కళ్లు చెదిరేలా శబరిమల ఆదాయం.. నెలరోజుల్లో అయ్యప్పకు ఎన్ని కోట్లు వచ్చాయంటే

అయ్యప్ప దర్శనాల కోసం పోటెత్తుతున్న భక్తులతో శబరిగిరులు కిక్కిరిసిపోతున్నాయి. వార్షిక మండల-మకరవిళక్కు పూజల కోసం గత నెల 15వ తేదీన శబరిమల అయ్యప్ప ఆలయం తెరుచుకుంది. అప్పటినుంచి నిత్యం వేలాది మంది భక్తులు.. శబరిమలకు పోటెత్తుతున్నారు. ఈ క్రమంలోనే గత నెల 15వ తేదీ నుంచి ఈనెల 14వ తేదీ వరకు 29 రోజులకు సంబంధించిన ఆదాయాన్ని శబరిమల అయ్యప్ప ఆలయ బాధ్యతలు చూసే ట్రావెన్‌కోర్ దేవస్వమ్ బోర్డు అధికారులు లెక్కించారు. గతేడాదితో పోల్చితే ఈసారి శబరిమల అయ్యప్ప ఆదాయం భారీగా పెరిగిందని బోర్డు వర్గాలు వెల్లడించాయి. అంతేకాకుండా ఈ 29 రోజుల్లో ఎంత మంది భక్తులు అయ్యప్పను దర్శించుకున్నారు.. ప్రసాదానికి ఎంత వచ్చింది అనే లెక్కలను వివరించారు.

నవంబర్ 15వ తేదీ నుంచి డిసెంబర్ 14వ తేదీవరకు 29 రోజుల్లో 22 లక్షల మందికి పైగా భక్తులు.. శబరిమల అయ్యప్పను దర్శించుకున్నారని.. ట్రావెన్‌కోర్‌ దేవస్వం బోర్డు అధ్యక్షుడు పీఎస్‌ ప్రశాంత్‌ తాజాగా మీడియాకు వివరించారు. ఈ 29 రోజుల్లో శబరిమల ఆలయానికి మొత్తం ఆదాయం రూ.163.89 కోట్ల ఆదాయం వచ్చినట్లు తెలిపారు. ఇది గతేడాది ఇదే సమయంతో పోల్చితే రూ.22.76 కోట్లు అధికం అని స్పష్టం చేశారు. ఇక ఫేమస్ అయ్యప్ప ప్రసాదం అయిన అరవణ ప్రసాదాలు విక్రయించడం వల్ల రూ.82.67 కోట్ల ఆదాయం సమకూరిందని పేర్కొన్నారు. ఇక కానుకల రూపంలో మరో రూ.52.27 కోట్లు వచ్చాయని చెప్పారు.

అరవణ ప్రసాదం అమ్మకాల ద్వారా గత ఏడాది రూ.65.26 కోట్లు రాగా.. ఈసారి అది మరో రూ.17.41 కోట్లు పెరిగిందని చెప్పారు. ఇప్పటివరకు 22,67,956 మంది యాత్రికులు శబరిమల అయ్యప్పను దర్శించుకున్నారని తెలిపారు. ఇక అయ్యప్ప భక్తులకు దర్శనం సజావుగా కల్పించేందుకు కావాల్సిన అన్ని సౌకర్యాలు చేసినట్లు తెలిపారు. ఈ సందర్భంగా ట్రావెన్‌కోర్ దేవస్వం బోర్డుకు సహకరించిన కేరళ పోలీసులతో పాటు అన్ని శాఖల అధికారులకు బోర్డు అధ్యక్షుడు కృతజ్ఞతలు చెప్పారు.

శబరిమల అయ్యప్ప క్షేత్రానికి వస్తున్న భక్తుల రద్దీని దృష్టిలో ఉంచుకుని కేరళ ఆర్టీసీ మరిన్ని సర్వీసులను నడుపుతోంది. కేఎస్‌ఆర్టీసీ కొత్తగా కోయంబత్తూర్, కుమళికి రెండు సర్వీసులు.. తెన్కాశి, తిరునెల్వేలి, తేనిలకు ఒక్కో బస్సును ప్రారంభించింది. పంబ కేరళ ఆర్టీసీ బస్ స్టేషన్ నుంచి.. సుదూర సేవలు అందుబాటులో ఉన్నాయని.. భక్తులు కేఎస్ఆర్టీసీ వెబ్‌సైట్ ద్వారా టిక్కెట్లు కొనుగోలు చేయవచ్చని అధికారులు తెలిపారు.

శబరిమలకు వచ్చే అయ్యప్ప భక్తులకు ఎలాంటి ఇబ్బందులు లేకుండా దర్శనాలు జరిగేలా ట్రావెన్‌కోర్ దేవస్వం బోర్డు ఏర్పాట్లు చేస్తోంది. ఎరుమేళి నుంచి అటవీ మార్గం ద్వారా సన్నిధానంకు చేరుకునే భక్తుల కోసం ప్రత్యేక ఏర్పాట్లు చేసినట్లు బోర్డ్ అధ్యక్షుడు పీఎస్ ప్రశాంత్ వెల్లడించారు. అటవీ మార్గం ద్వారా వచ్చే యాత్రికులు క్యూలో నిలబడకుండా.. నేరుగా సన్నిధానానికి చేరుకుని స్వామిని దర్శించుకోవచ్చని పేర్కొన్నారు. ఇందుకోసం ఎరుమేలి, పులుమేడు వద్ద అయ్యప్ప భక్తులకు ప్రత్యేక పాస్‌లు జారీ చేస్తారని చెప్పారు. అటవీ శాఖ అధికారుల సహకారంతో ప్రత్యేక ట్యాగ్‌ను భక్తులకు జారీచేయాలని దేవస్థానం బోర్డు భావిస్తోంది.