ఒత్తిడి ఉందని చెబితే.. వందమందిని పీకేసిన కంపెనీ..? ఆఖర్లో ట్విస్ట్

ఒకప్పటితో పోలిస్తే ఇప్పుడు ఆదాయ వనరులు పెరిగిపోయాయి. ఉద్యోగ అవకాశాలు కూడా పెరిగాయని చెప్పొచ్చు. అయితే ఇదే సమయంలో ఉద్యోగానికి భద్రత మాత్రం కచ్చితంగా లేదని చెప్పొచ్చు. ఎప్పుడు పరిస్థితులు ఎలా ఉంటున్నాయో అర్థం కాట్లేదు. మూడేళ్ల కిందట కరోనా మహమ్మారి సృష్టించిన విధ్వంసం దీనికి సాక్ష్యంగా నిలిచింది. అప్పుడు పెద్ద సంఖ్యలో కంపెనీలు మూతపడగా.. వేలాది, లక్షలాది మంది ఉద్యోగాలు కూడా ఊడిపోయాయి. అప్పటి నుంచి ఆర్థిక మందగమనం అనో.. ఖర్చుల్ని తగ్గించుకోవడం పేరిట చాలా కంపెనీలు తరచుగా ఉద్యోగుల్ని తొలగిస్తూనే ఉన్నాయి. పనితీరు బాలేదని.. అంచనాల్ని అందుకోలేదని.. కంపెనీకి లాభాలు రాట్లేదని.. పలు కారణాలతో లేఆఫ్స్ చేస్తున్నాయి. అయితే ఇప్పుడు ఒక కంపెనీ చేసిన లేఆఫ్స్ మాత్రం దీనికి భిన్నం. ఏం జరిగిందో తెలిస్తే.. అవాక్కవ్వాల్సిందే.

నోయిడా ప్రధాన కేంద్రంగా కార్యకలాపాలు నిర్వహిస్తున్న.. యెస్‌మేడమ్ అనే ఒక స్టార్టప్ ఒక్క కారణంతో వంద మంది వరకు ఉద్యోగుల్ని పీకేసినట్లుగా వార్తలు వచ్చాయి. ఇంటి వద్ద సెలూన్ సర్వీసుల్ని (సెలూన్ హోమ్ సర్వీస్ స్టార్టప్) అందిస్తుంటుంది. కంపెనీ ఇటీవల ఉద్యోగులకు ఒక అంతర్గత సర్వే నిర్వహించిందని తెలుస్తోంది. ఇందులో భాగంగానే.. పని కారణంగా ఒత్తిడి ఎదుర్కొంటున్నారా? అని ప్రశ్న సంధించగా.. చాలా మంది ఒత్తిడి ఎదుర్కొంటున్నట్లు బదులిచ్చారు.

ఇది జరిగిన కొద్ది రోజుల తర్వాత.. యెస్‌మేడమ్ హెచ్ఆర్ మేనేజర్ ఆషు అరోరా ఝా పేరిట ఉద్యోగులకు ఇ-మెయిల్ లేఖ వెళ్లింది. ఈ క్రమంలోనే.. సర్వేలో పాల్గొన్నటువంటి ఉద్యోగుల అభిప్రాయాల్ని గౌరవిస్తున్నామంటూనే పెద్ద షాక్ ఇచ్చింది. తీవ్ర ఒత్తిడి ఎదుర్కొంటున్నవారికి తప్పనిసరి పరిస్థితుల్లో వీడ్కోలు చెబుతున్నామని వెల్లడించింది.

