పార్టీ పెట్టడం ఆత్మహత్యా సదృశ్యం.. పవన్ కళ్యాణ్ కీలక వ్యాఖ్యలు

స్వర్ణాంధ్ర 2047 విజన్ డాక్యుమెంట్ విడుదల కార్యక్రమంలో చంద్రబాబుతో కలిసి పవన్ కళ్యాణ్ పాల్గొన్నారు. ఈ సందర్భంగా మాట్లాడిన పవన్ కళ్యాణ్.. ఈ కార్యక్రమంలో భాగస్వామ్యం కావటం చాలా సంతోషంగా ఉందన్నారు. యుక్త వయసులో ఉన్నప్పుడు ఎంతో సాధించాలని.. చాలా నేర్చుకోవాలని ఉండేదని పవన్ కళ్యాణ్ చెప్పారు. 10, 20 సంవత్సరాల తరువాత నువ్వు ఎలా ఉండాలి అనేది ముందుగా రాసుకోమని ఓ పుస్తకంలో చదివానన్న పవన్ కళ్యాణ్.. ఒక పెద్ద నటుడు, పారిశ్రామిక వేత్త , డాక్టర్ అవ్వాలని రాసుకున్నప్పుడు చాలా హాస్యాస్పదం అనిపించిందని.. కానీ అది ఒక దిక్సూచిలా పనిచేస్తుందని చెప్పారు.

చంద్రబాబు తన కోసం కాకుండా ఉమ్మడి ఆంధ్రప్రదేశ్ కోసం కలలు కన్నారని.. ఆ విషయం ఆరోజు అందరికీ అర్థం కాలేదని.. ఇప్పుడు తెలుస్తోందని చెప్పారు. అలాగే స్వర్ణాంధ్ర 2047 విజన్ డాక్యుమెంట్ విలువ కాలానికి ముందుకెళ్ళి చూస్తే అర్థం అవుతుందని పవన్ చెప్పారు. అలాగే నారా చంద్రబాబు నాయుడు విలువ ఏంటో.. జనసేన పార్టీ పెట్టిన తర్వాతనే తనకు తెలిసివచ్చిందని పవన్ కళ్యాణ్ చెప్పారు.

" చంద్రబాబు దశాబ్దాల రాజకీయ, పరిపాలన అనుభవం అమోఘం. నిద్రాహారాలు లేకుండా రాష్ట్రం కోసం తపన పడుతుంటారు. చాలా మందికి అనవసరం అనిపిస్తుంది. నేను సొంతంగా పార్టీ పెట్టి నలిగిన తర్వాతే చంద్రబాబు విలువ నాకు తెలిసివచ్చింది. అప్పటి నుంచి ఆయన పట్ల గౌరవం పెరిగింది. ఒక పార్టీ పెట్టడం ఆత్మహత్యా సదృశ్యం. లక్షలమందిని ఏక తాటిపై నడిపించడం, తద్వారా ప్రజలకు మేలు చేయడం, అభివృద్ధి వైపు నడిపించడం చాలా కష్టసాధ్యమైన విషయం." అని పవన్ కళ్యాణ్ అన్నారు.

"చంద్రబాబు గారి విషయానికి వస్తే నాలుగు దశాబ్దాల అనుభవం ఉన్న పార్టీని నడపాలి, పార్టీ వ్యక్తుల్లో ఆశలు ఉంటాయి. వాటిని చూసుకోవాలి. కుటుంబాన్ని చూసుకోవాలి.. తన కుటుంబమే కాక ఐదు కోట్ల ప్రజల కుటుంబాలను చూసుకోవాలి. వారికి తగ్గ అవసరాలను తీర్చాలి, వాటికి తోడు ప్రత్యర్థులు చేసే దాడిని తట్టుకోవాలి. ఇవన్నీ తట్టుకుంటూ ఉన్న 24 గంటల సమయాన్ని నిరంతరం 5 కోట్ల ప్రజలకు ఎలా వెచ్చించాలి అనే ఆలోచించే విధానం చూస్తే మనస్ఫూర్తిగా హాట్సాఫ్ చెప్పాలనిపిస్తుంది." అని పవన్ కళ్యాణ్ అన్నారు.