మత్తుమందు ఇచ్చి.. భార్యకు నిప్పంటించిన భర్త.. ఆమెను ఆ దేవుడే కాపాడాడు

మద్యానికి బానిసైన ఓ వ్యక్తి.. తన భార్య అడ్డు తొలగించుకోడానికి దుర్మార్గమైన పథకం వేశాడు. భార్యకు మత్తు మందు కలిపిన కూల్ డ్రింక్‌ ఇచ్చి.. ఆమె ఒంటికి నిప్పంటించి హత్యచేయడానికి దుష్ట పన్నాగం పన్నాడు. మంటలు అంటుకునే పొడి శరీరంపై చల్లి, గ్యాస్‌స్టవ్‌ ప్రమాదమని చుట్టుపక్కల వారిని నమ్మించే ప్రయత్నం చేశాడు. అదృష్టం బాగుండి.. ఆమెకు మత్తు ప్రభావం నుంచి బయటకొచ్చింది. కాలిన గాయాలతో ఆసుపత్రిలో చికిత్స పొందుతూ కోలుకుంది. రెండు వారాల కిందట విశాఖపట్నంలో జరిగిన ఈ దారుణ ఘటన ఆమె కోలుకోవడంతో వెలుగులోకి వచ్చింది.

 వివరాల్లోకి వెళ్తే.. నగరంలోని మురళీనగర్‌ సింగరాయ కొండపై నివసిస్తున్న వెంకటరమణ, కృష్ణవేణి దంపతులకు ఐదేళ్ల క్రితం వివాహమైంది. వీరికి ఓ కుమారుడు, ఏడాది వయసున్న ఓ పాప ఉన్నారు. అయితే, మద్యానికి బానిపైన వెంకటరమణ అందికాడికి అప్పులు చేశాడు. ఈ క్రమంలో భార్య వద్ద ఉన్న బంగారం మొత్తం తాకట్టు పెట్టాడు. దీనిపై దంపతులు తరచూ గొడవలు పడుతుండేవారు. నవంబరు 23న పాప మొదటి పుట్టినరోజు నాటికి బంగారాన్ని విడిపించాలని భార్య కృష్ణవేణి, ఆమె తల్లిదండ్రులూ పట్టుబట్టారు. ఆలోగా బంగారం ఇంటికి తీసుకురావాలని తెగేసి చెప్పారు.

దీంతో భార్యపై పగ పెంచుకున్న వెంకట రమణ.. ఈలోగా ఆమెను చంపేయాలని నిర్ణయించుకున్నాడు. దీంతో నవంబరు 16వ తేదీ రాత్రి మద్యం తాగి ఇంటికి వచ్చాడు. వస్తూ వస్తూ మత్తుమందు కలిపిన కూల్‌డ్రింక్‌ తీసుకొచ్చి భార్యకు ఇచ్చాడు. అతడి పథకం గురించి తెలియని బాధితురాలు.. భర్త తనకు ప్రేమతో తెచ్చాడనుకుని తాగింది. అది తాగగానే కళ్లు తిరిగి తూలుతుంటే అతగు గ్యాస్‌స్టవ్‌ వద్దకు తీసుకెళ్లాడు. ఆమె ఒంటిపై మంటలు అంటుకునే పొడి చల్లి స్టవ్‌ వెలిగిస్తున్నానంటూ అగ్గిపుల్లను ఆమెపై వేశాడు.

ఆమెకు మంటలు అంటుకుని కాలిపోతున్నా తలుపు తీయకుండా అక్కడే చూస్తూ నిలబడ్డాడు. కొద్దిసేపటికి మత్తుమందు ప్రభావం నుంచి కాస్త కోలుకున్న కృష్ణవేణి కేకలు వేయడంతో చుట్టుపక్కలవారు వచ్చి ఆమెను రక్షించారు. అనంతరం చికిత్స కోసం ఓ ప్రైవేటు ఆసుపత్రికి తీసుకెళ్లారు. ప్రథమచికిత్స చేయించి అక్కడ నుంచి కేజీహెచ్‌కు తరలించారు. గొంతువద్ద బాగా కాలిపోవడంతో రెండు వారాల వరకూ ఆమె మాట్లాడలేకపోయింది. చికిత్స తర్వాత క్రమంగా కోలుకుని శనివారం మాట్లాడటంతో భర్త నిర్వాకం బయటపెట్టింది. బాధితురాలు వివరాలు వెల్లడించడంతో భర్త వెంకటరమణపై పోలీసులు హత్యాయత్నం కేసు నమోదు చేశారు. ప్రస్తుతం అతడు పరారీలో ఉన్నట్టు తెలుస్తోంది. వెంకట రమణ కోసం పోలీసులు గాలిస్తున్నారు.