ఇలా బ్యాగుతో వచ్చి.. అలా వివాదంలోకి.. బీజేపీ విమర్శలకు ప్రియాంక గాంధీ కౌంటర్

కాంగ్రెస్ అగ్రనేత, వయనాడ్ ఎంపీ ప్రియాంక గాంధీ పార్లమెంటు వద్ద అందరి దృష్టిని ఆకర్షించారు. ఇదే సమయంలో ఆమె ధరించిన బ్యాగుపై వివాదం రాజుకుంది. సోమవారంనాడు పార్లమెంట్‌కు ‘పాలస్తీనా’ (Palestine) అని రాసి ఉన్న హ్యాండ్ బ్యాగు తీసుకొచ్చారు. దీనిని కాంగ్రెస్ ప్రతినిధి డాక్టర్ షామ మహమ్మద్ 'ఎక్స్'లో పోస్ట్ చేస్తూ.. దయ, న్యాయనిబద్ధత, మానవత్వానికి ఇది సంకేతమని, జెనీవా కన్వెన్షన్‌ను ఎవరూ ఉల్లంఘించరాదనే సందేశం ఇందులో ఉందని పేర్కొన్నారు. అయితే, దీనిపై బీజేపీ ఘాటు విమర్శలు గుప్పించింది. కాంగ్రెస్ ఎల్లప్పుడూ ఒక వర్గాన్ని బుజ్జగించే పనిలో ఉందని, అందుకే ఎన్నికల్లో అలాంటి ఫలితాలు వస్తున్నాయని బీజేపీ ఎంపీ సంబిత్ పాత్ర విమర్శించారు. తాజాగా, ఈ విమర్శలకు ప్రియాంక గాంధీ దిమ్మదిరిగే కౌంటర్ ఇచ్చారు.

తాను ఎలాంటి దుస్తులు వేసుకోవాలో నిర్ణయించడానికి మీరెవరు అని వయనాడ్ ఎంపీ మండిపడ్డారు. తనకు నచ్చినవి వేసుకుంటానని ప్రియాంక స్పష్టం చేశారు. ‘‘నేను ఎలాంటి బట్టలు వేసుకోవాలో చెప్పడానికి మీరెవరు? మీలాంటి పురుషహంకారులే మహిళలు ఏం ధరించాలో నిర్ణయిస్తారు.. నేను అటువంటి వారి గురించి పట్టించుకోను.. నాకు నచ్చినవి వేసుకుంటాను.. నాకున్న నమ్మకాలకు సంబంధించి చాలాసార్లు చెప్పాను.. వీటి గురించి తెలుసుకోవాలనుకుంటే నా ట్విట్టర్ ఖాతాలో పోస్ట్‌లు చూసుకోండి’’ అంటూ బీజేపీ విమర్శలకు ప్రియాంక గాంధీ ఘాటుగా స్పందించారు.

కాగా, ప్రియాంక గాంధీ గతంలో కూడా గాజాపై ఇజ్రాయేల్ చర్యను వ్యతిరేకిస్తూ పాలస్తీనా పౌరులకు సంఘీభావం ప్రకటించారు. డిసెంబరు 15న ఆదివారం నాడు పాలస్తీనా రాయబారి అబు జాజర్‌తో ప్రియాంక సమావేశం అయ్యారు. ఈ సమావేశంలో పాలస్తీనా స్కార్ఫ్‌తో కనిపించారు వయనాడ్‌ ఉప-ఎన్నికల్లో గెలిచిన ప్రియాంక గాంధీని ఇటీవల జాజర్ అభినందించారు. గత జులైలో ఇజ్రాయేల్ ప్రధాని నెతన్యాహుపై విమర్శలు గుప్పించిన ప్రియాంక.. గాజాలో టెల్ అవీవ్ ప్రభుత్వం నరమేథం సాగిస్తోందని దుయ్యబట్టారు. అమెరికా కాంగ్రెస్‌లో తమ చర్యను సమర్ధించుకుంటూ నెతన్యాహు ప్రసంగించిన వెంటనే ప్రియాంక ఈ విమర్శలు చేయడం గమనార్హం. గాజాలో జరుగుతున్న ఊచకోతలల్లో అమాయక పౌరులు.. ప్రతిరోజూ ప్రాణాలు కోల్పోతున్నారని ఆవేదన వ్యక్తం చేశారు. నాగరికత, నైతికతకు కట్టుబడే ప్రపంచంలో ఇజ్రాయేల్ చర్యలు ఆమోదయోగ్యం కాదని వ్యాఖ్యానించారు.