దేవేంద్ర ఫడ్నవీస్ ప్రమాణ స్వీకారోత్సవంలో దొంగల చేతివాటం.. ఏకంగా లక్షల్లోనే

మహారాష్ట్ర ముఖ్యమంత్రిగా దేవేంద్ర ఫడ్నవీస్ ఇటీవల ప్రమాణ స్వీకారం చేసిన సంగతి తెలిసిందే. మహారాష్ట్ర అసెంబ్లీ ఎన్నికల్లో మహాయుతి కూటమి గ్రాండ్ విక్టరీ తర్వాత జరిగిన అనేక హైడ్రామాల మధ్య చివరకు దేవేంద్ర ఫడ్నవీస్ సీఎం అయ్యారు. ఫలితాలు వెలువడిన తర్వాత సీఎం కుర్చీకి ఆశావహుల సంఖ్య పెరగటంతో సీఎం ప్రమాణ స్వీకారం ఆలస్యమైంది. అయితే ఎట్టకేలకు కూటమి నేతల మధ్య పరస్పర అంగీకారంతో డిసెంబర్ 5వ తేదీ దక్షిణ ముంబయిలోని ఆజాద్ మైదాన్‌లో దేవేంద్ర ఫఢ్నవీస్ ప్రమాణ స్వీకారోత్సవం జరిగింది. ఈ కార్యక్రమానికి ప్రధానమంత్రి నరేంద్ర మోదీతో పాటుగా.. పలు రాష్ట్రాల ముఖ్యమంత్రులు, సినీ, రాజకీయ, క్రీడా ప్రముఖులు హాజరయ్యారు.ఈ కార్యక్రమంలో మహారాష్ట్ర సీఎంగా దేవేంద్ర ఫడ్నవీస్‌తో పాటుగా, డిప్యూటీ సీఎంలుగా అజిత్ పవార్, ఏక్ నాథ్ షిండే ప్రమాణ స్వీకారం చేశారు.

అయితే ఫడ్నవీస్ ప్రమాణ స్వీకార కార్యక్రమంలో జేబు దొంగలు తమ చేతివాటం ప్రదర్శించారు. మొబైల్ ఫోన్లు, బంగారు గొలుసులు, డబ్బు ఇలా భారీగా చోరీ చేశారు. చోరీ అయిన నగదు, ఆభరణాల విలువ సుమారుగా రూ.12 లక్షల వరకూ ఉంటుందని పోలీసులు తెలిపారు. ప్రధాని మోదీతో పాటుగా, రాజకీయ, వ్యాపార, సినీ సెలబ్రిటీలు పాల్గొన్న ఈ కార్యక్రమానికి సుమారుగా 4 వేలమందికి పైగా పోలీసులతో భద్రతా ఏర్పాట్లు చేశారు. అయితే ఇంత పటిష్ట బందోబస్తు మధ్య కూడా దొంగలు.. తమ హస్తలాఘవం ప్రదర్శించడం గమనార్హం. చోరీలపై ఆజాద్ మైదాన్ పోలీసులకు ఫిర్యాదులు అందుతున్నాయి.

మరోవైపు చోరీల విషయాన్ని ఆజాద్ మైదాన్ పోలీస్ స్టేషన్‌లోని అధికారులు ధ్రువీకరించారు. దొంగలు గోల్డ్ చైన్లు, ఫోన్లు, వాలెట్లను చోరీ చేసినట్లు చెప్పారు. ప్రమాణ స్వీకారానికి హాజరైన వారు రెండో గేటు నుంచి బయటకు వస్తున్న సమయంలో దొంగతనాలు జరిగినట్లు గుర్తించారు. దొంగలను గుర్తించేందుకు, అదుపులోకి తీసుకునేందుకు ఆజాద్ మైదాన్ పోలీసులు, క్రైమ్ బ్రాంచ్ అధికారులు దర్యాప్తు చేపట్టారు. సీసీటీవీ ఫుటేజీలను కూడా పరిశీలించారు. అయితే ఇప్పటి వరకూ ఎవరినీ అరెస్ట్ చేయలేదని ఆజాద్ మైదాన్ పోలీసులు చెప్తున్నారు. రెండో గేటు నుంచి బయటకు వచ్చే సమయాన్ని అడ్వాంటేజ్‌గా తీసుకుని దొంగలు.. చోరీలు చేశారంటున్న పోలీసులు.. సీసీటీవీ ఫుటేజీల సాయంతో వారిని గుర్తించే పనిలో ఉన్నట్లు చెప్తున్నారు.

ఇటీవలి కాలంలో ఇలాంటి బహిరంగసభలు, రాజకీయ కార్యక్రమాల్లో దొంగతనాలు సాధారణంగా మారిపోతున్నాయి. భారీ జనసందోహం మధ్యలో తమను ఎవరూ గుర్తించలేరని దొంగలు చెలరేగిపోతున్నారు. ఇప్పుడు ప్రధానమంత్రి నరేంద్ర మోదీ హాజరైన కార్యక్రమంలోనే చోరులు చెలరేగిపోవటంపై ఆందోళన వ్యక్తం అవుతోంది.