కాంపౌండింగ్ మ్యాజిక్.. రూ.10 వేల 'సిప్' పెట్టుబడితో రూ.23 కోట్లొచ్చాయ్.. ఆ స్కీమ్ ఇదే

ఈక్విటీ ఫండ్స్‌లో పెట్టుబడులు అంటే దీర్ఘకాలిక లక్ష్యాలుగా ఉండాలని ఆర్థిక నిపుణులు ఎప్పుడూ చెబుతుంటారు. మ్యూచువల్ ఫండ్స్‌లో పెట్టుబడులు తొలినాళ్లలో పెద్దగా రిటర్న్స్ ఇచ్చినట్లు కనిపించవు. కానీ, దీర్ఘకాలంలో కాంపౌండింగ్ మ్యాజిక్ పని చేస్తుంది. వడ్డీపైన వడ్డీ జనరేట్ అవుతుటుంది. దీంతో పెద్ద మొత్తంలో కార్పస్ ఏర్పడుతుంది. దీర్ఘకాలంలో మంచి రిటర్న్స్ ఇచ్చే పథకాలను ఎంచుకోవాలి. ఇలా లాంగ్ టర్మ్‌లో హైరిటర్న్స్ ఇచ్చిన పథకాల్లో ఫ్రాంక్లిన్ ఇండియా ప్రైమా ఫండ్ ఒకటిగా నిలిచింది. రూ.10 వేల సిప్ పెట్టుబడిని రూ.23 కోట్లకుపైగా చేసింది. మరి ఆ వివరాలు ఇప్పుడే మనం తెలుసుకుందాం.

ఫ్రాంక్లిన్ ఇండియా ప్రైమా ఫండ్ అనేది ఒక మిడ్ క్యాప్ ఫండ్. ఈ స్కీమ్ లాంచ్ అయ్యి డిసెంబర్ 1, 2024 నాటికి 31 సంవత్సరాలు పూర్తయింది. ఈ పథకాన్ని డిసెంబర్, 1993లో లాంచ్ చేశారు. ప్రస్తుతం ఈ మిడ్ క్యాప్ ఫండ్ ఏఎంయూ విలువ రూ.12,441 కోట్లుగా ఉంది. తన పోర్ట్ ఫోలియోలో 77 స్టాక్స్ కలిగి ఉంది. మూలధనాన్ని దీర్ఘకాలంలో పెద్ద మొత్తంగా మార్చాలనే ప్రాధన లక్ష్యంతో ఈ స్కీమ్ తీసుకొచ్చారు. ఈ మిడ్ క్యాప్ ఫండ్ లాంచ్ అయినప్పటి నుంచి చూసుకుంటే గడిచిన 30 ఏళ్ల కాలంలో సగటున వార్షిక రాబడి 19.91 శాతంగా ఉంది. అలాగే గత 10 సంవత్సరాల్లో చూసుకుంటే 16.88 శాతం వార్షిక రాబడులు అందించింది. అలాగే గత ఏడాది కాలంలో చూస్తే ఏకంగా 36.59 శాతం మేర రిటర్న్స్ ఇచ్చింది.

సిప్ పనితీరు..

ఫ్రాంక్లిన్ ఇండియా ప్రైమా ఫండ్ సిప్ పని తీరును గమనిస్తే ఈ స్కీమ్ లాంచ్ అయినప్పటి నుంచి XIRR రిటర్న్స్ 21.02 శాతంగా ఉన్నాయి. ముప్పై ఏళ్ల క్రితం సిస్టమాటిక్ ఇన్వెస్ట్‌మెంట్ ప్లాన్ (SIP) ద్వారా నెలకు రూ.10 వేల చొప్పున పెట్టుబడి కొనసాగిస్తూ వచ్చినట్లయితే ఇప్పుడు ఆ విలువ రూ.23.45 కోట్లుగా ఉంటుంది. అలాగే గత 5 సంవత్సరాలుగా చూసుకుంటే ఇందులో XIRR రిటర్న్స్ 28.79 శాతంగా ఉన్నాయి. అంటే 5 ఏళ్ల క్రితం రూ.10 వేల సిప్ పెట్టుబడిని ప్రారంభించి క్రమం తప్పకుండా ఇన్వెస్ట్ చేస్తూ వచ్చినట్లయితే ఇప్పుడు ఆ విలువ రూ.12.43 లక్షలు అవుతుంది.

లంప్ సమ్ పెట్టుబడిపై రిటర్న్స్..

ఈ స్కీమ్ లాంచ్ అయినప్పుడు ఇందులో మీరు రూ.1 లక్ష లంప్‌సమ్ పెట్టుబడి పెట్టారు అనుకుందాం. అంటే ఒకసారి లక్ష రూపాయలు పెట్టి వదిలేస్తే ఈ 30 ఏళ్లకాలంలో అది రూ.2.82 కోట్లు అవుతుంది. ఈ స్కీమ్ CAGR 19.91 శాతంగా ఉంది. గత 5 సంవత్సరాల రిటర్న్స్ చూస్తే రూ.1 లక్ష పెట్టుబడి 24.17 శాతం వార్షిక రాబడితో రూ.2.95 లక్షలు అవుతుంది.