తీరాన్ని తాకిన తుపాను.. ఆ జిల్లాలకు ఏపీ విపత్తుల నిర్వహణ సంస్థ హెచ్చరిక

నైరుతి బంగాళాఖాతంలో ఏర్పడిన ఫెంగల్ తుపాను తీరాన్ని తాకింది. గడిచిన 6 గంటల్లో గంటకు 7 కిలోమీటర్ల వేగంతో కదిలిన ఫెంగల్ తుపాను పుదుచ్చేరి సమీపంలో తీరాన్ని తాకినట్లు ఏపీ విపత్తుల నిర్వహణ సంస్థ వెల్లడించింది. పూర్తిగా తీరాన్ని దాటేందుకు మరి కాస్త సమయం పడుతుందని ఏపీ విపత్తుల నిర్వహణ సంస్థ ఎండీ రోణంకి కూర్మనాథ్ తెలిపారు. శనివారం సాయంత్రం ఆరు గంటల సమయానికి ఫెంగల్ తుపాను మహాబలిపురంకి 50 కి.మీ, పుదుచ్చేరికి 80 కి.మీ, చెన్నైకి 90 కి.మీ దూరంలో కేంద్రీకృతమై ఉంది. అనంతరం నెమ్మదిగా కదులుతూ పుదుచ్చేరి సమీపంలో తీరాన్ని తాకింది. రాత్రి 11 గంటల 30 నిమిషాలకు తుపాను తీవ్ర వాయుగుండం బలహీనపడే అవకాశం ఉందని విపత్తు నిర్వహణ సంస్థ తెలిపింది.

మరోవైపు తుపాను తీరం దాటనున్న నేపథ్యంలో కొన్ని జిల్లాలలో ఆకస్మిక వరదలు వచ్చే అవకాశం ఉందని ఏపీ విపత్తుల నిర్వహణ సంస్థ హెచ్చరించింది. తుపాను ప్రభావంతో దక్షిణకోస్తా, రాయలసీమలో కొన్నిచోట్ల ఆదివారం భారీ వర్షాలు కురిసే అవకాశం ఉందని తెలిపింది. మరోవైపు నెల్లూరు, చిత్తూరు, కడప జిల్లాల్లో ఇప్పటికే భారీ వర్షాలు కురుస్తున్నాయి. ఈ నేపథ్యంలో లోతట్టు ప్రాంత ప్రజలు అప్రమత్తంగా ఉండాలని ఏపీ విపత్తుల నిర్వహణ సంస్థ ఎండీ రోణంకి కూర్మనాథ్ హెచ్చరించారు. తుపాను తీరం దాటనున్న సమయంలో.. తీరం వెంబడి 70 నుంచి 90 కిలోమీటర్ల వేగంతో బలమైన ఈదురుగాలులు వీస్తాయని.. జాగ్రత్తలు తీసుకోవాలని సూచించారు.

మరోవైపు ఫెంగల్ తుఫాను నేపథ్యంలో ఇప్పటికే తమిళనాడు, పుదుచ్ఛేరిలో భారీ వానలు పడుతున్నాయి. చెన్నై విమానాశ్రయాన్ని తాత్కాలికంగా మూసివేయగా.. పలు విమానాలను కూడా రద్దు చేశారు. అటు తుపాను ప్రభావంతో తిరుపతిలోనూ వర్షాలు పడుతున్నాయి. దీంతో హైదరాబాద్ నుంచి తిరుపతి వెళ్లాల్సిన విమానాలను కూడా అధికారులు రద్దు చేశారు.

అలాగే తిరుమలలోనూ వర్షం కురుస్తోంది. ఓ వైపు వర్షం.. మరోవైపు వణికిస్తున్న చలితో శ్రీవారి దర్శనానికి వస్తున్న భక్తులు ఇబ్బందులు పడుతున్నారు. చలి పెరుగుతూ ఉండటంతో భక్తులకు టీటీడీ వేడి పాలు అందిస్తోంది. శ్రీవారి దర్శనానికి ఇబ్బందులు లేకుండా చర్యలు తీసుకుంటోంది