బెస్ట్ మల్టీబ్యాగర్ స్టాక్.. ఐదేళ్లలో 5 వేల శాతం పెరిగిన షేరు.. లక్షకు రూ. 50 లక్షలొచ్చాయ్

దలాల్ స్ట్రీట్‌లో ఇన్వెస్టర్ల సంపదను ఎన్నో రెట్లు పెంచిన స్టాక్స్ ఎన్నో ఉన్నాయని చెప్పొచ్చు. మార్కెట్లలో ఏ స్టాక్ ఎప్పుడు పెరుగుతుందో మాత్రం మనం ఊహించలేం. ఇక్కడ రిస్క్ ఉంటుంది. కాబట్టి.. ఆర్థిక నిపుణుల సలహా తీసుకొని ఇన్వెస్ట్ చేయడం ద్వారా పెద్దగా రిస్క్ లేకుండా రాబడి అందుకునే అవకాశం ఉంటుంది. స్టాక్ మార్కెట్లను ఇంకా నిశితంగా పరిశీలించాల్సి ఉంటుంది. ఇందుకోసం కంపెనీల ప్రకటనలు, ఫలితాలు, ప్రణాళికలు, పెట్టుబడి వ్యూహాలు ఇలా ఎన్నో అంశాల్ని పరిగణనలోకి తీసుకోవాల్సి ఉంటుంది. ఇక్కడ మనం గత 5 సంవత్సరాల్లో అద్భుతమైన లాభాలు అందించిన ఒక స్టాక్ గురించి చూద్దాం. కరోనా తర్వాతి కాలంలో ఈ స్టాక్ భారీగా పెరిగిందని చెప్పొచ్చు. ఈ ఎన్బీఎఫ్సీ స్టాక్ గత ఐదేళ్లలోనే 5 వేల శాతానికి మించి రిటర్న్స్ ఇచ్చింది.

అదే ముఫిన్ గ్రీన్ ఫైనాన్స్ స్టాక్. ఇప్పుడు మళ్లీ ఆ స్మాల్ క్యాప్ స్టాక్ ఫోకస్‌లోకి వచ్చింది. ఎన్సీడీ ల ద్వారా ఫండ్ రైజింగ్ ప్రకటించింది. దీంతో ఈ స్టాక్‌పై ఇన్వెస్టర్లు ఆసక్తి చూపిస్తున్నారని చెప్పొచ్చు. శుక్రవారం రోజు అంటే నవంబర్ 29న ఈ స్టాక్ దాదాపు 2 శాతం వరకు పుంజుకొని రూ. 123 వద్ద స్థిరపడింది. ఇంట్రాడే కనిష్టం నుంచి 3.50 శాతం పెరిగింది. శుక్రవారం రోజు సెషన్ ముగియడానికి కొద్ది సమయం ముందు.. ఈ నిధుల సమీకరణ కోసం బోర్డు అనుమతి లభించినట్లు తెలిపింది.

ఇంట్రాడేలో శుక్రవారం రోజు ఈ స్టాక్ రూ. 125 వద్ద గరిష్టాన్ని తాకింది. అక్కడి నుంచి తగ్గి చివరకు రూ. 123 వద్ద సెషన్ ముగించింది. కంపెనీ మార్కెట్ విలువ నవంబర్ 29 నాటికి రూ. 1.97 వేల కోట్లుగా ఉంది. ఇక స్టాక్ 52 వారాల గరిష్ట విలువ రూ. 274.40 కాగా.. కనిష్ట ధర రూ. 90.65 గా ఉంది.

ఈ స్టాక్ రిటర్న్స్ విషయానికి వస్తే.. గత నెల వ్యవధిలో 14 శాతం పెరిగింది. ఇక 6 నెలల కాలంలో 9 శాతం పుంజుకుంది. ఈ ఏడాదిలో ఇప్పటివరకు పెద్దగా రాణించకపోయినా.. లాంగ్ టర్మ్ ఇన్వెస్టర్లకు మాత్రం మంచి లాభాల్ని అందించిందని చెప్పొచ్చు. గత ఐదేళ్ల సమయంలో చూస్తే షేరు ధర రూ. 2.40 నుంచి ప్రస్తుత స్థాయికి చేరింది. ఈ క్రమంలోనే 5 వేల శాతం రిటర్న్స్ అంటే.. లక్ష పెట్టుబడిని రూ. 50 లక్షలు చేసింది.