గుత్తిలో ప్రత్యేక ఆకర్షణగా పుష్ప 2 ఫ్లెక్సీ,,,అల్లు అర్జున్, వైఎస్ జగన్ ఫోటోలతో ఫ్లెక్సీ

ప్రస్తుతం ఎక్కడ చూసిన పుష్ప 2 ఫీవర్ నడుస్తోంది. ప్రపంచవ్యాప్తంగా డిసెంబర్ 5న పుష్ప 2 సినిమా విడుదల కానుంది. దీంతో అల్లు అర్జున్ అభిమానులు అప్పుడే హంగామా మొదలెట్టేశారు. డిసెంబర్ నాలుగో తేదీ రాత్రి నుంచే ప్రీమియర్ షోలు ప్రదర్శించనున్నారు. దీంతో ఐకాన్ స్టార్ అల్లు అర్జున్ థియేటర్ల వద్ద, సోషల్ మీడియాలో హంగామా చేస్తున్నారు. కటౌట్లు, పోస్టర్లు, బాణాసంచాలతో సందడి చేస్తున్నారు. అయితే అనంతపురం జిల్లా గుత్తిలో ఏర్పాటు చేసిన పుష్ప 2 ఫ్లెక్సీ మాత్రం.. ఇప్పుడు టాక్ ఆఫ్ ద ఆంధ్రప్రదేశ్‌గా మారింది.

సినిమా రిలీజ్, సక్సెస్ మీట్ ఇలాంటి సందర్భాల్లో అభిమానులు తమ అభిమానాన్ని చాటుకునేందుకు కటౌట్లు, ఫ్లెక్సీలు, పోస్టర్లు వేయించడం మామూలే. కానీ ఇక్కడ అల్లు అర్జున్, వైఎస్ జగన్ ఫోటోలతో ఫ్లెక్సీ ఏర్పాటు చేయడం కొసమెరుపు. మా కోసం నువ్వు వచ్చావు..మీ కోసం మేము వస్తాం.. మీ అభిమానం కోసం దేనికైనా తగ్గేదే లే అంటూ ఈ ఫ్లెక్సీలో క్యాప్షన్ పెట్టారు. గుత్తిలో ఏర్పాటు చేసిన ఈ ఫ్లెక్సీ ఇప్పుడు చర్చనీయాంశమైంది. ఓ వైపు మెగా ఫ్యామిలీకి క్షమాపణలు చెప్పకపోతే పుష్ప 2 సినిమాను అడ్డుకుంటామంటూ చలమలశెట్టి రమేష్ బాబు వంటి జనసేన నేతలు వార్నింగ్ ఇస్తుంటే.. వైసీపీ శ్రేణులు అల్లు అర్జున్‌కు మద్దతుగా ఫ్లె్క్సీలు ఏర్పాటు చేయిస్తుండటం విశేషం. దీంతో అల్లు అర్జున్, పవన్ కళ్యాణ్ ఫ్యాన్ వార్ కాస్తా పొలిటికల్ వార్‌గా టర్న్ తీసుకునే అవకాశం ఉంది.

2024 ఆంధ్రప్రదేశ్ అసెంబ్లీ ఎన్నికల సమయంలో తన స్నేహితుడు, నంద్యాల వైసీపీ అభ్యర్థి అయిన శిల్పా రవిచంద్ర కిషోర్ రెడ్డి కోసం అల్లు అర్జున్ ఎన్నికల ప్రచారానికి వెళ్లడం.. ఈ ఫ్యాన్ వార్‌కు కారణంగా భావించవచ్చు. పవన్ కళ్యాణ్ జనసేన, టీడీపీ, బీజేపీతో కలిసి కూటమిగా పోటీ చేస్తుంటే.. అవతలి పక్షానికి చెందిన అభ్యర్థికి మద్దతుగా మెగా కుటుంబానికి చెందిన అల్లు అర్జున్ వెళ్లడం అప్పట్లో సంచలనం రేపింది. అప్పటి నుంచి సోషల్ మీడియాలో మెగా ఫ్యాన్స్, అల్లు అర్జున్ ఫ్యాన్స్ విడిపోయారు. ఒకరిపై ఒకరు ట్వీట్ల యుద్ధం మొదలెట్టారు. అయితే ఓ ఫ్రెండ్‌గా శిల్పా రవిచంద్ర కిషోర్ రెడ్డికి మద్దతుగా నంద్యాలకు వెళ్లానని ఆ తర్వాత అల్లు అర్జున్ చెప్పుకొచ్చారు. అయినప్పటికీ ఈ ఫ్యాన్ వార్ అలాగే కొనసాగుతోంది.

ఇప్పుడు అల్లు అర్జున్ సినిమాను అడ్డుకుంటామని జనసేన నేత చెలమలశెట్టి రమేష్ బాబు హెచ్చరిస్తుంటే.. పలుచోట్ల వైసీపీ కార్యకర్తలు, శ్రేణులు అల్లు అర్జున్‌ పుష్ప 2 సినిమాకు మద్దతుగా పోస్టర్లు వేయించడం ప్రాధాన్యం సంతరించుకుంది.