'డియర్ టీమ్.. పని సమయంలో ఉద్యోగులు ఒత్తిడి ఎదుర్కొంటున్నారా అని తెలుసుకునేందుు మేమొక సర్వే నిర్వహించాం. చాలా మంది తమ అభిప్రాయాలు చెప్పారు. వాటికి మేము విలువ, గౌరవం ఇస్తున్నాం. ఉద్యోగుల మానసిక ఆరోగ్యం మీద శ్రద్ధ పెట్టే కంపెనీగా.. వారికి అండగా ఉండే సంస్థగా మేం వారి అభిప్రాయాల్ని క్షుణ్ణంగా పరిశీలించాం. అందుకే.. వారి మేలు కోసం ఎక్కువ ఒత్తిడి ఎదుర్కొంటున్న వారికి వీడ్కోలు పలుకుతున్నాం. ఈ నిర్ణయం తక్షణమే అమల్లోకి వస్తుంది. లేఆఫ్స్‌కు గురైన ఉద్యోగుల్ని వేరుగా పూర్తి వివరాలతో సంప్రదిస్తాం.' అని లెటర్ వైరల్ అవుతోంది.

దీప్ గనత్రా అనే వ్యక్తి.. సదరు ఇ-మెయిల్ స్క్రీన్‌షాట్‌ను ట్విట్టర్‌లో (x) పోస్ట్ చేయగా ఇది విపరీతంగా వైరల్ అవుతోంది. డిసెంబర్ 9 మధ్యాహ్నం 12.16 గంటల సమయంలో ట్వీట్ చేయగా.. ఒక్క రోజు వ్యవధిలోనే సుమారు 3.50 లక్షల మందికిపైగా చూశారు. ఒక్కొక్కరు ఒక్కోలా స్పందిస్తున్నారు. ఇది నిజంగా జరిగిందా అని కొందరు అనుమానం వ్యక్తం చేస్తుండగా.. ఇంకొందరు ఇది జోక్ అయి ఉంటుందని.. లేదా పీఆర్ స్టంట్ అయ్యుంటుందని అంటున్నారు. అంతర్గత సర్వేలు అనేవి ఎప్పుడూ నిజమయ్యేది కాదని ఇంకొందరు కామెంట్లు చేస్తున్నారు.

చివర్లో ట్విస్ట్..

ఈ వ్యవహారం విస్తృతంగా చర్చనీయాంశమై.. తీవ్ర వివాదాస్పదంగా మారుతున్న క్రమంలో యెస్‌మేడమ్ సంస్థ స్పందించింది. తాము ఎవరినీ లేఆఫ్స్ చేయలేదని.. వారికి విశ్రాంతి తీసుకొని తిరిగి తాజాగా వచ్చేందుకు కాస్త విరామం ఇచ్చామని చెప్పింది.

అయితే.. ఒత్తిడి గురించి తాము చేసిన సర్వే నిజమేనని.. ఇది పని ప్రదేశాల్లో ఉద్యోగుల ఒత్తిడి గురించి నొక్కిచెప్పేందుకేనని సోషల్ మీడియా పోస్టులో వివరించింది. ఇంతటి వివాదానికి దారితీసిన నేపథ్యంలో అందరికీ క్షమాపణలు చెబుతున్నట్లు పేర్కొంది. ఉద్యోగుల్ని తొలగించే అమానవీయ చర్యకు పాల్పడబోమని చెప్పుకొచ్చింది. అయితే కంపెనీ తీరుపై నెటిజెన్లు మండిపడుతున్నారు. ఇలా చేసుండాల్సింది కాదని అభిప్రాయపడుతున్నారు. ఇదే క్రమంలో కంపెనీ .. బాలీవుడ్ నటి, హాట్ బ్యూటీ పూనమ్ పాండేను అనుసరించిందని అంటున్నారు. గతంలో ఇలాగే పూనమ్ పాండే కూడా సర్వైకల్ క్యాన్సర్‌పై అవగాహన కల్పించేందుకని తాను అదే క్యాన్సర్‌తో చనిపోయినట్లు డ్రామా ఆడిన సంగతి తెలిసిందే. తాను దానిపై అవగాహన కల్పించేందుకే అలా చేశానని రెండు రోజుల తర్వాత ట్వీట్ చేయడంతో.. అసలు నిజం తెలిసింది. దీంతో నెటిజెన్లు ఆమెపై విమర్శలు గుప్పించారు.