ఆప్ నాలుగో జాబితా విడుదల.. కేజ్రీవాల్ పోటీచేసేది అక్కడ నుంచే!

ఢిల్లీ ఎన్నికలకు ఆప్ అభ్యర్థుల నాలుగో జాబితాను ఆ పార్టీ కన్వీనర్, మాజీ ముఖ్యమంత్రి అరవింద్ కేజ్రీవాల్ ఆదివారం ప్రకటించారు. ఈ జాబితాలో ముఖ్యమంత్రి అతిషి, అరవింద్ కేజ్రీవాల్, మంత్రులు సౌరభ్ భరద్వాజ్, గోపాల్ రాయ్ పేర్లు ఉన్నాయి. ప్రస్తుతం ప్రాతినిధ్యం వహిస్తోన్న స్థానాల్లోనే వీరు పోటీ చేయనున్నారు. న్యూఢిల్లీ నుంచి కేజ్రీవాల్, కల్కాజీ నుంచి సీఎం అతిషి, గ్రేటర్ కైలాష్ నుంచి సౌరభ్ భరద్వాజ్, బాబర్‌పూర్ నుంచి గోపాల్ రాయ్‌ను బరిలో దిగుతున్నారు. గత ఎన్నికల్లో వీరంతా ఈ స్థానాల నుంచి పోటీ చేసి గెలుపొందారు.

ఇక, ఎన్నికల ప్రచారం మొదలుపెట్టిన కేజ్రీవాల్.. ఓటర్లను ఆకట్టుకునే ప్రయత్నం చేస్తున్నారు. అసెంబ్లీ ఎన్నికల్లో భాగంగా సంక్షేమ పథకాలే అజెండాగా ఆప్ అధినేత దూసుకెళ్తున్నారు. ఈ క్రమంలో మహిళలు, ఆటోడ్రైవర్లపై ఆయన హామీల వర్షం కురిపించారు. రెండు రోజుల కిందట ఓ ఆటో డ్రైవర్ ఇంటికి భోజనానికి వెళ్లిన అరవింద్ కేజ్రీవాల్‌ ఈ సందర్భంగా ఐదు హామీలు(5 ప్రకటించారు.

వచ్చే ఎన్నికల్లో అధికారంలోకి రాగానే ఆటో డ్రైవర్‌ కూతురి వివాహానికి రూ.లక్ష సాయం ఇస్తామని.. అదే విధంగా ప్రతి దీపావళి, హోలీకి రూ.2,500, ఒక్కో ఆటోడ్రైవర్‌కు రూ.10 లక్షల జీవిత బీమా, రూ.5 లక్షల ప్రమాద బీమా సౌకర్యం కల్పిస్తామని వెల్లడించారు. ఆటో డ్రైవర్ల పిల్లల పోటీ పరీక్షలకు సంబంధించిన ఫీజులు ప్రభుత్వమే చెల్లిస్తుందని హామీ ఇచ్చారు. ‘పూచో యాప్’ ని కూడా ప్రారంభిస్తామని ఆప్ అధినేత పేర్కొన్నారు.

ఇక, తాము మళ్లీ అధికారంలోకి వస్తే ఢిల్లీ మహిళలకు ప్రతి నెలా రూ.2,100 ఆర్థికసాయం చేస్తామని ఆప్ కన్వీనర్ కేజ్రీవాల్ హామీ ఇచ్చారు. ప్రతి మహిళకు రూ.వెయ్యి ఇస్తామని లోక్‌సభ ఎన్నికల సమయంలో ఇచ్చిన హామీపై ప్రతిపాదనకు ఢిల్లీ క్యాబినెట్ గురువారం అయితే, మరో 10-15 రోజుల్లో ఎన్నికల తేదీలు ప్రకటించే అవకాశం ఉంది కాబట్టి ఇప్పుడు ఈ డబ్బుఖాతాల్లో బదిలీ చేయడం సాధ్యం కాదని కేజ్రీవాల్ తెలిపారు. ఈ పథకానికి సంబంధించిన దరఖాస్తు ప్రక్రియ డిసెంబరు 13న ప్రారంభమవుతుందని అరవింద్ కేజ్రీవాల్ స్పష్టం చేశారు. ద్రవ్యోల్బణంతో మహిళలు ఇబ్బందులు పడుతున్నారు.. అందుకే నెలకు రూ.2,100 ఇవ్వాలని నిర్ణయించామని చెప్పారు.