్రసాదిని స్కీమ్‌కు జీన్ అండ్ బొమానీ ఛారిటీ ట్రస్టు రూ.50 లక్షలు విరాళంగా అందజేసింది. తిరుపతిలోని టీటీడీ పరిపాలనా భవనంలోని శనివారం టీటీడీ ఈవో శ్యామలరావును కలిసిన ట్రస్టు ప్రతినిధి చంద్రశేఖర్.. రూ.50 లక్షల విరాళం తాలూకు చెక్కును టీటీడీ ఈవోకు అందించారు. ఈ ట్రస్టు ఇప్పటికే స్విమ్స్‌కు ఏడుకోట్ల వరకూ విరాళంగా అందించినట్లు టీటీడీ వర్గాలు వెల్లడించాయి. ఈ మేరకు ఓ ప్రకటన విడుదల చేశాయి.

తిరుచానూరు పద్మావతి అమ్మవారి బ్రహ్మోత్సవాలు

మరోవైపు తిరుచానూరు శ్రీపద్మావతి అమ్మవారి కార్తీక బ్రహ్మోత్సవాలు ఘనంగా జరుగుతున్నాయి. బ్రహ్మోత్సవాల్లో భాగంగా మూడో రోజైన శనివారం రాత్రి పద్మావతి అమ్మవారు.. సింహ వాహనంపై యోగ నరసింహుడు అలంకారంలో భక్తులకు దర్శనమిచ్చారు. తుపాను కారణంగా తిరుపతిలో వర్షం కురుస్తున్న నేపథ్యంలో వాహన మండపంలో భక్తులు అమ్మవారిని సేవించుకున్నారు. ఈ కార్యక్రమంలో తిరుమ పెద్దజీయర్‌స్వామి, చినజీయర్‌స్వామి, టీటీడీ ఈవో శ్యామలరావు, టీటీడీ అదనపు ఈవో వెంకయ్య చౌదరి సహా ఇతర అధికారులు పాల్గొన్నారు.

మరోవైపు బ్రహ్మాత్సవాల్లో భాగంగా ఏర్పాటు చేసిన సాంస్కృతిక కార్యక్రమాలు భక్తులను అలరిస్తున్నాయి. టీటీడీ హిందూ ధార్మిక ప్రాజెక్టుల ఆధ్వర్యంలో శనివారం ఆధ్యాత్మిక, ధార్మిక, సాంస్కృతిక కార్యక్రమాలు నిర్వహించారు. తిరుచానూరు ఆస్థానమండపంలో ఉదయం ఎస్వీ సంగీత నృత్య కళాశాల ఆధ్వర్యంలో మంగళధ్వని, ఎస్వీ ఉన్నత వేద అధ్యయన సంస్థ పండితులచేత చతుర్వేద పారాయణం నిర్వహించారు. అలాగే ధార్మికోపన్యాసాలు, భక్తి సంగీత కార్యక్రమాలు నిర్వహించారు. ఇక మధ్యాహ్నం తిరుపతికి చెందిన శ్రీమతి విజయ కుమారి బృందం హరికథ పారాయణం చేశారు. సాయంత్రం అన్నమయ్య విన్నపాలు, అన్నమయ్య సంకీర్తన‌ల‌ను గానం చేశారు.

తిరుపతిలోని మహతి కళాక్షేత్రంలో సాయంత్రం భక్త రంజని, కూచిపూడి నృత్యం, అన్నమాచార్య కళామందిరంలో భరత నాట్యం ప్రదర్శించారు. తిరుచానూరు రోడ్డులోని శిల్పారామం లయ విన్యాసం, భరతనాట్యం ప్రదర్శన కార్యక్రమం నిర్వహించారు. ఈ ధార్మిక, ఆధ్యాత్మిక, సాంస్కృతిక కార్యక్రమాలు భక్తులను విశేషంగా అలరించాయి.