తిరుమలలో భారీ వర్షం బీభత్సం.. విరిగిపడిన కొండచరియలు

బంగాళాఖాతంలో ఏర్పడిన ఫెంగల్ తుఫాను శనివారం రాత్రి మహాబలిపురం-కరైకల్ వద్ద తీరం దాటి.. బలహీనపడి తీవ్ర వాయుగుండంగా కొనసాగుతోంది. దీని ప్రభావంతో ఆంధ్రప్రదేశ్‌లోని దక్షిణ కోస్తా, రాయలసీమ జిల్లాలో మోస్తరు నుంచి భారీ వర్షాలు కురుస్తున్నాయి. ఇక, కలియుగ వైకుంఠం తిరుమలలో శనివారం నుంచి వర్షం తెరిపినివ్వడం లేదు. దీంతో రెండో ఘాట్ రోడ్డులో కొండచరియలు విరిగిపడ్డాయి. ఈ మార్గంలో వాహనాల రాకపోకలకు అంతరాయం లేకుండా సిబ్బంది ఎప్పటికప్పుడు జేసీబీలతో బండరాళ్లను తొలగిస్తున్నారు. గోగర్బం డ్యామ్ పూర్తిగా నిండిపోవడంతో గేట్లు ఎత్తి నీటిని కిందకు వదలుతున్నారు.

శుక్రవారం ఉదయం నుంచి చిరుజల్లులు కురువగా అర్ధరాత్రి రాత్రి తర్వాత వర్షం తీవ్రత ఎక్కువైంది. వర్షంతో పాటు బలంగా ఈదురు గాలులు వీచాయి. దట్టంగా పొగ మంచు కమ్మేయడంతో కొండపై చలి తీవ్రత పెరిగింది. శ్రీవారి దర్శనానికి వెళ్లే భక్తులు దర్శనానంతరం లడ్డూ ప్రసాదం, గదులకు చేరేందుకు ఇబ్బందులకు గురవుతున్నారు.

వర్షం కారణంగాల తిరుమలలో భక్తుల రద్దీ సాధారణంగా ఉంది. ఉచిత సర్వదర్శనానికి 4 కంపార్ట్‌మెంట్లలో భక్తులు వేచి ఉన్నారని టీటీడీ అధికారులు తెలిపారు. సర్వదర్శనానికి 12 గంటల సమయం పడుతుందని.. రూ.300 ప్రత్యేక దర్శనానికి 4-5 గంటల సమయం పడుతోందని చెప్పారు. ఇక, శనివారం 73,619 మంది భక్తులు స్వామివారిని దర్శించుకుని మొక్కులు చెల్లించుకున్నారు. వీరిలో 25,112మంది భక్తులు తలనీలాలు సమర్పించారని, స్వామివారి హుండీ ఆదాయం రూ. 3.35 కోట్లు వచ్చినట్లు వెల్లడించారు.

మరోవైపు, తిరుపతి జిల్లా వ్యాప్తంా ఎడతెరిపి లేని వానలకు తోడు ఈదురు గాలులతో చలి పెరిగింది. జన జీవనానికి తీవ్ర అంతరాయం కలిగింది. ఆగకుండా కురుస్తున్న వర్షాలకు వాగులు, వంకలు పొంగిపొర్లుతున్నాయి. ప్రధాన జలాశయాల్లోకి నీరు వచ్చి చేరడంతో ముందుజాగ్రత్తలు చేపట్టారు. శనివారం మల్లెమడుగు జలాశయంలో రెండు గేట్లు ఎత్తి దిగువకు 150 క్యూసెక్కుల నీటిని విడుదల చేస్తున్నారు. కాళంగి జలాశయానికి 2,800 క్యూసెక్కుల నీరు వస్తుండగా దిగువకు 3,500 క్యూసెక్కులు వదులుతున్నారు. దీంతో లోతట్టు ప్రాంతాల ప్రజలను అధికారులు అప్రమత్తం చేశారు.