తక్కువ ధరకే బంగారం.. దేశంలోని ఆ ప్రాంతంలో చాలా చౌక.. ఇదే అసలు కారణం!

భారతీయులకు బంగారం అంటే ఎంతో ఇష్టం. ఏడాది పొడవున కొనుగోలు చేస్తూనే ఉంటారు. దీంతో ప్రతి సంవత్సరం టన్నులకు టన్నులు బంగారం దేశంలోకి దిగుమతి అవుతుంటుంది. బంగారం ధరలు సైతం భారీగా పెరుగుతున్నాయి. ప్రపంచ వ్యాప్తంగా చూసుకుంటే ప్రాంతాలను బట్టి బంగారం రేట్లు వేరు వేరుగా ఉంటాయి. మన భారతదేశంలోనూ రాష్ట్రాలను బట్టి బంగారం ధరల్లో వ్యత్యాసం ఉంటుంది. ప్రస్తుతం హైదరాబాద్ మార్కెట్లో తులం ఆభరణాల బంగారం ధర 10 గ్రాములకు రూ.78 వేల పైన పలుకుతోంది. సామాన్యులకు ఇది చాలా ఎక్కువనే చెప్పాలి. దీంతో తక్కువ ధరకే బంగారం లభిస్తే బాగుండు అనుకుంటారు. అయితే, మన దేశంలో ఓ రాష్ట్రంలో బంగారం ధర చౌకగా లభిస్తుంది. ఆ వివరాలు తెలుసుకుందాం.

దేశంలోని ఇతర ప్రాంతాలతో పోలిస్తే కేరళ రాష్ట్రంలో బంగారం ధర చౌకగా లభిస్తుంటుంది. అందుకు ప్రధాన కారణాలు ఉన్నాయి. తక్కువ రవాణా ఖర్చులు, పన్ను విధానాలు, దిగుమతి సుంకాలు వంటివి తక్కువ ధరకే బంగారం లభించేలా చేస్తున్నాయి. ప్రధాన నౌకాశ్రయాలు కేరళకు సమీపంలో ఉండడంతో దిగుమతి ఖర్చులు తగ్గుతాయి. దీంతో బంగారం ధర తగ్గడంలో ఇది దోహదపడుతుంది. అలాగే ఇక్కడి బంగారం వ్యాపారుల్లో చాలా మంది జీఎస్టీ లేకుండా పసిడి విక్రయాలు చేస్తున్నట్లు సమాచారం. అంటే పన్నుల ఎగవేతతో తక్కువ ధరకే విక్రయిస్తున్నట్లు తెలుస్తోంది. అయితే దీనికి ఎలాంటి ఆధారాలు లేవు.

కేరళ పక్క రాష్ట్రాలైన కర్ణాటక, తమిళనాడు, ఆంధ్రప్రదేశ్ వంటి ప్రాంతాల్లో ఉత్తర భారత రాష్ట్రాలతో పోలిస్తే బంగారం ధరలు కాస్త తక్కువగానే ఉంటాయని చెప్పవచ్చు. వరల్డ్ గోల్డ్ కౌన్సిల్ లెక్కల ప్రకారం భారత్‌లో అత్యధిక తలసరి బంగారం వినియోగం కేరళలోనే ఉండడం గమనార్హం. ఇక్కడ వార్షిక వినియోగం 200- 225 టన్నులుగా ఉంది. కేరళలో బంగారానికి అధిక డిమాండ్ ఉందని ఈ గణాంకాలే చెబుతున్నాయి. డిసెంబర్ 1వ తేదీన దేశ రాజధాని ఢిల్లీలో 22 క్యారెట్ల బంగారం ధర రూ. 71 వేల 650 వద్ద ఉంది. దానిపై జీఎస్టీ, సెస్, తయారీ ఖర్చులు, వ్యాట్ వంటివి కలిపిదే రూ.73 వేల వరకు ఉండొచ్చు. ఇక కేరళలో చూసుకుంటే 22 క్యారెట్ల బంగారం ధర ర.72 వేల 500 వద్ద ఉంది. అంటే పన్నులు లేకుండానే తులంపై రూ.150 మేర తక్కువకు లభిస్తోంది. కేరళలో పన్నులు సైతం తక్కువగానే ఉంటాయి. ఈ కారణంగానూ ఢిల్లీతో పోలిస్తే బంగారం ధర చాలా చౌకగానే లభిస్తుందని చెప్పవచ్చు.