రైళ్లలో దుప్పట్ల శుభ్రతపై మంత్రి సమాధానంతో తీవ్ర ఆందోళన.. రైల్వే శాఖ కీలక ప్రకటన

ఏసీ బోగీల్లో టిక్కెట్లు రిజర్వేషన్ చేయించుకున్న ప్రయాణికులకు అందజేసే ఉన్ని దుప్పట్ల పరిశుభ్రత, నాణ్యతపై తీవ్ర ఆందోళన వ్యక్తమవుతోంది. ఈ అంశంపై పార్లమెంట్‌లో అడిగిన ప్రశ్నకు రైల్వే మంత్రి అశ్వినీ వైష్ణవ్ లిఖితపూర్వక సమాధానం ఇచ్చిన విషయం తెలిసిందే. నెలకు ఒకసారి దుప్పట్లను ఉతుకుతున్నట్టు వెల్లడించారు. అయితే, వీటిని నెలకు కనీసం రెండుసార్లు అయినా శుభ్రం చేయాలని ప్రయాణికుల నుంచి విజ్ఞ‌ప్తులు వస్తున్నాయి. తాజాగా, రైల్వే శాఖ దీనిపై స్పందించింది. ఉన్ని దుప్పట్లను నెలకు కనీసం రెండుసార్లు ఉతుకుతున్నట్టు ఉత్తర రైల్వే వెల్లడించింది. ప్రతి 15 రోజులకు ఒకసారి నెఫ్తలీన్ వ్యాపర్‌తో వేడినీళ్లలో ఉడకబెట్టి శుభ్రం చేస్తున్నట్టు తెలిపింది.

జమ్మూ, దిబ్రూగఢ్ రాజధాని రైళ్లలోని అన్ని బ్లాంకెట్లను ప్రతి ట్రప్‌కినూ శుభ్రం చేసే యూవీ రోబోటిక్ శానిటైజేషన్ పైలట్ కార్యక్రమం త్వరలోనే ప్రారంభించనున్నట్టు పేర్కొంది. యూవీ రోబోటిక్ శానిటేషన్‌లో సూక్ష్మక్రిములను చంపడానికి అతినీలలోహిత కిరణాలను ఉపయోగిస్తారు. ఉత్తర రైల్వే అధికార ప్రతినిధి హిమాన్షు శేఖర్ శనివారం మీడియాతో మాట్లాడుతూ.. స్టెరిలైజేషన్‌లో హాట్ నాఫ్తలీన్ స్టీమ్ వినియోగం సమర్థవంతమైన పద్ధతి అని అన్నారు. అలాగే, తెలుపు రంగు బెడ్‌షీట్‌లను వినియోగించిన ప్రతిసారీ మెకనైజ్డ్ లాండ్రీల వద్ద శుభ్రం చేస్తారని, అవి తప్పనిసరిగా ‘వైటోమీటర్ పరీక్ష’లో అర్హత సాధించాలని ఆయన తెలిపారు. 2010కి ముందు ఉన్ని కంబళ్లను రెండు లేదా మూడు నెలలకు ఒకసారి శుభ్రం చేసేవారని ఆయన చెప్పారు.

‘2010కి ముందు ప్రతి 2 లేదా 3 నెలలకు ఒకసారి ఉతికేవారు.. తర్వాత నెలకు ఒకసారి.. ప్రస్తుతం 15 రోజులకు ఒకసారి శుభ్రం చేస్తున్నాం.. వీటి తరలింపు సవాల్‌గా మారింది.. అన్ని దుప్పట్లను నెలలో కనీసం ఒకసారైనా శుభ్రం చేయిస్తున్నాం.. ఒక నెలలో ఉతకడం ఒక మినహాయింపు.. సాధారణమైనది కాదు’ అని హిమాన్షు శేఖర్ అన్నారు. భారతీయ రైల్వే దేశవ్యాప్తంగా రోజూ కనీసం ఆరు లక్షల మంది ప్రయాణికులకు దుప్పట్లు సరఫరా చేస్తోంది. ఒక్క ఉత్తర రైల్వే పరిధిలోనే లక్ష బ్లాంకెట్స్, బెడ్ రోల్స్ అందజేయడం విశేషం.