ఈ ఛాయ్ చాలా కాస్ట్లీ గురూ.. టీ తాగాలంటే ఆస్తులు అమ్ముకోవాలేమో

ప్రపంచవ్యాప్తంగా ప్రసిద్ది చెందిన పానీయాల్లో ‘టీ’ ఒకటి. ఇక, భార‌తీయుల దినచర్య టీతో మొదలవుతుంది. నిద్రలేస్తూనే మంచం మీద కాలు కిందిపెట్టక ముందే టీ కోసం ఎదురుచూస్తారు. ఇక, ఇళ్లకు ఎవరైనా అతిథులు వస్తే.. మర్యాదల్లో ఛాయ్ తప్పనిసరి. ఇక, బయటకు వెళ్తే.. కొందరైతే రోడ్డు పక్కన టీస్టాల్ కనబడితే చాలు ఓ కప్పు లాగించేస్తారు. ఇక, సాధార‌ణంగా క‌ప్పు టీ ఓ ప‌ది లేదా ఇర‌వై.. స్టార్ హోటల్స్‌లో అయితే వందల్లో ఉంటుంది. కానీ, ఇప్పుడు మనం చెప్పుకోబోయే టీ ఖ‌రీదు అక్ష‌రాల లక్ష రూపాయల పైమాటే. అవును మీరు వింటోంది నిజమే. కాకపోతే మ‌న దేశంలో మాత్రం కాదు. దుబాయ్‌లో భారత సంతతి వ్యాపారవేత్త నడుపుతోన్న రెస్టారెంట్‌లో ఒక కప్పు టీ రూ.1.14 లక్షలు.

భారత సంతతికి చెందిన సుచేతా శర్మ.. దుబాయ్‌లో డిఐఎఫ్‌సీ ఎమిరేట్స్ ఫైనాన్షియల్ టవర్స్‌లో ‘బోహో కేఫ్ అండ్ రెస్టారెంట్’ను నిర్వహిస్తున్నారు. ఇందులో భారతీయ వంటకాలు.. అత్యంత నాణ్యమైన స్ట్రీట్ ఫుడ్‌లను కస్టమర్లకు వడిస్తుంటారు. వీటితో పాటు గోల్డ్ సావనీర్ కారక్ చాయ్‌, గోల్డ్ సావనీర్ కాఫీ, గోల్డ్-డస్టెడ్ క్రిసెంట్స్, గోల్డ్ డ్రింక్స్, గోల్డ్ ఐస్ క్రీమ్‌ వంటి ప్రత్యేకమైన పదార్థాలు ఉంటాయి. వీటిలో ‘గోల్డ్ కారక్ ఛాయ్’ ధర గురించి సోషల్ మీడియాలో చర్చ జరుగుతోంది. ఒక క‌ప్పు 5000 అరబ్ ఎమిరైట్స్ డాలర్లకు (అంటే భారతీయ కరెన్సీలో రూ. 1.14 లక్షలు) విక్రయిస్తోంది.

ఇంతకీ ఈ టీ ప్రత్యేకత ఏంటంటే.. వెండికప్పులో, 24 క్యారెట్ బంగారం పూతతో టీని అందిస్తారు. అంటే, టీతో పాటు దానిపై ఉన్న బంగారాన్ని లాగించొచ్చు. అంతేకాదు, టీ తాగిన త‌ర్వాత ఆ వెండి క‌ప్పును కూడా మనం పట్టికెళ్లిపోవచ్చు. అక్కడ లభించే గోల్డ్ సావనీర్ కాఫీ ధర కూడా ఇంచుమించు ఇలాగే ఉంటుంది. రాచరిక అనుభవాన్ని కోరుకునే వారి కోసం ఈ స్పెష‌ల్ టీ, కాఫీల‌ను కేఫ్ స‌ర్వ్ చేస్తోంది. ప్రస్తుతం సోషల్ మీడియాలో ఇది తెగ వైరల్ అవుతోంది. నెటిజన్లు స్పందిస్తూ.. ‘మరి ఈఎంఐ ఆప్షన్ ఉందా’ అంటూ చమత్కరిస్తున్నారు.