నన్ను చూసి ఎవరూ ఇలాంటి తప్పు చేయొద్దు.. అలిపిరి వైరల్ వీడియోలోని యువతి క్షమాపణలు

నేటి యువతలో సోషల్ మీడియా పిచ్చి రోజురోజుకూ పెరుగుతోంది. రీల్స్‌కు లైక్‌లు, ఫాలోయర్ల కోసం చిత్రవిచిత్రమైన పనులు చేస్తున్నారు. కొందరు రీల్స్ పిచ్చిలో పడి ప్రాణాలను సైతం పణంగా పెడుతున్న పరిస్థితి. మరికొందరైతే.. లైక్‌ల కోసం చేయరాని స్థలంలో, చేయకూడని పనులు చేసి ఇబ్బందుల్లో పడుతున్నారు. ఆ తర్వాత తప్పు జరిగిందంటూ లెంపలేసుకుంటున్నారు. అలాంటి ఘటనే తిరుపతిలో ఒకటి చోటుచేసుకుంది. సోషల్ మీడియాలో ఫాలోవర్లు, లైకుల కోసం ఓ యువతి తిరుమల అలిపిరి గేట్ వద్ద ఐటెం సాంగ్‌కు స్టెప్పులేసింది. పుష్ప 2 సినిమాలోని కిస్సిక్ పాటకు డ్యాన్స్ చేస్తూ.. ఆ రీల్‌ను తన సోషల్ మీడియాలో పోస్ట్ చేసింది. ఇన్‌స్టాగ్రామ్‌లో పోస్ట్ చేసిన ఈ వీడియో నెట్టింట వైరల్ అయ్యింది. అయితే అలిపిరి వైరల్ వీడియో చూసిన నెటిజనం, శ్రీవారి భక్తులు మండిపడుతున్నారు.

పవిత్రమైన శ్రీవారి సన్నిధిలో ఐటెం సాంగ్‌కు స్టెప్పులు ఏమిటంటూ శ్రీవారి భక్తులు మండిపడుతున్నారు. తిరుమల వెంకటేశ్వరస్వామి కొలువైన శేషాచలం కొండలను చూపిస్తూ ఇలాంటి పనా అంటూ మరికొందరు నెటిజనం ఆగ్రహం వ్యక్తం చేస్తున్నారు. మరికొందరు వ్యూస్ కోసం శ్రీవారి సన్నిధిని కూడా వదలడం లేదని మండిపడుతున్నారు. ఈ యువతిపై చర్యలు తీసుకోవాలని టీటీడీని కోరుతున్నారు. అయితే సోషల్ మీడియాలో తన వీడియోపై విమర్శలు రావటంతో వైరల్ వీడియోలోని యువతి స్పందించారు. తెలియక చేసిన తప్పును క్షమించాలంటూ ఓ వీడియో రిలీజ్ చేశారు.

"టీటీడీ యాజమాన్యానికి, ఛైర్మన్ గారికి నమస్కారం. ఏదో తెలిసో తెలియక తప్పు చేశాను. ఇలా చెడ్డగా వెళ్తుందని ఊహించలేదు. వాతావరణం బాగుందని.. పాట ట్రెండింగ్‌లో ఉందని చేశాను. ఇంకోసారి ఇలాంటి తప్పును చేయనని మనస్ఫూర్తిగా చెప్తున్నాను. దయచేసి ఈ తప్పును క్షమించండి. ఇంకెప్పుడూ ఇలా చేయను. నన్ను చూసి ఎవరైనా ఇలా చేయాలని అనుకున్నా.. అలాంటి తప్పు మాత్రం చేయకండి. దయచేసి నన్ను క్షమించండి." అంటూ వైరల్ వీడియోలోని యువతి మరో వీడియో రిలీజ్ చేశారు. దీంతో చేతులు కాలాక ఆకులు పట్టుకున్నట్లుగా పరిస్థితి ఉందనే కామెంట్లు వినిపిస్తున్నాయి. రీల్స్ చేసే ముందు ఒకటికి రెండు ఆలోచించుకోవాలని కొంతమంది నెటిజనం సూచిస్తున్నారు.