కుక్క అనే కనికరం కూడా లేకుండా... స్టేషన్ ఎదుట యజమాని ఆందోళన

నేటి సమాజంలో నేరాలు ఘోరాలు రోజురోజుకూ పెరిగిపోతున్నాయి. పరువు హత్యలు, పాతిక రూపాయల కోసం హత్యలు, క్షణికావేశంలో జరిగే తప్పులు.. ఇలాంటివి లెక్కలేనని. కొన్ని కొన్ని ఘటనలను చూసినప్పుడు ఛీ.. ఇలాంటోళ్లు కూడా ఉంటారా అని అనిపిస్తూ ఉంటుంది. అలాంటి ఘటనే ఆధ్యాత్మిక నగరం తిరుపతిలో చోటుచేసుకుంది. తిరుపతి స్కావెంజర్స్ కాలనీలో ఈ దారుణ ఘటన జరిగింది. యజమాని పోలీసులకు ఫిర్యాదు చేయడంతో ఈ ఘటన వెలుగుచూసింది.

ప్రస్తుత రోజుల్లో పెంపుడు జంతువులు అనేవి చాలా మంది ఇళ్లల్లో కుటుంబసభ్యులుగా మారిపోయాయి. మరీ ముఖ్యంగా చాలా మంది ఇళ్లల్లో కుక్కలను పెంపుడు జంతువులుగా పెంచుకుంటూ ఉండటం మనం చూస్తూనే ఉన్నాం. కొంతమంది పెంపుడు జంతువుల మీద అభిమానంతో వాటిని పెంచుతుంటే.. మరికొంత మంది స్టేటస్ సింబల్‌గానూ వాటిని భావిస్తుంటారు. అందుకే వేలకు వేలు పోసి మరీ అరుదైన బ్రీడ్ రకాల కుక్కలను ఇంట్లో పెంచుకుంటూ ఉంటారు. విషయంలోకి వస్తే.. తిరుపతి స్కావెంజర్స్‌ కాలనీలోని ఓ కుటుంబం.. ఓ కుక్కను చాలా అల్లారుముద్దుగా పెంచుకుంది. ల్యాబ్ జాతికి చెందిన కుక్కను టామీ అని ముద్దుపేరు పెట్టుకుని లావణ్య ఫ్యామిలీ పెంచుకుంటోంది.

అయితే శుక్రవారం ఉదయం పిల్లలను మామగారి ఇంట్లో విడిచిపెట్టి లావణ్య బయటకు వెళ్లారు. కాసేపటికే వారికి ఇంటి నుంచి ఫోన్ వచ్చింది. టామీ అరుస్తోందని.. ఇద్దరు వ్యక్తులు టామీని కత్తితో నరికారంటూ లావణ్యకు పిల్లలు ఫోన్ చేసి చెప్పారు. దీంతో లావణ్య వెంటనే ఇంటికి బయల్దేరారు. ఇంటికి చేరుకునే సరికి టామీ రక్తపు మడుగులో చనిపోయి కనిపించింది. దీంతో తన పెంపుడు కుక్కను (టామీ) పక్క ఇంట్లో ఉండే శివకుమార్, సాయికుమార్ అనే ఇద్దరు యువకులు చంపేశారంటూ లావణ్య పోలీసులను ఆశ్రయించారు. వ్యక్తిగత కక్షలతో తన కుక్కను చంపేశారంటూ తిరుపతి ఈస్ట్ పోలీస్ స్టేషన్‌లో లావణ్య ఫిర్యాదు చేశారు.

మూగజీవి పట్ల కిరాతకంగా వ్యవహరించిన ఇద్దరిపై చర్యలు తీసుకోవాలంటూ లావణ్య పోలీసులను కోరారు. దీనిపై పోలీసులు కేసు నమోదు చేశారు. అయితే పోలీసుల ఎఫ్ఐఆర్‌లో ఒక వ్యక్తి పేరును తప్పించారన్న లావణ్య.. పోలీస్ స్టేషన్ ఎదుట బైఠాయించారు. తమకు న్యాయం చేయాలంటూ నిరసనకు దిగారు. కేసు పెట్టడానికి వెళ్తే.. పోలీసులు చులకనగా మాట్లాడారని లావణ్య ఆరోపిస్తున్నారు.