బెంగళూరు ట్రాఫిక్ కష్టాలకు చెక్.. ఈ రూల్స్ పాటిస్తే చాలు, నో టెన్షన్

బెంగళూరు పేరు చెబితేనే మొట్టమొదటగా గుర్తుకు వచ్చేది అక్కడ ఉండే ట్రాఫిక్. బెంగళూరు నగరంలో కిలోమీటర్ దూరం ప్రయాణించాలంటేనే గంటల తరబడి ట్రాఫిక్‌లో వాహనాల మధ్య గడపాల్సిందే. ఇక ఇలా బెంగళూరు ట్రాఫిక్‌లో మహిళలు కూరగాయలు కట్ చేయడం, కొందరు ల్యాప్‌టాప్‌లు పట్టుకుని వర్క్ చేసుకోవడం, బస్సు డ్రైవర్ బస్సులోనే భోజనం చేయడం.. ఇలా రకరకలా సంఘటనలు కనిపిస్తూనే ఉన్నాయి. ఈ నేపథ్యంలోనే బెంగళూరు నగరం ట్రాఫిక్‌ నుంచి బయటపడేందుకు ఓ నెటిజన్ చేసిన ట్వీట్ అందర్నీ ఆసక్తికరంగా చూసేలా చేస్తోంది. బెంగళూరులో ట్రాఫిక్‌ లేకుండా చేసేందుకు అనుసరించాల్సిన కొన్ని సూచనలు, సలహాలు ఈ ట్వీట్‌లో ఉండటంతో ఆ ట్వీట్ కాస్తా ఇప్పుడు తెగ వైరల్‌గా మారింది.

సిలికాన్ వ్యాలీ ఆఫ్ ఇండియా అని పిలుచుకునే బెంగళూరు నగరంలో ట్రాఫిక్ రద్దీని నియంత్రించేందుకు "కర్ణాటక వెదర్" అనే ట్విటర్ అకౌంట్ సూచించిన కొన్ని సూచనలు పాటిస్తే 5 ఏళ్లలో బెంగళూరు ట్రాఫిక్ కష్టాలు తీరుతాయని పేర్కొంది. అయితే ఈ ట్వీట్‌లో ఎన్నో ఆసక్తికరమైన విషయాలను తెలపడం గమనార్హం. ఇప్పుడే బెంగళూరు పరిస్థితి ఇలా ఉంటే.. భవిష్యత్‌లో ఇంకెంత దారుణంగా ఉంటుందో అని తీవ్ర ఆందోళన నెలకొంది. బెంగళూరు నగరంలో 1.40 కోట్ల మంది జనాలు ఉండగా.. 1.05 కోట్ల ప్రైవేటు వాహనాలు ఉన్నాయని ఇందులో "కర్ణాటక వెదర్" తెలిపింది. ఇక గత నెలలోనే దాదాపు 70వేల ప్రైవేటు వాహనాలు రోడ్లపైకి ఎక్కినట్లు వెల్లడించింది. ఇక బెంగళూరు ట్రాఫిక్‌లో 87.6 శాతం ఈ ప్రైవేటు వాహనాలు ఉంటున్నాయని పేర్కొంది.

ఈ నేపథ్యంలోనే వచ్చే ఐదేళ్లలో తీసుకోవాల్సిన ప్రధానమైన చర్యలను కొన్ని పాయింట్ల రూపంలో "కర్ణాటక వెదర్" తెలిపింది.

బెంగళూరు జనాభాలో ప్రస్తుతం 10 శాతం మంది మాత్రమే ప్రజా రవాణా వ్యవస్థను వినియోగిస్తున్నారని.. అయితే ఈ సంఖ్యను 70 శాతానికి పెంచాలని తెలిపింది.

ఆర్టీసీ బస్సు, మెట్రో రైలు, సైకిల్‌ రైడ్‌ వంటి వివిధ రకాల ప్రయాణాలను ప్రోత్సహించాలని పేర్కొంది.

రోడ్లపై ఆక్రమణలు తొలగించి వాహనాలు, పాదచారులు ప్రయాణించేందుకు అనువుగా మార్చాలని తెలిపింది.

ఇక బెంగళూరులో ప్రభుత్వ ఆధ్వర్యంలో నడిచే బస్సుల సంఖ్య పెంచాలని.. పెద్ద బస్సులతో పాటు మినీ బస్సులు కూడా అవసరమని సూచించింది. నివాస ప్రాంతాల నుంచి మెట్రో రైలు, పెద్ద బస్సులకు అనుసంధానంగా ఈ మినీ బస్సులను నడపాలని పేర్కొంది.

ఇక బెంగళూరు నగరంలోని అన్ని ప్రాంతాలను కవర్‌ చేస్తూ, ఎక్కువ మంది ప్రయాణించేలా మెట్రో రైలు పరిధిని విస్తరించాలని.. దీంతోపాటు సబర్బన్ రైలు సేవలను కూడా విస్తృతం చేయాలని చెప్పింది.

ఫుట్‌పాత్‌లు, సైకిల్‌, బస్‌ లేన్లకు ఎలాంటి ఆటంకాలు లేకుండా ప్రయాణం సాఫీగా సాగేలా చూడాలని తెలిపింది.

పైన చెప్పిన సూచనలను పాటిస్తే.. వచ్చే ఐదేళ్లలో బెంగళూరు నగరంలో ట్రాఫిక్ కష్టాలు పెరగకుండా.. సౌకర్యవంతమైన ప్రయాణాన్ని ఆస్వాదించవచ్చని "కర్ణాటక వెదర్" సూచించింది.