అల్లు అర్జున్ అరెస్ట్.. చంద్రబాబుపై లక్ష్మీపార్వతి సంచలన ఆరోపణలు

సినీ నటుడు అల్లు అర్జున్ అరెస్ట్ వ్యవహారంపై వైసీపీ లీడర్ లక్ష్మీపార్వతి స్పందించారు. అల్లు అర్జున్ అరెస్ట్‌ను ఖండించిన లక్ష్మీపార్వతి.. తెలియక చేసిన తప్పునకు అరెస్ట్ చేయడం బాధాకరమని అన్నారు. ఈ క్రమంలోనే లక్ష్మీపార్వతి సంచలన వ్యాఖ్యలు చేశారు. అల్లు అర్జున్ అరెస్ట్ వెనుక ఏపీ సీఎం చంద్రబాబు నాయుడు హస్తం ఉందనేలా లక్ష్మీపార్వతి సంచలన ఆరోపణలు చేశారు. ప్రతిచోటా ఆయన హస్తం ఉంటుందన్న లక్ష్మీపార్వతి.. తెలంగాణలో అధికారంలో ఉన్నది కూడా చంద్రబాబు శిష్యుడే కదా అంటూ చెప్పుకొచ్చారు. రెండు తెలుగు రాష్ట్రాలలో రాక్షస పాలన సాగుతోందని.. ప్రతి దానికి అంతం అనేది ఉంటుందంటూ లక్ష్మీపార్వతి హాట్ కామెంట్స్ చేశారు.

" అల్లు అర్జున్‌ను అరెస్ట్ చేశారని తెలిసింది. పాపం.. నిజంగా నాకు బాధేస్తోంది. ఎన్ని కుట్ర రాజకీయాలంటే.. ప్రతిచోటా ఈయన చేతులు ఉంటాయి. అందులో ఎలాంటి సందేహం లేదు. గోదావరి పుష్కరాల్లో తొక్కిసలాటలో 29 మంది చనిపోతే చంద్రబాబును ఎన్నిసార్లు అరెస్ట్ చేయాలి..? ఎన్నిసార్లు జైళ్లో పెట్టాలి?. కందుకూరులో ఇరుకు సందులో మీటింగ్ పెట్టి.. తొక్కిసలాట జరిగితే 9 మంది చనిపోయారు. చీరల పంపిణీలో ముగ్గురు చనిపోయారు. మరి చంద్రబాబును ఎన్నిసార్లు జైళ్లో పెట్టాలి? అల్లు అర్జున్ కావాలని ఏం చేయలేదు. అభిమానంతో వాళ్లు వచ్చారు." అంటూ లక్ష్మీపార్వతి చెప్పుకొచ్చారు.

"తన సినిమాకు స్పందన ఎలా ఉందో తెలుసుకోవడానికి అల్లు అర్జున్ థియేటర్ వద్దకు వెళ్లారు. అల్లు అర్జున్ వస్తున్నప్పుడు థియేటర్ యాజమాన్యం, ప్రభుత్వం సరైన భద్రతా ఏర్పాట్లు చేసుకోవాలి. పోలీసులను పిలిచి కట్టుదిట్టమైన భద్రత ఏర్పాటు చేసి ఉంటే సరిపోయేది. అవేమీ చేయకుండా.. అల్లు అర్జున్ తప్పు అంటే ఎలా..? ఇంతమందిని చంపిన చంద్రబాబు నిబ్బరంగా ఉన్నారు. తెలియక తప్పు చేసిన అల్లు అర్జున్‌ను అరెస్ట్ చేయడం దుర్మార్గం. ఇక్కడ చంద్రబాబు. అక్కడ ఆయన శిష్యుడు. ఇద్దరూ ఇద్దరే.. రెండుచోట్లా రాక్షస పాలనే నడుస్తోంది." అంటూ లక్ష్మీపార్వతి విమర్శించారు.

పుష్ప2 సినిమా విడుదల సందర్భంగాహైదరాబాద్ ఆర్టీసీ క్రాస్ రోడ్స్‌లో ఉన్న సంధ్య థియేటర్ వద్ద తొక్కిసలాట జరిగింది. ఈ తొక్కిసలాటలో రేవతి అనే మహిళ చనిపోగా.. ఆమె కుమారుడు శ్రీతేజ తీవ్రంగా గాయపడ్డాడు. ప్రస్తుతం ఆస్పత్రిలో చికిత్స పొందుతున్నాడు. ఈ ఘటనకు సంబంధించి అల్లు అర్జున్‌పై చిక్కడపల్లి పోలీసులు కేసు నమోదు చేశారు. ఈ క్రమంలోనే అల్లు అర్జున్‌ను శుక్రవారం అరెస్ట్ చేసిన చిక్కడపల్లి పోలీసులు.. గాంధీ ఆస్పత్రిలో వైద్య పరీక్షలు చేయించారు. అనంతరం నాంపల్లి కోర్టులో హాజరుపరిచారు.