గుర్రాన్ని ఢీకొట్టిన కారు.. 20 అడుగుల దూరంలో ఎగిరిపడి మృతి

రోడ్లపై చిన్న చిన్న తప్పిదాల వల్ల జరిగే ప్రమాదాలను మనం చూస్తూనే ఉంటాం. అతి వేగం, నిర్లక్ష్యం కారణంగా రెప్పపాటులోనే పెను ప్రమాదాలు సంభవించిన ఘటనలు ఎన్నో ఉంటాయి. అయితే ఒకరు చేసిన తప్పిదానికి మరొకరు బలైన సంఘటనలు కూడా మనకు కనిపిస్తూనే ఉంటాయి. తాజాగా రోడ్డుపై వేగంగా వెళ్తున్న కారు.. గుర్రపుబండిని ఢీకొట్టింది. ఆ కారు స్పీడుకు.. గుర్రపుబండి నుంచి గుర్రం విడిపోయి.. 20 అడుగుల దూరంలో పడిపోయింది. ఈ ప్రమద ఘటన కాస్తా అక్కడే ఉన్న సీసీటీవీ కెమెరాలో రికార్డ్ కావడంతో.. ఆ వీడియో ఇప్పుడు సోషల్ మీడియాలో వైరల్ అవుతోంది. ఈ ఘటనలో గుర్రం అక్కడికక్కడే ప్రాణాలు కోల్పోవడం తీవ్ర విషాదానికి గురి చేస్తోంది. ఇక గుర్రపుబండిని కారు ఢీకొట్టిన ఘటనలో ఐదుగురికి గాయాలు అయ్యాయి.

ఉత్తర్‌ప్రదేశ్‌లోని బాగ్‌పట్‌ జిల్లాలో సోమవారం ఉదయం 9 గంటలకు ఈ ఘటన చోటు చేసుకుంది. ఒక గుర్రం బండిపై కొందరు వ్యక్తులు ప్రయాణించారు. గౌరీపూర్ ప్రాంతంలో రోడ్డు మలుపు వద్ద ఢిల్లీ-సహారన్‌పూర్ జాతీయ రహదారిపై ఆ గుర్రపు బండి ప్రవేశించింది. అయితే ఆ హైవేపై అతి వేగంగా ప్రయాణిస్తున్న కారు.. ఒక్కసారిగా రోడ్డుపైకి వచ్చిన గుర్రపు బండిని అతివేగంతో ఢీకొట్టింది. దీంతో గుర్రపు బండి నుంచి గుర్రం వేరుపడింది. ఒక్కసారిగా గాల్లోకి ఎగిరి.. దూరం పడిపోయింది. ఆ గుర్రం 7 అడుగుల ఎత్తుకు ఎగిరి.. 20 అడుగుల దూరంలో పడి.. అక్కడికక్కడే దుర్మరణం పాలైంది.

ఈ ఘటనలో ఆ గుర్రపుబండిలో ప్రయాణించిన వారితో పాటు ఆ రోడ్డుపై వెళ్తున్న ఐదుగురు వ్యక్తులకు గాయాలు అయ్యాయి. ఈ ప్రమాద సమాచారం తెలుసుకున్న పోలీసులు సంఘటనా స్థలానికి చేరుకున్నారు. అక్కడ గాయపడిన ఐదుగురు వ్యక్తులను జిల్లా ప్రభుత్వ ఆస్పత్రికి తరలించి చికిత్స అందిస్తున్నారు. ఈ ప్రమాదంపై కేసు నమోదు చేసి దర్యాప్తు చేస్తున్నారు. ఇక ఆ గుర్రం మృతికి కారణమైన కారును గుర్తించారు. ఇక ఈ ఘటన మొత్తం అక్కడే ఉన్న సీసీటీవీ ఫుటేజీలో రికార్డ్ కాగా.. ఇప్పుడు ఆ వీడియో క్లిప్‌ సోషల్‌ మీడియాలో తెగ వైరల్‌ అవుతోంది.