డొనాల్ట్ ట్రంప్‌కి బిగ్ షాక్.. పోర్న్‌స్టార్ హష్ మనీ కేసులో దోషిగా

అమెరికా అధ్యక్షుడిగా ఎన్నికైన డొనాల్డ్ ట్రంప్‌నకు ఎదురుదెబ్బ తగిలింది. పోర్న్‌స్టార్‌‌కు ముడుపులు ఇచ్చిన కేసులో ఆయనను న్యూయార్క్ కోర్టు తాజాగా దోషిగా తేల్చింది. స్థానిక మీడియా కథనాల ప్రకారం.. సోమవారం న్యూయార్క్ కోర్టు న్యాయమూర్తి జువాన్ మెర్చాన్ తీర్పు వెలువరించారు. అధ్యక్షులకు విస్తృతమైన రక్షణ కల్పించే సుప్రీంకోర్టు నిర్ణయం.. ఈ కేసుకు వర్తించదని పేర్కొన్నారు. అధికారిక చర్యలకు సంబంధించిన కేసుల్లో మాత్రమే ఉంటుందని ఆయన స్పష్టంచేశారు. అధికారిక చట్టాల ప్రకారం ఇమ్యూనిటీకి అవకాశం లేని అనధికారిక ప్రవర్తనకు సంబంధించిన అంశమని న్యాయమూర్తి వ్యాఖ్యానించారు. న్యూయార్క్ టైమ్స్ పత్రిక కూడా ఇదే సమాచారం వెల్లడించింది.

అమెరికా అధ్యక్ష ఎన్నికల్లో విజయం సాధించిన ట్రంప్.. జనవరి 20న అధ్యక్ష బాధ్యతలు చేపట్టనున్న విషయం తెలిసిందే. తాజా తీర్పుతో ఓ క్రిమినల్ కేసులో శిక్ష ఖరాయి దోషిగా వైట్‌హౌస్‌లో అడుగుపెట్టబోతోన్న మొదటి అమెరికా అధ్యక్షుడిగా ట్రంప్ నిలవనున్నారు. కాగా, హష్ మనీ కేసులో ట్రంప్ అప్పీల్‌పై జ్యూరీ విచారణ ఇంకా పెండింగ్‌లో ఉంది. 2016 అధ్యక్ష ఎన్నికల సమయంలో పోర్న్‌స్టార్‌తో తనకున్న సంబంధం బయటపడకుండా ఉండేందుకు డొనాల్డ్ ట్రంప్ ఆమెకు డబ్బులు ఇచ్చినట్టు ప్రధాన ఆరోపణ.

అధ్యక్ష ఎన్నికల్లో ట్రంప్ విజయం సాధించడంతో ఈ క్రిమినల్ కేసులో నవంబరు 22న శిక్షను నిరవధికంగా న్యాయమూర్తి వాయిదా వేశారు. మరోవైపు, ట్రంప్ న్యాయవాదులు మాత్రం.. జులైలోనే ఆయనకు సుప్రీంకోర్టు ఇమ్యూనిటీ కల్పించిందని వివరించారు. కానీ, అధ్యక్ష పీఠాన్ని కాపాడుకోడానికి అవసరమైన దానికి మించి ట్రంప్ చేసిన ప్రయత్నం అని ప్రాసిక్యూటర్లు వాదించారు. పోర్న్‌స్టార్ స్టార్మీ డేనియల్స్‌తో చీకటి ఒప్పందం వ్యవహారంలో డొనాల్డ్ ట్రంప్‌పై నమోదైన అన్ని అభియోగాల్లోనూ న్యూయార్క్ జ్యూరీ గతేడాది ఆయనను దోషిగా నిర్దారించింది.

అయితే, దీనిపై ఆయన అప్పీల్‌కు వెళ్లడంతో సుప్రీంకోర్టు ఇమ్యూనిటీ (రక్షణ) కల్పించింది. ఈ కేసులో తాను అమాయకుణ్ణి అని, ఎటువంటి తప్పుచేయలేదని ట్రంప్ ముందు నుంచి వాదిస్తున్నారు సుప్రీంకోర్టులో అనుకూలంగా తీర్పు వచ్చినా.. న్యూయార్క్ కోర్టు మాత్రం ఆ నిర్ణయం వర్తించదని తాజాగా తీర్పు చెప్పింది. అటు, వాషింగ్టన్‌ డీసీ, ఫ్లోరిడా రాష్ట్రాల్లో నమోదైన మరో రెండు క్రిమినల్‌ కేసులు కూడా ట్రంప్‌పై ప్రభావం చూపే అవకాశాలు ఉన్నట్లు తెలుస్తోంది. దీంతో ఆ కేసుల విచారణను కూడా కొంతకాలం వాయిదా పడేలా చూసేందుకు ట్రంప్ లాయర్లు ప్రయత్నాలు చేస్తున్నారు. స్టార్మీ డేనియల్స్‌‌కు ట్రంప్ 1.30 లక్షల డాలర్ల లంచం ఇప్పించారనేది ఆరోపణ. ఎన్నికల కోసం అందిన విరాళాల నుంచి ఆ మొత్తాన్ని ఇచ్చారని, అందుకోసం రికార్డులను ఆయన తారుమారు చేశారనేది ప్రధాన అభియోగం.