పవన్ కళ్యాణ్‌పై వైసీపీ నేతల ప్రశంసలు.. నేషనల్ పాపులారిటీని పొగుడుతూ

జనసేన అధినేత, ఆంధ్రప్రదేశ్ డిప్యూటీ సీఎం పవన్ కళ్యాణ్ గురించి వైసీపీ నేతల స్వరం మారుతోందా.. మొన్నటి వరకూ ఎగతాళి చేసిన నోళ్లే.. ఇప్పుడు ప్రశంసిస్తున్నాయా.. అంటే అవుననే సమాధానం వినిపిస్తోంది. ఎందుకంటే ఈ మధ్యకాలంలో పవన్ కళ్యాణ్ గురించి వైసీపీ నేతలు చేస్తున్న వ్యాఖ్యలు, ట్వీట్లే ఇందుకు కారణం. వైసీపీ ముఖ్య నేత, రాజ్యసభ సభ్యుడు విజయసాయిరెడ్డి పవన్ కళ్యాణ్‌ను ఉద్దేశిస్తూ తాజాగా చేసిన ట్వీట్ సోషల్ మీడియాలో వైరల్ అవుతోంది. సోషల్ మీడియాలో ఆసక్తికర చర్చకు దారితీస్తోంది. జాతీయస్థాయిలో ఉన్న పాపులారిటీ, వయస్సును పరిగణనలోకి తీసుకుని ఆంధ్రప్రదేశ్ రాష్ట్రాన్ని లీడ్ చేసే సామర్థ్యం డిప్యూటీ సీఎం పవన్ కళ్యాణ్‌కు ఉందంటూ విజయసాయిరెడ్డి ట్వీట్ చేశారు.

యువ రాష్ట్రమైన ఆంధ్రప్రదేశ్‌కు 75 ఏళ్ల వ్యక్తి సారథ్యం వహించడం సరికాదంటూ పరోక్షంగా సీఎం నారా చంద్రబాబు నాయుడుకి సెటైర్లు వేసిన విజయసాయిరెడ్డి.. ఆంధ్రప్రదేశ్‌లోని ఎన్డీఏ పార్టీ నేతల్లో అత్యంత ఆదర్శనీయమైన వ్యక్తి పవన్ కళ్యాణేనని.. రాష్ట్రానికి నాయకత్వం వహించేందుకు కూటమి పార్టీ నేతల్లో పవన్ కళ్యాణ్ సరైన వ్యక్తి అని నమ్ముతున్నానంటూ విజయసాయిరెడ్డి ట్వీట్ చేశారు. మరోవైపు గురువారం ఢిల్లీలో జరిగిన విలేకర్ల సమావేశంలోనూ పవన్ కళ్యాణ్‌ను విజయసాయిరెడ్డి ప్రశంసించిన సంగతి తెలిసిందే . ముఖ్యమంత్రి చంద్రబాబు, మంత్రి నారా లోకేశ్ కంటే పవన్ కల్యాణ్ బెటర్ అంటూ విజయసాయిరెడ్డి కితాబిచ్చారు.

మరోవైపు మాజీ మంత్రి పేర్ని నాని సైతం ఇటీవల పవన్ కళ్యాణ్ మీద ప్రశంసలు కురిపించిన సంగతి తెలిసిందే. కాకినాడ పోర్టులో రేషన్ బియ్యం అక్రమ రవాణా అడ్డుకోవటంపై పవన్ కళ్యాణ్ గురించి పేర్ని నాని ప్రశంసలు కురిపించారు. అయితే పేర్ని నాని వ్యాఖ్యలలో ప్రశంసలతో పాటుగా సెటైర్లు కూడా ఉన్నాయి. తన శాఖ కాకపోయినప్పటికీ ప్రాణాలకు తెగించి రేషన్ బియ్యం అక్రమ రవాణా అడ్డుకోవటం అభినందనీయమంటూ పవన్ కళ్యాణ్‌ను ప్రశంసించారు.

అయితే స్టెల్లాషిప్‌ను తనిఖీ చేసిన పవన్.. కెన్‌స్టార్ షిఫ్‌ను ఎందుకు వదిలేశారో అంటూ అనుమానాలు, సెటైర్లు కూడా వేశారు. ఏదేమైనా ఎన్నికలకు ముందు పవన్ కళ్యాణ్ పెళ్లిళ్ల ప్రస్తావన తెస్తూ విమర్శలు చేసిన పేర్ని నాని వంటి నేతలు.. ఇప్పుడు ఆయనను ప్రశంసించడం మాత్రం సోషల్ మీడియాలో చర్చకు కారణమైంది.