కడుపునొప్పితో ఆస్పత్రికి వెళ్లిన డిగ్రీ విద్యార్థినికి మగబిడ్డ.. గర్భవతిని చేసిన కెమిస్ట్రీ టీచర్

తమిళనాడులో దారుణ సంఘటన చోటు చేసుకుంది. కడుపు నొప్పితో ఆస్పత్రికి వెళ్లిన డిగ్రీ విద్యార్థిని మగ పిల్లాడికి జన్మనివ్వడం తీవ్ర చర్చనీయాంశంగా మారింది. సాధారణ కడుపునొప్పి అని భావించినా.. ఆమెకు కొడుకు పుట్టడంతో డాక్టర్లే ఆశ్చర్యపోయారు. ఈ విషయం కుటుంబ సభ్యులకు చెప్పడంతో వారు పరుగు పరుగున ఆస్పత్రికి చేరుకున్నారు. అవమానం భరించలేని ఆ యువతి ఆత్మహత్య చేసుకునేందుకు సిద్ధపడగా.. అంతా అడ్డుకున్నారు. ఆ తర్వాత ఏం జరిగిందని ఆమెను ప్రశ్నించగా.. అసలు విషయం చెప్పింది. తాను ఇంటర్ సెకండియర్ చదివే సమయంలో తన స్కూల్‌లో కెమిస్ట్రీ సబ్జెక్ట్ చెప్పే టీచర్.. తనపై బలవంతంగా అత్యాచారం చేశాడని తెలిపింది. దీంతో కేసు నమోదు చేసుకున్న పోలీసులు ఆ కెమిస్ట్రీ టీచర్‌ను అరెస్ట్ చేశారు.

తమిళనాడు రాజధాని చెన్నైలో జరిగిన ఈ ఘటన ఇప్పుడు తీవ్ర విమర్శలకు తావిస్తోంది. కడలూరు జిల్లా సేతియాతోపు సమీపంలోని మంగళం ప్రాంతంలో ఉన్న ప్రభుత్వ హైస్కూల్‌లో మలర్ సెల్వం అనే 50 ఏళ్ల వ్యక్తి కెమిస్ట్రీ టీచర్‌గా పనిచేస్తున్నాడు. అయితే గతేడాది.. అదే స్కూల్‌లో చదువుతున్న 17 ఏళ్ల ఇంటర్ సెకండియర్ విద్యార్థినిని లైంగికంగా వేధించేవాడు. ఈ క్రమంలోనే ఇంటర్ సెకండియర్‌లో కెమిస్ట్రీ ప్రాక్టికల్‌లో మార్కులు తగ్గిస్తానని ఆమెను బెదిరించి లోబరుచుకున్నాడు. ఇక అదే స్కూల్‌లోనే గతేడాది ఆ యువతిపై అత్యాచారానికి పాల్పడ్డాడు. ఈ విషయం ఎవరికైనా చెప్తే చంపేస్తానని బెదిరించాడు. దీంతో ఆ యువతి జరిగిన విషయాన్ని ఎవరికీ చెప్పకుండా దాచిపెట్టింది.

ఇంటర్ పూర్తయిన తర్వాత ఆ యువతి చెన్నైలోని ప్రైవేటు కాలేజీలో బీఎస్సీ నర్సింగ్ కోర్సు చదువుతోంది. ఈ నేపథ్యంలోనే ఈ నెల 15వ తేదీన ఆమెకు కడుపు నొప్పి రావడంతో చెన్నైలోని కీల్పాక్కం ప్రభుత్వ ఆస్పత్రికి వెళ్లింది. ఆమెకు పరీక్షలు చేసిన డాక్టర్లు.. ఆ యువతి గర్భవతి అని గుర్తించి కాన్పు చేయగా.. మగ పిల్లాడు పుట్టాడు. దీంతో ఈ విషయం ఆ యువతి కుటుంబ సభ్యులకు అందించడంతో వారు అక్కడికి చేరుకున్నారు. ఏం చేయాలో తెలియని ఆ విద్యార్థిని విషం తాగి సూసైడ్ చేసుకోవడానికి ప్రయత్నించింది. అది గమనించిన ఆస్పత్రి సిబ్బంది.. ఆమెను రక్షించి తల్లిదండ్రులకు అప్పగించారు.

ఇక ఈ ఘటనతో ఆ యువతిని ఏం జరిగిందని ఆరా తీయగా.. కెమిస్ట్రీ టీచర్ మలర్ సెల్వం పేరు చెప్పింది. దీంతో ఆ యువతి కుటుంబ సభ్యులు చెన్నైలోని సెంబియం తోప్పు ఆల్‌ మహిళా పోలీస్‌ స్టేషన్‌లో కెమిస్ట్రీ టీచర్‌పై ఫిర్యాదు చేశారు. కాగా ఆ ఫిర్యాదుతో రంగంలోకి దిగిన పోలీసులు.. కేసు నమోదు చేసి.. మలర్‌ సెల్వంను గురువారం అరెస్ట్ చేశారు. ఇక ఆ మలర్ సెల్వంకు పెళ్లై పిల్లలు కూడా ఉన్నారని పోలీసులు వెల్లడించారు. అయితే గతేడాది అత్యాచారం జరిగి.. ఇప్పుడు గర్భవతి అయినా ఎవరికీ అనుమానం రాకపోవడం తీవ్ర ఊహాగానాలకు తావిస్తోంది.