ఎమ్మెల్యేకు 2 ఏళ్ల జైలు శిక్ష.. ఖురాన్ అపవిత్రం కేసులో కోర్టు తీర్పు

మరికొన్ని రోజుల్లో ఢిల్లీలో అసెంబ్లీ ఎన్నికలు జరగనున్న వేళ.. ఆమ్ ఆద్మీ పార్టీకి మరో షాక్ తగిలింది. ఆ పార్టీ ఎమ్మెల్యే నరేష్ యాదవ్.. ఓ కేసులో దోషిగా తేలడంతో 2 ఏళ్ల జైలు శిక్ష విధించింది. ఖురాన్‌ను అపవిత్రం చేసిన కేసులో ఎమ్మెల్యే నరేష్ యాదవ్‌ను దోషిగా తేల్చిన పంజాబ్ కోర్టు శిక్షతోపాటు రూ.11వేల ఫైన్ వేసింది. 2016 లో మాలేర్‌కోట్ల రోడ్లపై చిరిగిన ఖురాన్ పేజీలను వేసి హింసకు ప్రేరేపించినట్లు దోషిగా తేలడంతో కోర్టు శిక్ష విధించింది. ఢిల్లీలోని మెహ్రౌలీ అసెంబ్లీ నియోజకవర్గం నుంచి నరేష్ యాదవ్ ఆప్ ఎమ్మెల్యేగా ఎన్నికయ్యారు.

2016లో ఖురాన్‌ను అపవిత్రం చేశారని.. ఎమ్మెల్యే నరేష్ యాదవ్‌పై సెక్షన్ 295ఏ ప్రకారం మత విశ్వాసాలను అవమానించడం.. వారి భావాలను రెచ్చగొట్టడం153ఏ ప్రకారం 2 వర్గాల మధ్య గొడవలను ప్రేరేపించడం.. 120బీ నేరపూరిత కుట్ర కింద కేసులు నమోదు చేశారు. అయితే ఈ కేసులో నరేష్ యాదవ్‌ నిర్దోషి అని దిగువ కోర్టు 2021లో ప్రకటించింది. దీంతో ఓ వ్యక్తి మాలేర్‌కోట్ల కోర్టులో అప్పీలు దాఖలు చేశాడు. ఈ క్రమంలోనే ఆ కేసును విచారణ జరిపిన కోర్టు.. నరేష్ యాదవ్‌కు రెండేళ్లు జైలు శిక్షను విధిస్తూ కీలక తీర్పును వెలువరించింది.

జూన్ 24వ తేదీ 2016లో మాలేర్‌కోట్లలో రోడ్డుపై చిరిగిన ఖురాన్ పేపర్లు కనిపించాయి. దీంతో ఆ ప్రాంతంలో ఈ ఘటన హింసకు దారితీసింది. ఈ క్రమంలోనే కొందరు రోడ్డు మీద ఉన్న వాహనాలు దహనం చేశారు. ఈ ఘటనలో హింసకు ప్రేరేపించే విధంగా చేసినందుకు నరేష్‌తో పాటు మరో ముగ్గురిపై కేసు నమోదు చేశారు.

మత విశ్వాసాలను అవమానించడం ద్వారా వారి మతపరమైన భావాలను రెచ్చగొట్టడం, వివిధ వర్గాల మధ్య శత్రుత్వాన్ని ప్రోత్సహించడం, నేరపూరిత కుట్ర కేసులో ఆయను కోర్టు దోషిగా తేల్చింది. అయితే ఆయనపై నమోదైన దేశద్రోహం ఆరోపణలను మాత్రం కోర్టు కొట్టివేసింది. ఈ కేసులో విజయ్ కుమార్, నంద కిషోర్, గౌరవ్ కుమార్ సహా మరో ఇద్దరిపైనా కేసులు నమోదు చేశారు. ఇక రాష్ట్రీయ స్వయం సేవక్ సంఘ్‌-ఆరెస్సెస్‌తో ముడిపడి ఉన్న విజయ్ కుమార్ బ్యాంక్ అకౌంట్లో అనుమానాస్పదంగా ఉన్న రూ. 90 లక్షల లావాదేవీకి సంబంధించి 2018లో నరేష్ యాదవ్ చేసిన ఆరోపణలతో సహా ఈ కేసు వివాదాస్పదం అయింది.