ఉక్రెయిన్‌పై రష్యా తరఫున యుద్ధం.. పెద్ద సంఖ్యలో కిమ్ సైనికులు మృతి

ఉక్రెయిన్‌తో యుద్దం చేస్తోన్న రష్యాకు మద్దతుగా ఉత్తర కొరియా అధినేత కిమ్ జోంగ్ ఉన్ తన సైన్యాలను పంపిన విషయం తెలిసిందే. ఈ నేపథ్యంలో సరిహద్దుల్లోని కుర్స్క్‌ రీజియన్‌ వద్ద మోహరించిన ఉత్తర కొరియా సైన్యంలో పలువురు చనిపోగా.. మరికొందరి ఆచూకీ లేకుండా పోయిందని ఉక్రెయిన్‌ తెలిపింది. దాదాపు 30 మంది కిమ్ సైనికులు మృతిచెందడమో లేదా తీవ్రంగా గాయపడటమో జరిగిందని ఉక్రెయిన్‌ సైనిక ఇంటెలిజెన్స్ వెల్లడించింది. ‘డిసెంబరు 14, 15 తేదీల్లో కుర్క్స్ రీజియన్‌లోని పెల్ఖోవో, వరోఝబా, మార్టోనోవాక గ్రామాల్లోని డెమొక్రటిక్ పీపుల్స్ రిపబ్లిక్ కొరియా సైనిక విభాగాలకు చెందిన కనీసం 30 మంది చనిపోవడమో లేదా తీవ్ర గాయాలపాలవడం జరిగింది’ అని పేర్కొంది.

 ఈ ఏడాది వేసవిలో రష్యా ఊహించనవిధంగా ఉక్రెయిన్ దూకుడు ప్రదర్శించింది. సరిహద్దు ప్రాంతాల్లోకి కీవ్ సేనలు చొచ్చుకొచ్చి.. రష్యాను చావుదెబ్బ కొట్టాయి. దీంతో ఉక్రెయిన్‌ చొరబాటును అడ్డుకోడానికి కుర్స్క్‌లో భారీ స్థాయిలో సైన్యాన్ని పుతిన్ మోహరించారు. ఇందులో భాగంగా ఉత్తర కొరియా సైనికులు ఈ మూడు గ్రామాల్లో రష్యా తరఫున పోరాడుతున్నారు. ఈ క్రమంలోనే 30 మంది చనిపోయారు. మరో ముగ్గురి జాడ లేకుండా పోయారని తెలిపింది. కాగా, ఉక్రెయిన్ యుద్ధంలో కిమ్ సైనికులు చనిపోయినట్లు నివేదించడం మొదటిసారి. అయితే, వీటిపై రష్యా అధికారికంగా స్పందించలేదు.

ఉక్రెయిన్‌తో యుద్ధం చేస్తోన్న రష్యాకు పూర్తి మద్దతు ప్రకటించిన ఉత్తర కొరియా నియంత.. భారీ ఎత్తున్న ఆయుధాలు, సైనిక సహకారం అందిస్తున్నారు. ఇప్పటికే 10 వేలకుపైగా సైనికులను రష్యాకు కిమ్ పంపించినట్లు అంతర్జాతీయ నివేదికలు వెల్లడిస్తున్నాయి. కనీసం 11వేల మంది కిమ్ సైనికులు తూర్పు రష్యాలో శిక్షణ పొందుతున్నట్లు ఉక్రెయిన్‌ సహా పెంటగాన్‌ వర్గాలు ఇటీవల వెల్లడించాయి. శిక్షణ తీసుకున్న వీరు ఇటీవలే యుద్ధ రంగంలోకి అడుగుపెట్టినప్పటికీ.. వీరికి భాష ప్రధాన ఆటంకంగా మారింది. దీంతో రష్యా, ఉత్తర కొరియా సైనికుల మధ్య సరైన సమన్వయం జరగక ఇబ్బంది పడుతున్నట్లు విశ్లేషకులు అంటున్నారు.

ప్రత్యర్థి దేశం దాడికి దిగితే.. ఒకరికొకరు సహకరించుకునేలా రష్యా-ఉత్తర కొరియాల మద్య ఇటీవలే రక్షణ ఒప్పందం జరిగింది. రష్యాలో కిమ్‌ జోంగ్ ఉన్.. ఉత్తర కొరియాలో పుతిన్ పర్యటించిన విషయం తెలిసిందే. 24 ఏళ్ల తర్వాత ఉత్తర కొరియాలో తొలిసారి పర్యటించిన రష్యా అధ్యక్షుడిగా పుతిన్ నిలిచారు. ఈ సందర్భంగా . కిమ్‌కు అనేక కానుకలు అందజేశారు. వీటితోపాటుగా అణ్వాయుధాలు, క్షిపణులకు సంబంధించిన ఆధునిక సాంకేతికతను కూడా ఉత్తర కొరియాకు బదిలీ చేసే అవకాశాలు ఉన్నాయని భావిస్తున్నారు.