టాక్స్‌పేయర్లకు అలర్ట్.. అక్కడ ఆస్తులుంటే చెప్పండి.. లేకుంటే రూ. 10 లక్షల ఫైన్!

పన్ను చెల్లింపుదారులకు అలర్ట్. 2023-24 ఆర్థిక సంవత్సరం లేదా 2024-25 అసెస్‌మెంట్ ఇయర్ (మదింపు సంవత్సరం) కు సంబంధించి.. ఐటీ రిటర్న్స్ దాఖలు చేసేందుకు గడువు జులై 31తోనే ముగిసింది. అయితే.. పెనాల్టీతో టాక్స్ రిటర్న్స్ ఫైల్ చేసేందుకు ఆదాయపు పన్ను శాఖ డిసెంబర్ 31 వరకు అవకాశం కల్పిస్తుంది. ఈ ఆగస్ట్ 1 నుంచి డిసెంబర్ 31 వరకు దాఖలు చేసే దానిని బిలేటెడ్ ఐటీ రిటర్న్స్ అంటారు. అయితే.. ఇక్కడ పాత పన్ను విధానం వర్తించదు. కొత్త పన్ను విధానంలోనే ఫైల్ చేయాల్సి ఉంటుంది. ఇంకా.. జరిమానా చెల్లించాల్సి ఉంటుంది. రూ. 5 లక్షల్లోపు వార్షికాదాయం ఉన్నట్లయితే జరిమానా రూ.1000, అదే రూ. 5 లక్షలు దాటితే జరిమానా రూ. 5 వేలు చెల్లించాల్సి ఉంటుంది.

ఇక్కడ మరో విషయం గుర్తుంచుకోవాలి. ఐటీ విభాగం ఇటీవలే కీలక హెచ్చరిక చేసింది. 2024-25 మదింపు సంవత్సరానికి సంబంధించి.. ఇప్పటికే ఫైల్ చేసిన ఐటీఆర్‌లో విదేశీ ఆస్తులు, విదేశాల్లో సంపాదించిన ఆదాయం వివరాలు వెల్లడించిన టాక్స్ పేయర్లకు రూ. 10 లక్షల వరకు జరిమానా విధించే అవకాశం ఉందని ఐటీ శాఖ హెచ్చరించింది.

ఇప్పటికే ఈ విషయానికి సంబంధించి.. టాక్స్ పేయర్లకు ఎస్ఎంఎస్, ఇ- మెయిల్ ద్వారా సమాచారం ఇస్తున్నట్లు కేంద్ర ప్రత్యక్ష పన్నుల బోర్డు వెల్లడించింది. విదేశాల్లోని అకౌంట్లు లేదా ఆస్తులు ఉండటం వల్ల లేదా విదేశాల నుంచి సదరు టాక్స్ పేయర్లు ఏమైనా ఆదాయం అందుకున్నట్లు ద్వైపాక్షిక, బహుళ పాక్షిక ఒప్పందాల కింద తమకు అందిన సమాచారాన్ని బట్టి గుర్తించిన పన్ను చెల్లింపుదారులకు ఈ సమాచారం పంపుతున్నట్లు వెల్లడించింది.

మరోవైపు 2023-24 ఆర్థిక సంవత్సరానికిగానూ భారతదేశ జనాభాలో కేవలం 6.68 శాతానికి సమానమైన 8.09 కోట్ల మంది మాత్రమే ఐటీ రిటర్న్స్ దాఖలు చేశారు. ఇందులో మళ్లీ 4.90 కోట్ల మంది ఎలాంటి టాక్స్ చెల్లించలేదని తెలిపారు. ఈ విషయాన్ని కేంద్ర ఆర్థిక శాఖ సహాయ మంత్రి పంకజ్ చౌదరీ మంగళవారం రోజు పార్లమెంటుకు వెల్లడించారు. ఇది 2022-23 లో 7.40 కోట్ల మంది, దానికి ముందటి ఆర్థిక సంవత్సరంలో 6.96 కోట్ల మంది టాక్స్ రిటర్న్స్ ఫైల్ చేసినట్లు రాజ్యసభకు వెల్లడించారు.