8 పల్టీలు కొట్టిన కారు.. చిన్న గాయం లేకుండా లేచి టీ అడిగారు, వీడియో వైరల్

"అదృష్టం అడ్డం తిరిగితే అరటి పండు తిన్నా పన్ను విరుగుద్ది" ఇది ఒక సినిమాలో హీరో చెప్పే డైలాగ్. కొన్ని సంఘటనలు చూసినపుడు మనకు అలాగే అనిపిస్తూ ఉంటుంది. అంటే మనకు అదృష్టం లేకపోతే చిన్న చిన్నవి కూడా పెద్ద సమస్యలుగా కనిపిస్తాయి అని అర్థం. సాధారణంగా రెప్పపాటులో అనుకోకుండా జరిగే ప్రమాదాల కారణంగా ఏ సంబంధం లేని వారు కూడా ప్రాణాలు కోల్పోయిన సంఘటనలు చూస్తూనే ఉన్నాం. రోడ్డు మీద వెళ్తున్న ఏదో ఒక వాహనం అదుపు తప్పి రోడ్డు పక్కన నడుచుకుంటూ వెళ్తున్న వారిని ఢీకొట్టి ప్రాణాలు తీసిన ప్రమాదాలు చూశాం. అయితే కొన్నిసార్లు అదృష్టం మన వెంట ఉంటే చావు నుంచైనా తప్పించుకోవచ్చని ఈ ఘటన ద్వారా తెలుస్తోంది. ఎందుకంటే వేగంగా వచ్చిన ఓ కారు అదుపు తప్పి 8 పల్టీలు కొట్టినా అందులో ఉన్న వారు పూర్తి క్షేమంగా బయటికి రావడం చాలా ఆశ్చర్యంగా మారింది.

రాజస్థాన్‌లో జరిగిన ఈ ఘోర ప్రమాదానికి సంబంధించిన సీసీటీవీ ఫుటేజీ బయటికి రావడంతో ఈ వీడియో కాస్తా సోషల్ మీడియాలో తెగ వైరల్ అవుతోంది. హైవేపై అతి వేగంతో దూసుకెళ్లిన కారు మూలమలుపు వద్ద పూర్తిగా అదుపుతప్పింది. దీంతో గాల్లోకి ఎగిరిన ఆ కారు.. ఏకంగా రోడ్డుపై 8 సార్లు పల్టీలు కొట్టింది. అనంతరం రోడ్డు పక్కన ఉన్న షోరూమ్ గేటుపై పడిపోయింది. అయితే అదృష్టం కొద్దీ ఆ కారులో ప్రయాణించిన ఐదుగురు వ్యక్తులు ఎలాంటి గాయాలు లేకుండా సురక్షితంగా బయటపడటం గమనార్హం. అంతేకాకుండా ప్రమాదం తర్వాత లేచి పక్కకు వచ్చి అక్కడ ఉన్న వారిని టీ అడగడం అందర్నీ ఆశ్చర్యంలో ముంచెత్తింది.

రాజస్థాన్‌లోని నాగౌర్‌ జిల్లాలో శుక్రవారం ఐదుగురు వ్యక్తులు.. నాగౌర్ నుంచి బికనీర్‌కు ఎస్‌యూవీలో బయల్దేరారు. రాత్రిపూట హైవేపై వేగంగా వెళ్తున్న ఆ ఎస్‌యూవీ కారు ఒక మలుపు వద్ద అదుపు తప్పింది. స్టీరింగ్‌పై కంట్రోల్‌ తప్పిన డ్రైవర్‌.. కారును అదుపు చేయలేకపోవడంతో ఆ కారు రోడ్డుపై పల్టీలు కొట్టింది. నడిరోడ్డుపై ఏకంగా 8 పల్టీలు కొట్టి చివరికి రోడ్డు పక్కనే ఉన్న ఓ కారు షోరూమ్‌ గేట్‌పై రివర్స్‌లో పడింది. అయితే కారు గాలిలో పల్టీలు కొడుతుండగానే దాని డ్రైవర్‌ అందులో నుంచి కిందికు దూకేశాడు. కారు ఆగిన తర్వాత అందులో ఉన్న మిగతా నలుగురు వ్యక్తులు.. కూడా బయటికి వచ్చారు. ఎవరికీ ఏమీ కాకపోవడంతో అంతా ఊపిరిపీల్చుకున్నారు. ఈ ఘటన తర్వాత వారంతా ఆ కారు షోరూమ్‌లోకి వెళ్లిన కొంచెం టీ ఉంటే ఇస్తారా అడిగినట్లు స్థానికులు చెప్పారు. మరోవైపు ఈ ప్రమాదానికి సంబంధించిన పూర్తి దృశ్యాలు అక్కడ ఉన్న సీసీటీవీ కెమెరాల్లో రికార్డ్ అయ్యాయి. ఇప్పుడు ఆ వీడియోలు సోషల్‌ మీడియాలో వైరల్‌ కావడంతో నెటిజన్లు కామెంట్ల వర్షం కురిపిస్తున్నారు.